Bơh àng drim gờñ, Anih ơhò ơm pơn diang phan Phan Thiết neh gal ngan cau. Ală ơhò lơh sa, rơkì geh bơka niam mờ bồng bi uă dà, gùng dà broă lơh mùl màl, cing, sơngơr; ală cau lơh ka dờng sơnam soh tàm să ào kăp, pơn chèo tơrgùm nàng rơcang lơh yàng wă rò. Di tàm tŭ 7 jơ, mpồl ơhò lik bơh anih ơhò ơm, lòt tus Hòn Lao lơh jăt broă lơh yàng ờs mờng, tơnơ̆ mờ hơ̆ rê wơl tềng mpồng Cồn Chà. Bơh tŭ do, git nđờ rơhiang năc cau pơn jăt tai lòt jơng gan ală gơl gùng jăt gah dà dờng Cà Ty, lài mờ tŭ rê tus Dinh Vạn Thủy Tú lơh gơs broă lơh yàng.

Lơh yàng wă rò Ồng Sanh pơgồp bal mờ pin dờn duh khoai yàng Nam Hải, ha là ka Rơwas bơh cau lơh ka kis jăt gah dà lềng dê. Bơh broă lơh yàng, cau lơh ka răc dan dà lơgar pas gơs, làng bol pràn kơl dang, dà lềng niam, kàl niam, ơhò, plung lik lòt tàm dà lềng niam lơngăp lơngai, lơh ka ƀuơn. Ồng Phạm Triều, cau lơh ka neh rơlao 45 nam kis đềt mềr mờ dà lềng pà git: “Lơh yàng do geh kwơ màng ngan gơwèt mờ cau lòt lơh ka bol añ dê, là bơhiàn bơh rài yau tus tŭ do. Tus tŭ do Lơh yàng Răc dan lòt lơh ka, làng bol răc dan kờñ dà lơgar pas gơs, làng bol pràn kơl dang, lơngăp lơngai, lơh sa kơl jăp, lòt dà lềng lơngăp lơngai, lơh geh uă ka mờ tìp uă bơta bơtoah”.

Bal mờ broă lơh yàng wă rò, bơnah lơh yàng Dinh Vạn Thủy Tú gam geh broă lơh yàng duh khoai yal mờ yàng, duh khoai ală cau neh geh dà kơl hề mờ ƀòn lơgar, pơdơng phan yàng in, lơh yàng tơn jơh mờ lơh yàng pơrđồng gŭ ồs tàm dà dờng Cà Ty. Bơnah lơh chờ geh đơs bả trạo, đơs bội, đơs bài chòi, tamya nggrài, triă, nhơl jơnau nhơl ờs mờng, đơs crih tàm gùng drà, ràng tơlik phan kă brobal mờ phan sa krơi is Phan Thiết dê. Bơh tŭ hơ̆, làng bol bal mờ cau năc geh tai dơ̆ nàng jòi sền nàng git bè rài kis, nùs nhơm pin dờn bal mờ bơta niam chài bơh làng bol kis tàm tiah dà lềng dê.

Ồng Đào Quang Thanh, Phó Chủ tịch Anih duh broă Làng bol sơnah ƀòn Phan Thiết đơs là, broă prăp gàr lơh chờ pal ai mpồl bơtiàn cau lơh ka tàm bơta tờm, mờ pơgồp bal mờ lòt nhơl: “Bơta kwơ màng ngan là lơh chờ pal geh bơyai lơh tàm tơngu me git jơnau bal tus mờ bơhiàn ờs mờng, broă lơh yàng ờs mờng nàng geh bơh mpồl bơtiàn cau lơh ka dê lơh tờm. broă pơgồp bal lơh chờ mờ lòt nhơl kung geh lơh geh bơta rơwah, gàr niam nàng yal bơta niam chài krơi is dà lềng Phan Thiết dê, mờ ờ lơh roh bơta niam bơnĕ mờ bơta kwơ bè ờs bơh broă lơh chờ dê”.

Tàm bơta bơtàu tơnguh tiah drà dê, broă lơh drơng ala mờ lòt nhơl dà lềng càr Lâm Đồng dê, ală tiah tras ka, Dinh Vạn Thủy Tú, săp drao bả trạo mờ mpồl wă rò tàm dà dờng Cà Ty kung gam nting bơto bè bơta nền nòn bơh niam chài Phan Thiết dê. Lơh chờ Răc dan lòt lơh sa tài bè hơ̆ ờ mìng prăp gàr nùs nhơm pin dờn bơh cau lơh ka dê lài mờ pah dơ̆ lòt lơh ka tàm dà lềng, mờ gam pơn jăt tai prăp gàr bơta tờm huềng tiah dà lềng dê, nàng ală bơta kwơ hơ̆ geh bơto pơlam, lơh geh uă mờ pơgồp bal tàm broă lơh geh uă rơlao tai bơta niam chài bơh càr Lâm Đồng dê tàm bơta bơtàu tơnguh pa.