Ơi, ơ mò Nguyễn Thụy Phương Hiếu, lòt nhơl tàm càr Dăk Lăk cèng uă rài kis niam chài ală jơi bơtiàn, sền dờng màng brê bơnơm geh is, wèt tus bơtàu tơngguh kơ̆ kơl jăp. Bơta do lơh geh bơh ală pơlam gùng bơtàu tơngguh bơh càr dê bè lơi, ơ mò?

Mò Nguyễn Thụy Phương Hiếu: Dăk Lăk neh gĭt nền bơta pràn bơh he dê là bơtàu tơngguh lòt nhơl ƀòn brê bơnơm mờ niam chài. Bal mờ 49 jơi bơtiàn ơm kis bal kung là dùl bơta pràn lơh gơlik geh bơta ƀươn tàm pơndrờm ai càr Dăk Lăk mờ ală tiah ndai, lơh gơlik geh uă phan bơna rlau nàng gơhòi gơ jà năc tus mờ càr.

Tỉñ ủy càr neh ai lơh jăt Ală jơnau neh lơh nền bè bơtàu tơngguh lòt nhơl, do là bơnàng jă nàng ală gah, ală tiah tơrgùm lam lơh bơtàu tơngguh 03 broă lơh tờm, bè lòt nhơl, geh ală tiah: ƀòn dờng Buôn Ma Thuột, Lăk mờ Buôn Đôn. Ală kơnhoàl, ƀòn drà dờng gùt dar rơ̆p là ală tiah gùt dar dong kờl, lơh ală broă, ală tiah dơ̆ lòt nhơl.

Dăk Lăk gơ ơm tàm ù tiah niam chài cing mồng Tây Nguyên, den kung hơ mờ UNESCO bè prăp gàr cing mồng. Tàm tơngai bơh nam 2021- 2025, càr neh ai lơh jăt uă jơnau lơh nền tàm pơrjum bè cing mồng, jơnau lơh nền tàm pơrjum bè dong kờl làng bol ală thôn, ƀòn bơtàu tơngguh lòt nhơl mpồl bơtiàn. Tơrgùm ală priă jền, ală rơndăp broă lơh, broă dong kờl bơtàu tơngguh lơh sa tiah làng bol jơi bơtiàn dồ êt nă cau, lơh bơtàu tơnggu geh broă tờm bè lòt nhơl nàng prăp gàr niam chài, mơkung bơtàu tơngguh phan bơna lòt nhơl.

 Tơngai lài, den broă bơtàu tơngguh lòt nhơl jăt pơlam gùng do geh cồng nha bè lơi, ơ mò?

Mò Nguyễn Thụy Phương Hiếu: Pah nam den pràn gơguh tai bè lòt nhơl, jơh bal priă lơh geh bơh lòt nhơl mờ năc lòt nhơl ndrờm gơguh sơrlèt pơgăp bơh 10 tus 15%, geh bal năc tàm dơlam mờ năc ală lơgar. Bulah sơrlèt 2 nam kòp Kovid- 19 lơh bơtờp, mơya pràn gơguh tai tơngai bơh nam 2021- 2025 sơrlèt pơndrờm mờ broă rơndăp lơh neh jàu.

 Bơtàu tơngguh lòt nhơl ƀòn brê bơnơm mờ niam chài jăt tàm bơta pràn geh lài, tàm tŭ uă càr, ƀòn dờng ndai kung gam lơh jăt gùng dà do, bè hơ̆ càr Dăk Lăk lơh bè lơi nàng yal tơnggĭt geh ală bơhiàn niam chài krơi is bơh tiah he dê ai năc lòt nhơl in, ơ mò?

Mò Nguyễn Thụy Phương Hiếu:  Tàm pơlam gùng bơtàu tơngguh lòt nhơl càr dê gơ tơlik uă broă lơh bal, lơh broă bal mờ ală tiah, den càr tơrgùm rwah ală tiah geh bơta pràn lòt nhơl mờ geh gùng par tàm tơrbŏ mờ càr Dăk Lăk. Tŭ do, càr neh lơh broă bal mờ 14 càr, ƀòn dờng mờ dồ tơrgùm mpồl tàm tiah lơh sa mờ măy mŏk tàm ƀòn dờng Hồ Chí Minh. Ngan tài bơh geh lơh broă bal, lơh bal den tàng tàm ală broă lơh hòi jà yal tơnggĭt den lơh bal ală broă lơh tơrgùm ngui niam bơta pràn bơh dà lềng mờ brê dê. Gơ wèt mờ drà năc lòt nhơl ală lơgar den bơh ală anih tờm lơh kòn gùng bè Khánh Hoà, Hà Nội, ƀòn dờng Hồ Chí Minh nàng gơhòi gơ jà năc lòt nhơl tus mờ càr. Rơcăng lài tàm tơrbŏ, tus bal ală broă lơh cribơyai broă mờ lơgar ndai nàng yal tơnggĭt rùp hin, bơta pràn bè niam chài, kòn bơnus Dăk Lăk ai ală tiah in.

 Ơi, ơ mò, bè mò pa yal den ngui niam bơta pràn tơl tiah, tàm tơrbŏ bal dà lềng mờ brê nàng tàm bơtơl ai gơ̆p in là broă mờ càr Dăk Lăk lơh bal ai tơl bơta bơtàu tơngguh lòt nhơl in. Bè is, tàm dơlam is càr Dăk Lăk rơ̆p tơngguh uă broă lơh lòt nhơl bè lơi nàng gơhòi gơ jà mờ gàr jơng năc lòt nhơl, ơ mò?

Mò Nguyễn Thụy Phương Hiếu: Sở kung pơlam gùng ai ală mpồl lơh sa kă bro in rơcăng lài lơh phan bơna pa jăt tàm bơta tờm niam chài nàng lơh gơlik bơta pa ngan, krơi is ngan. Tơngguh uă bơta niam bè ătbồ dà lơgar, lam bơbo bơtê, bơto pơlam ai mpồl cau lơh broă tàm ƀòn lơgar in, lơh geh jơnau kờñ ngai sơlơ uă bơh năc lòt nhơl dê. Lơh pràn broă lơh bơh tơrgùm mpồl lòt nhơl dê, lơh ală mpồl gah broă lơh gơ wèt tơrgùm mpồl, ngui niam bơta pràn bơh broă ndai dê, bơh ală broă lơh niam chài, lòt nhơl halà ală dơ̆ pơrlòng tàp pràn să jan mờ càr Dăk Lăk drơng lơh nàng gơhòi gơ jà năc tus mờ càr.

Tàm nhai 10 do, Sở rơ̆p tă pơgồp jơnau đơs ai Anih duh broă Làng bol càr in drơng lơh pơrjum sền wơl ală broă lơh bal lơh broă bal, jăt tàm bơta hơ̆ rơ̆p geh broă rơndăp lơh lơh broă bal tàm tơngai pa lơh geh cồng nha rlau. Mờ tơrgùm mpồl lòt nhơl càr Dăk Lăk kung tơlik măt tai 2 mpồl tai, là mpồl Hìu năc- phan sa mờ mpồl lòt nhơl gùng ngài, ngui niam bơta pràn bơtàu tơngguh lòt nhơl tàm tiah he dê.

 Ơi, dan ưn ngài mò Nguyễn Thụy Phương Hiếu, Phó Kwang ătbồ Sở Niam chài, Tàp pràn să jan mờ Lòt nhơl càr Dăk Lăk.