Tàm sap ntas đờng goòng duh hồl, 6 nă cau ùr kòn cau Mông tàm phan soh niam ngan kòn cau he dê lơbơn ngan jơng tê tam ya Sênh Tiền. Bi Ma Thị Huế ơm tàm xã Cư Kroá, kơnhoàl M’Drăk pà git: Sênh Tiền là dùl jơnau tam ya yô yau cau Mông dê, sùm geh lơh tàm ală dơ̆ lơh yàng, sa tềp halà ngai chờ. Bulah bè hơ̆, tàm ƀòn pa Dăk Lăk, gùng tam ya do ờ huan geh lơh. Mìng tus tŭ geh dơ̆ pơrlòng Ơruh pơnu đơs pơnđik mờ nhơl đờng goòng kòn cau den ală bi hơ̆ sồng geh tàp mờ git uă rlau tai bè jơnau tam ya niam ngan do: “Mpồl añ dê geh 6 nă, tàp rlau 1 nhai den hơ̆ sồng gơtùi geh bè do, tŭ do tàp tamya den là bơh ală mò bơto. Añ gŏ pơn iờ să ngan, tŭ bơsram jơnau tamya do den añ git là kòn cau he dê geh dùl bơta niam chài niam ngan. Añ git là niam chài kòn cau he dê kung geh uă ngan sơl, mìng là he ờ hềt git jơh gơ dê”.

Ai gơ wèt mờ oh H’Chuyên Knul ơm tàm ƀòn Mlơt, xã Ea Bông, kơnhoàl Krông Ana den đơs, pơrlòng là tŭ nàng ai tơnggŏ bơta pơn iờ să mờ jơnau dròng cing krơi is ngan bơh cau Rơđê Bih dê. H’Chuyên yal, bơh kàl rlô bơkang nam lài, oh bơsram dròng cing Jhô. Mờ bơta pơlam bơh ală cau chài tàm ƀòn lơgar dê, oh geh git, mìng geh cau Rơđê Bih hơ̆ sồng geh bòr cing Jhô lời ai cau ùr in dròng: “Oh gŏ gơlơh kờñ kòn cau he dê mờ niam chài kòn cau he dê uă rlau. Mờ oh kờñ lơh gơ rề bơhiàn niam chài kòn cau he dê tus tơl nă cau in git”.

Pơrlòng Ơruh pơnu đơs pơnđik mờ nhơl đờng goòng kòn cau là dùl broă lơh tàm Ngai chờ añ kờñ gơboh Dà lơgar añ bơh Tỉñ đoàn càr Dăk Lăk pa bơyai lơh. Mờr 30 jơnau, 300 nă cau ờ mờng chài là ală đoàn viên, ơruh pơnu mờ kơnòm dềt tàm 15 kơnhoàl, thị xã, ƀòn dờng tàm càr neh đơs ală jơnau pơnđik, lơh ală gùng tam ya bơh yau, nhơl ală bơta đờng goòng bơh ală jơi bơtiàn tàm uă tiah tàm gùt lơgar. Bơh ală sap ntas mờng kwèng bơh bòr cing Jhô, cing lơngô, cing gle, đờng T’rưng, kơmbuat, đing năm tus sap đờng tíñ, kơ wào, ală gùng đơs ay-ray, đơs then, đơs lý, ví dặm, đơs pơnđik tiah đah jum dà lơgar neh lơh gơs dùl ù tiah sap gùng đơs crih duh hồl, niam ngan. Bi H’Tuyết Niê ơm tàm ƀòn Cuôr Dăng A, xã Cuôr Dăng, kơnhoàl Cư Mgar đơs: ‘Tàm ală dơ̆ pơrlòng bè do den lơh gơs uă ngan bơta niam nàng ală bơyô in bơsram uă mờng chài rlau bơh ală mpồl ndai. Mờ kung dong he geh tai uă jơnau git wă nàng sơlơ git wă, geh bơta kờñ gơboh bè dròng cing jañ mồng, hơ̆ sồng gơtùi git bè đờng goòng kòn cau uă rlau”.

Jat jơnau đơs bơh mpồl ai điểm dê, pơrlòng neh ai tơnggŏ bơta li la bè niam chài ală jơi bơtiàn gam ơm kis tàm càr Dăk Lăk. Tơl jơnau pơrlòng geh bơta rơcang lài nền nòn, jơh nùs ngan jơh bal bè tơngume, phan soh mờ bơta chài lơh, pơgồp bal sap ntas. Bal mờ hơ̆, bơta tàm pơ dờn tàm ală mpồl pơrlòng neh ai tơnggŏ loh làng tŭ geh bơta tus bal bơh ală oh dềt dê tàm uă jơnau đơs crih nhơl đờng goòng mpồl bal. Ồng Lê Văn Hồng, hìu bơsram Kao đẳng Niam chài đơs crih tam ya càr Dăk Lăk, Kwang atbồ mpồl ai điểm dơ̆ pơrlòng pà git: “Mpồl ai điểm nam do jờng rơ ngan bơta tus bal bơh ală mpồl dê, ngan là bơnah pơrlòng nhơl đờng goòng kòn cau, neh lời wơl uă jơnau kah kir mờ uă jơnau pơrlòng niam ngan. Kuơmàng là ală jơnau tus bal pơrlòng bơh ală oh dềt gơ wèt kơnhoàl tiah sar lơgar ngài bè Krông Bông, Lăk. Ală oh bulah gam dềt mơya neh tơmut huềng tàm ală jơnau pơnđik mờ ală sap ntas cing, jơnau tamya, cèng wơl cồng nha bal ai ngai chờ in”.

Cồng nha bơh dơ̆ pơrlòng dê neh pơgồp bơnah sơlơ tơnguh mờ lơh gơrề tàm đoàn viên, ơruh pơnu, kơnòm dềt càr Dăk Lăk bơta kờñ gơboh bè gùng đơs crih, niam chài kòn cau bơh yau nàng pơn jat tai sền gàr mờ ngui niam.