Tơl phan sa cèng dùl bơta niam bơnĕ krơi is, cèng bơta bơkah, bô thồm bơh brê bơnơm dê. Mờ phan sa bơh yau geh uă bơta bơkah tiah kơh bơnơm dê pal yal tus hơ̆ là pòr sràt.

Pòr sràt- bè mat sơnđan bơh gơ dê sơl, cèng bơta sràt di mơ, ƀô thồm dùl ết bơh kañ tơrnờm dê. Krơi mờ ală phan sa bơh yau dê bè mbar prùng tàm ding, poăc iar buh... sùm geh ngui tŭ bơyai lơh dơ̆ lơh chờ tàm ƀòn lơgar, pòr sràt là dùl phan sa mờng kwèng ngan bơh tơl hìu bơnhă kòn cau K’Ho dê. Khi gơm pòr sràt nàng sa pah ngai, nàng cèng tàm sre tàm mìr lơh broă ngui ala dà hùc. Jat mò K’Bri ơm tàm sơnah ƀòn Kon Tách Đăng, thị trấn Đinh Văn, kơnhoàl Lâm Hà, càr Lâm Đồng yal, phan nàng gơm pòr sràt bal hiă ngan, hơ̆ mìng là ală phe lơm. Mò K’Bri pà gĭt: "Pòr sràt den phe lơi gơm kung gơtùi lơm, digơlan là phe kòi mìr, phe kòi sre halà tơngời. Dilah ngui phe kòi sre bè ờs den sac rơ wah phe kơldang, piang ờ lơbơn. Mơya bơkah ngan rlau jơh kung gam phe kòi mìr lơm".

Nàng gơm pòr sràt den cau sùm pal gơm phe nàng gơ gơs pòr. Bơh sơn rờp là rơpau phe, bañ rơpau uă ir di lah rơpau uă ir den pòr rơ̆p roh tĕ bơta lơngàm. Tơnơ̆ hơ̆ gơm tàm bơnhă ồs. Nàng gơ gơs pòr sràt den pòr tàm glah mìng gơm tàm bơta sin di mơ lơm, bañ gơm lề ir den tàng tŭ gơlik sràt pòr rơ̆p gơlik dà, pòr ờ gŏ kơ̆t.

Pòr tơnơ̆ tŭ gơm jơh ờ gŏ tĕ khat dùl phan tĕ lơi, mìng lời pòr gơ in ngềt ngan tơnơ̆ hơ̆ tròc tàm plai nhồng ro, dơ̆p kơ̆ wơl. Yồng tềng bơnhă ồs bơh 1 tus 2 ngai là neh geh pòr sràt rao. Mò K’Bri đơs bè broă trŭ gơm nàng gơ gơs pòr sràt bè do: "He mình gơm pòr sin di mơ lơm den pòr geh bơta bơkah ngan. Bañ gơm pòr sin ir. Sùm den bơh 1 tus 2 ngai là pòr gơlik sràt. Nàng geh pòr sràt den tơnơ̆ tŭ gơm jơh he pal lời ngềt ngan hơ̆ sồng tròc pòr tàm plai nhồng ro mờ yồng tềng bơnhă ồs tàm hìu ƀềp".

Yal bè phan nàng sa bal mờ pòr sràt, mò K’ Bri pà gĭt tai, pòr sràt gơtùi sa bal mờ jơh ală phan sa. Jat tàm ù tiah mờ jat tàm bơta kờñ sa bơh tơl nă cau dê mờ khi geh sa bal mờ ală phan sa krơi is. Mò K’Bri pà gĭt: "He gơtùi sa mờ khat dùl phan sa lơi bè biăp, poăc... mơya bơkah ngan rlau jơh mờ digơlan gơ tàm jă bal ngan là phan sa ka rì, ka jấp buh ƀŏ bal mờ mrĕ lir".

Kòn cau K’Ho đơs là pòr sràt là dùl phan sa tơl pràn, ờ gơtùi ờ geh. Pòr do geh uă bơta kwơ, geh ngui nàng lơh dà hùc nàng lơh rài tơhìr tŭ ală tŭ lơh broă bòl glar tàm sre tàm mìr. Bơdìh hơ̆, pòr sràt gam gơtùi rcang sơndră sơwing bồ tŭ trồ tơngai duh, dong să jan gơ gơs pràn kơl dang wơl. Pòr sràt là phan sa mờng kuèng bơh kòn cau K’Ho dê. Hơ̆ là bơta niam chài phan sa geh lời wơl bơh jŏ rài. Năc lòt nhơl tus mờ Lâm Đồng gơtùi sa pòr sràt nàng geh tai bơta sền gĭt gơ kờñ ngan bơh phan sa pòr sràt do dê.