Tŭ pờ gùng lơh nhơl chờ mpồl bơtiàn, làng bol kòn cau Mnông kis tàm do gơtùi prăp gàr, ngui geh bơta niam chài rơgơi ờs mờng, nàng geh tai priă tơnguh rài kis.

Tàm hìu ƀềp, tềng đăp mờ ală ƀào kòi mờ kơphe, mò H’ Krông kis tàm ƀòn Yôk Ju, xã Nâm Nung gam lơh yàng duh khoai kòi pa. Phan pơdơng lơh yàng mìng geh dùl drăp tơrnờm, dùl nơm iar neh gơm sin, dùl preng plai chi mờ biăp, kơnuh bơh tàm suơn. Mò yal, nam pa do hìu nhă tơnhào geh 40 ƀào kòi, rơlao 2 tấn kơphe gar, rài kis kung hờm ram. Broă duh khoai kòi pa là broă pal geh lơh tàm bơta chài rơgơi kòn cau Mnông dê, nàng răc dan geh dùl nam pa rài kis geh niam bơnĕ rơlao: “Lơh yàng duh khoai kòi pa, tơnơ̆ mờ tŭ tơnhào jơh, cèng kòi rê tàm hìu, wă rò huềng kòi rê, tŭ do geh kơphe tai. Cèng jơh ală phan lơh broă rê tàm hìu, wă rò yàng kòi rê, nàng răc dan geh bơta pràn kơl dang hìu nhă, nàng bañ gơtìp kòp tê jê să, nam tus lơh sa geh niam rơlao, lơh kòi geh tơnhào uă, tam kơphe geh cồng nha...”

Ală broă lơh yàng duh khoai kòi pa, duh khoai geh bơta pràn kơl dang să jan geh bơyai lơh tàm bơta hìu nhă, ha là lơh chờ bơh ƀòn lơgar bal mờ broă dròng cinh, mồng, đơs jơnau pơn đik..., là ală bơta niam chài rơgơi ờs mờng niam bơnĕ gam geh kòn cau Mnông kis tàm xã Nâm Nung prăp gàr. Mờ làng bol kung gàr geh ală broă lơh ờs mờng bè tàñ ồi yau, tàñ sơ̆, tàñ đồng... Cau chài Y Nhan, kis tàm ƀòn Yôk Ju, xã Nâm Nung pà git: “Broă lơh bơh añ dê là tàñ phan, bè tàñ đồng, tàñ sơ̆... mờ gam tiar ală bơta phan lơh broă tai. Broă hơ̆ añ lơh tàm tŭ ru tơnơ̆ mờ tŭ neh rê lơh broă tàm suơn tàm mìr, lơh kơphe, nàng prăp gàr wơl broă lơh ờs mờng hiù nhă dê. Añ lơh nàng ngui tàm hìu nhă mờ cau lơi kờñ blơi den añ tăc”.

Lơh wơl ală bơta niam chài rơgơi ờs mờng kòn cau dê, nam pa do, gơnoar atbồ xã Nâm Nung neh dong kờl làng bol rơhời tơnguh bơtàu nhơl chờ mpồl bơtiàn. Ồng Y Krêu, Phó kwang atbồ ƀòn Yôk Ju pà git, làng bol neh lơh geh ală mpồl homestay, mpồl trŭ phan sa, mpồl đơs jơnau pơn đik ờs mờng nàng drơng cau năc in. ală hợp ták xã tàñ ồi yau, hợp ták xã ƀĕ tơrnờm kung neh geh uă phan nàng tăc tàm drà kă bro. “Bol añ lơh homestay nhơl chờ mpồl bơtiàn nàng kơ̆p kờñ geh prăp gàr bơta niam chài rơgơi kòn cau dê bè cing mồng, lơh chờ mờ pơn jăt tai lơh ală broă lơh ờs mờng bè tàñ sơ̆, tàñ ồi yau, yal phan sa bơh ală jơi bơtiàn kòn cau, phan geh bơh broă lơh sa suơn sre geh să tòm he lơh geh, ală phan geh uă tàm ƀòn lơgar nàng drơng cau năc nhơl chờ, ai làng bol in geh priă mờ rài kis geh niam rơlao”.

Xã Nâm Nung, kơnhoàl Krông Nông, càr Dăk Nông là tiah pôs đồng kăc màng tàm rài cau khin cha jăk chài N’Trang Lơng ntào tam lơh mờ ling lơgar Tây sò tơm, mờ geh pơn jăt tai tàm bàr dơ̆ tam lơh tơnklàs dà lơgar, tiah geh pôs ling B4-liên tỉñ IV neh geh rơndăp tàm mpồl phan lời wơl tềl kah yau rài kăc màng kấp dà lơgar. Tàm gơl gùng nhơl chờ “Jơnau yal yau bơh dà mờ ồs” gơwèt Kông viên địa cất gùt plai ù UNESCO Dăk Nông, tiah pôs đồng kăc màng Nâm Nung là “Tiah pơrhê” bơto bơtê bơhiàn jăk chài kăc màng, tiah phan lời wơl drơng cau năc nhơl chờ tàm gùng rê wơl mờ rài lài do.

Mờ uă croh dà hòr bơh tàm brê dờng, tàm Nâm Nung geh uă ngan nrùh dà niam bè Leng Kum, Leng Ôông, Leng Gungtao... Bơdìh hơ̆ tai là ù tiah niam bơnĕ bơh ƀlàng sre lơh kòi tềng jơng bơnơm ồs, suơn tam tờm chi sa plai tàm dòr lŭ ƀọt... Jăt mò H’ Thương, Phó Củ tịc UɃÑZ xã Nâm Nung đơs, tiah tềl kah yau rài kăc màng, ală ù tiah niam bal mờ bơta niam chài rơgơi ờs mờng ală jơi bơtiàn kòn cau là bơta pràn nàng xã pờ geh gùng dà tơnguh bơtàu nhơl chờ. Tơngai do, neh geh ală mpồl cau năc tus mờ Nâm Nung, geh ờ uă bơta phan ồi yau mờ tơrnờm bơh làng bol kung neh geh tăc tus tàm ală tiah rềp bal mờ cau năc, là ală cau geh tơngŏ chờ hờp lài ngan nàng làng bol lơh broă nhơl chờ mpồl bơtiàn. “Bơta ƀuơn ngan gơwèt mờ broă nhơl chờ mpồl bơtiàn do là tàm xã geh uă ngan cau chài, bè cing mồng, tàñ ồi yau, tàñ sơ̆ mờ cau chài đơs jơnau pơn đik, đơs jơnau yal yau... Mờ jăt añ den mờ broă rơhời tơnguh bơtàu bơh làng bol dê, den di gơlan là rơhời gơtùi lơh geh”.

Geh uă bơhiàn ờs mờng chài rơgơi lài do, geh ală bơta niam bè ù tiah, bal mờ ală kòn bơnus niam bơnĕ, đềt mềr mờ cau năc, Nâm Nung geh uă bơta niam nàng lơh broă nhơl chờ. Bŭ lah bè hơ̆, ù tiah do gam kờñ ngan geh broă bơcri priă di pal nàng lơh wơl, ngui niam ală bơta neh geh lài, mùl màl là dùl tiah tus tàm gùng nhơl chờ Kông viên địa cất gùt plai ù UNESCO Dăk Nông dê.