Bơh dùl bơta plai chi bơkah tiơng pơn rơ, sầu riêng Dăk Lăk gam geh ală cau trŭ gơm phan sa lơh tơrlòng lài mờ uă bơta chài trŭ gơm krơi is, lơh gơs ală phan sa drơng jơnau kờñ sền git phan sa. Tàm dơ̆ lơh chờ Phan sa sầu riêng Dăk Lăk nam 2026, 102 phan sa pơgồp bal mờ sầu riêng pa geh dờp là uă ngan rơlao jơh, dờng ngan rơlao jơh Việt Nam.

Dơ̆ lơh chờ phan sa sầu riêng Dăk Lăk nam 2026 geh lơh bơh ngai 15/8 tus ngai 23/8 tàm ƀlàng Rơndap broă lơh Eco Palace, sơnah ƀòn Buôn Ma Thuột mờ mờr 200 anih ràng phan, geh ală phan sa bơh sầu riêng mờ ală phan sa tiơng pơn rơ ndai càr Dăk Lăk dê. Tàm dơ̆ sơn đờm mut lơh Dơ̆ lơh chờ phan sa drim ngai 16/8, mpồl bơyai lơh jàu khà jờng dơ̆ pơrlòng, jàu sră cơng tàng dờp dờng ngan rlau jơh, uă ngan rơlao jơh Việt Nam gơ wèt mờ 102 phan sa bơkah krơi is pơgồp bal mờ sầu riêng Dăk Lăk mờ jàu sră cơng tàng ală cau trŭ gơm phan sa tus bal in. Jat Mpồl bơyai lơh, broă lơh gơlik 102 phan sa ờ mìng nàng kờñ lơh gơlik bơta tờm ai dơ̆ lơh chờ in mờ gam wèt tus ngui uă rlau tai bơta kuơ sầu riêng dê, rơhời lơh gơs ală phan sa gơtùi drơng lòt nhơl, broă drơng ala mờ lơh mờ măi mok lơh gơlik phan.