uă broă lơh geh kuơ neh mờ gam lơh geh cồng nha ngan ngồn.

Lơh wơl dà mbòr, lơh tiah niam chài, hìu jòng mờ hìu ràng tơlik tàm ƀòn K’Li A, sơnah ƀòn Đạt Hiếu bơh ƀòn drà dờng Buôn Hồ dê là lam lơh jat ngan ngồn broă “Prap pàr mờ ngui niam bơta niam chài kòn cau tàm broă lơh bơt bơtàu mờ sền gàr dà lơgar”. Jơnau do sơlơ gơ gơs niam rlau, lơh kah rơngal bơta ki ngàm, sền gàr, prap gàr niam chài kòn cau tŭ Củ tịc Anih duh broă làng bol ƀòn drà dờng Buôn Hồ geh sră pơyua kờñ hòi jà ală mpồl cau, cau dồ nă să ai pà ală sră nggal, rùp hin, phan lời kir kah yau gơ rềng tus tŭ tơngai bơt bơtàu mờ bơtàu tơnguh ƀòn drà dờng Buôn Hồ. Jơh ală phan lời kir do rơp jàu ai hìu ràng tơlik bơh ƀòn K’Li A dê in: “Añ là kòn cau Rơđê. Añ pà mpal ƀŏ mrĕ. Do là phan ngui geh bơhr ài yau, sùm geh ngui tàm rài kis pah ngai. Do là phan mờ mò pàng añ dê lời wơl. Añ kờñ ơn gơ tàm hìu ràng tơlik nàng jơh tơl nă cau in gơtùi gŏ mờ kah wơl niam chài kòn cau he dê”.

Pa do là jơnau đơs bơh ồng Y Xuân Ayun, 71 sơnam, pơgru neh jơh sơnam rê rlô lơh broă tŭ do gam ơm kis tàm ƀòn Kwăng, xã Cư Bao. Ồng Y Xuân yal, lài dŏ tŭ gam lòt bơto, ồng sùmt ơngkah kơnòm bơsram cau Rơđê pal pơlam tàp dà đơs, akhar cih kòn cau he dê. Do là bơta nàng đal git niam chài bơh dùl jơi bơtiàn dê. Moat jrùm ngan là tŭ do uă cau geh bơsram sră mờ gơ gơs là kwang bàng, mơya khi ờ đơs mờ ờ git cih dà kòn cau he dê. Kung tàm ƀòn Kwăng, xã Cư Bao, ồng Y Khuê Ayun yal: Lài do, hìu ồng dê kung geh uă cing, drap yăng, glah lơngô. Mơya geh phan den pà, geh phan den neh tac. Kơlôi sùm, ồng Y Khuê kung rơ wah geh dùl phan ngui di nùs ồng dê: “Añ pà mpal ƀŏ phe mòn mờ dơm chi. Añ kơp kờñ tơnơ̆ do, cau kơnòm să sền gŏ rơp git tai bè ală phan ngui đềt mềr mò pàng he dê. Mpal do neh geh bơh jŏ ngan, mờr 100 nam bloh. Mpal do, cau Rơđê ngui nàng ƀŏ kòi phe, ƀŏ ƀòk”.

Bi H’Nghin Niê, Ƀí thư Ci ƀộ ƀòn Krưm B, xã Cư Bao pà git: Tàm dơ̆ pơrjum ci ƀộ dê, ală đảng viên cau Rơđê cribơyai jơh nùs ngan mờ ring bal jơnau đơs: pà ală phan lời kir, phan ngui tàm rài kis ờs mờng kung là broă lơh nàng ală phan hơ̆ geh sền gàr, prap gàr niam rlau. Tŭ ală phan lời kir mờ he pà geh ràng tơlik den geh uă cau lòt sền kung là dùl bơta pơn yờ să he dê: “Ci ƀộ ƀòn hòi jà ală đảng viên pà ală phan lời kir. Hơ̆ là phan ngui tàm rài kis, phan ting mòc, ală bơta đờng goòng, drăp yăng yau, glah yau nàng sền gàr kòn sau he in tơnơ̆ do in gŏ, nàng ờ huĭ ală phan ngui mờ mò pàng he mờng ngui. Rài yau den dùl nơm glah halà dùl nơm yăng kung pal tàm gơl mờ 1 halà 2 nơm rơpu”.

Neh geh 11 mpồl bal, mpồl lơh broă mờ 34 nă cau pà 60 nơm phan. Bơh phan ngui tàm rài kis mờng kwèng, phan ngui nàng ting mòc tus ală bơta đờng goòng… Tàm hơ̆ geh ală phan geh kuơ ngan bè: drăp yăng, glah lơngô, cing yau. Ồng Nguyễn Văn Tài, Kwang atbồ Cơldŭ lơh broă niam chài, yal tơnggit jơnau mờ Tàp pràn să jan ƀòn drà dờng Buôn Hồ pà git: Cơldŭ lơh broă gam lam lơh sac rơ wah, sền sơ wì sơnam nàng lơh sră nggal yal mùl màl gơ wèt mờ tơl phan lời kir: “Cơldŭ lơh broă niam chài mờ Yal tơnggit jơnau dờp ală phan pà bơh ală anih lơh broă, mpồl lơh broă, mpồl cau, kwang bàng, kông chức, tơl nă làng bol bơh ƀòn làng bol ơm kis pà nàng prap gàr mờ geh broă rơndap lơh nàng ràng tơlik”.

Tàm dơ̆ tơngkah kir sơnrai 134 nam ngai deh Củ tịc Hồ Chí Minh ngai 19/5 pa do, Mpồl lơh kơnòl broă sùm Thị ủy ƀòn drà dờng Buôn Hồ neh bơyai lơh pơrjum mìng dùl tơngume “Sòl is, tam gơl is tàm broă prap gàr mờ ngui niam bơta niam chài ală kòn cau tàm ƀòn drà dờng”. Tàm pơrjum do, kwang đơng lam bồ ƀòn drà dờng neh jờng rơ mờ jàu sră cơng tàng ai ală mpồl bal, mpồl cau mờ cau dồ nă să in neh pà phan. Mò Nguyễn Thị Thu Nguyệt, Ƀí thư Thị ủy ƀòn drà dờng Buôn Hồ đơs nền: “Nam 2024 do, ƀòn drà dờng neh bơyai lơh pơrjum “Sòl is, tam gơl is” tàm broă prap gàr, ngui niam bơta niam chài kòn cau tàm ƀòn drà dờng. Đảng ƀộ neh geh Jơnau lơh nền tàm pơrjum mìng dùl tơngume ngan ngồn, hòi jà tă pơgồp priă jền nàng bơtàu tơnguh ƀòn drà dờng, lơh phan bơna, ală broă lơh niam chài. Bơh hơ̆, kơnòl bơh ală mpồl lơh broă Đảng, bơh ală đảng viên dê geh tơnguh loh làng ngan, bal mờ uă broă lơh ngan ngồn”.

Hìu ràng tơlik bơh ƀòn K’Li A dê rơp ngan ngồn pờ mpồng wă nac lòt sền tàm nhai 11 tus do, di tàm dơ̆ Dăk Lăk bơyai lơh tơngkah 120 nam ngai crơng gơs càr. Ală broă lơh geh cồng nha ngan ngồn, lơh jat jơnau kờñ, bơta kơp kờñ dipal bơh ală rơnàng làng bol dê neh mờ gam lơh gơ rề tus tơl ƀòn ơm kis ală kòn cau. Đảng ƀộ, gơnoar atbồ ƀòn drà dờng lơh ngan mờ jơnau kờñ: nam 2025, Buôn Hồ rơp gơ gơs tiah drà khà 3 – dùl tiah drà “Pas sơm, niam bơnĕ, gơguh jak, brê bơnơm, đềt mềr”.