Tŭ geh cau tàm ƀòn gơtìp chơ̆t, kra ƀòn mhar tus hìu cau chơ̆t nàng jan sơngơr yal geh cau gơtìp chơ̆t mờ cri bơyai bal tàm broă bơyai ies cau chơ̆t. Kơno jơnau yal, ală cau tàm ƀòn ờ geh cau lơi yal cau lơi, tus is nàng dong kờl hìu cau chơ̆t bè: lơh ală broă bè, geh cau trŭ sa, geh cau rơcang cing mồng, geh cau lòt tờs ală cau tàm jơi nòi bal kis tàm ƀòn ngài. Ồng Rưm, 50 sơnam kis tàm ƀòn K’tu, sàh Kông Chêng, càr Gia Lai pà git: “Ies cau chơ̆t tàm ƀòn, añ gŏ oh mi ƀòn lơgar tus ies gal ngan. Oh mi bơyai lơh dròng cing jan mồng, tamya xoang bơh ngai sơnrờp tus ngai tơ̆p, tam pà bal jơnau moăt mờ cau tàm hìu nhă geh cau gơtìp chơ̆t… Oh mi jơi nòi den tăc priă, tăc phan, di gơlan 2, 3 hìu tă priă blơi bal 1 nơm sur nàng dong kờl hìu chơ̆t”.

Kung bè ală jơi bơtiàn ndai, gơwèt mờ kòn cau Bơnhàr, chơ̆t jê là broă dờng, broă bơh gùt ƀòn lơgar dê, ờ mìng is cau tàm hìu nhă, den tàng ală cau ờ kơ̆p cau hòi tus dong kờl, di lah kơno cau yal là lòt is nàng dong kờl hìu chơ̆t. Ồng Đinh Pơr, 58 sơnam, kis tàm ƀòn Pông, sàh Chư A Thai, càr Gia Lai pà git: “Tàm ƀòn bol añ tŭ geh cau gơtìp chơ̆t, ală cau tàm ƀòn tus ies, cèng bal cing, mồng bơyai dròng gùt mang tơn. Ală cau rơcang tàm broă ies, ờ geh cau lơi lòt lơh broă ndai. Tus tàm tŭ tơ̆p, lơh gơs hìu ƀồc den hơ̆ sồng ală cau rê mờ lòt lơh broă hìu nhă tờm”.

Tàm ală ngai geh bơyai ies cau chơ̆t, hìu cau chơ̆t tŭ lơi kung gal cau tus. Ală cau do tus nàng ies cau chơ̆t, pơn dờm pơn iang cau tàm hìu nhă cau chơ̆t. trồ mang, ală mpồl dròng cing jan mồng tàm ƀòn tam pà bal tŭ nàng dròng tus gùt mang. Ală cau kis rềp bal cèng bal ồi, bềl tus nàng bic tàm hìu chơ̆t. ală cau dờng sơnam mờng nggui gùt dar bơnhă ồs nàng bol bơr; yal wơl ală jơnau niam gơwèt mờ cau neh chơ̆t. Broă gơsơ̆t rơpu, kơnrồ nàng sa chơ̆t ờ di bơyai lơh ñô sa uă ir, mờ là broă nàng tơlik nùs nhơm kah tus cau neh chơ̆t bal mờ nùs nhơm git ưn ngài gơwèt mờ ală cau rềp ngài neh tus ies, tam pà jơnau moăt jrùng mờ hìu nhă.

Ồng Đinh Brơi, 67 sơnam, kra ƀòn tàm ƀòn Plei Chư̆p, sàh Lơ Pang, càr Gia Lai đơs tờm tus mờ broă kwơ màng rơlao tàm broă ies cau chơ̆t kòn cau Bơnhàr dê là nùs nhơm pơgồp bal mpồl bơtiàn. Di lah cau chơ̆t gơtìp kal ke, den ală cau tàm ƀòn rơ̆p tă priă nàng blơi sur, iăr, ơlăk. Oh mi cau ùr tŭ tus ies den cèng bal ală bơngàn phe nàng drơng bal hìu cau chơ̆t in.

“Tŭ gơtìp chơ̆t tus den tơl nă he ndrờm geh nùs nhơm moăt, is ồn gơwèt mờ cau tàm hìu, lơh broă bal, ơm kis bal tàm ƀòn. Den tàng, tŭ geh cau gơtìp chơ̆t den ală cau tàm ƀòn peh sur, kơnrồ nàng tơlik nùs nhơm moăt cau chơ̆t mờ nàng drơng biăp piang ală cau bơh ngài tus ies in”.

Tŭ do, geh ờ uă broă bơyai lơh ies cau chơ̆t kòn cau Bơnhàr dê neh geh tơrmù, sơrbì ală bơhiàn ờ niam, hoàc huơr, mìng gam lời ală bơta niam di pal mờ rài kis pa, mơya nùs nhơm tam klăc bal, dùl nùs bal bơh mpồl bơtiàn dê kung gam bè ờs.