Drim ngai 21/8, Ƀộ Niam chài, Tàp pràn să jan mờ Lòt nhơl neh bơyai lơh dơ̆ pơrjum rơcang ai dơ̆ mut lơh, tơn jơh Ràng tơlik “80 nam gùng Lơngăp lơngai is – Khat gơboh – Gơboh gơbài” di tơngkah 80 nam Kac màng nhai 8 geh cồng nha mờ Sơntờm dà lơgar (02/9). Dơ̆ mut lơh Ràng tơlik “80 nam gùng Lơngăp lơngai is – Khat gơboh – Gơboh gơbài” rơp sơn đờm bơh 9 jơ drim ngai 28/8; Dơ̆ tơn jơh rơp geh lơh tàm tŭ 8 jơ mang ngai 05/9.

Dơ̆ mut lơh mờ tơn jơh ndrờm geh lơh tàm anih hờ bơdìh, ƀlàng Đah tô, Anih tờm Ràng tơlik Việt Nam. Jơh gùt broă lơh bơh 2 dơ̆ bơyai lơh dê rơp geh pờ tơlik mờ sơñio rùp tơn tus làng bol gùt lơgar in tàm Anih jơnau đơs Việt Nam mờ Anih sơñio rùp Việt Nam. 2 rbô 400 nă đoàn viên ơruh pơnu lơh broă dong kờl is kung rơp geh sồr tus pơgồp bal tàm broă lơh pơlam, yal jơnau tơnggit mblàng yal, dong kờl làng bol mờ nac tus sền in. Kờp dŭ rơp geh pơgap bơh 5 rbô tus 6 rbô nă cau ala mat tus bal dơ̆ mut lơh, dơ̆ tơn jơh ràng tơlik.