Phó Thủ tướng Cíñ phủ ồng Lê Thành Long bal mờ uă kwang đơng lam bồ ală Ƀộ, gah broă mờ ƀòn dờng Hải Phòng tus bal dơ̆ sơnđờm mut lơh.

Đơs tàm dơ̆ sơnđờm mut lơh, Ƀộ trưởng Ƀộ Bơto bơtê mờ Bơsram ồng Nguyễn Kim Sơn pà gĭt, sơrlèt gan rlau 40 nam lơh geh mờ bơtàu tơnguh, dơ̆ tàm pơrlòng tàp pràn să jan kơnờm bơsram gùt lơgar dơ̆ X là dơ̆ tàm pơrlòng tàp pràn să jan tàm hìu bơsram dờng ngan rlau jơh bơh lài tus tŭ do, tŭ geh rlau 20 rơbô nă cau tus bal pơrlòng tàm 63 càr, ƀòn dờng tus bal. Do là broă lơh kwơ màng, là tiah tơrgùm wơl mờ tơrgùm uă ngan rlau jơh bơh srơh tàp pràn să jan, tơnguh uă bơta pràn să jan ai kơnòm bơsram pe kấp dê; mơkung là tŭ tơngai niam nàng tàm pơrlòng ai ală cau geh bơta chài tàp pràn să jan tàm kơnòm bơsram gùt lơgar dê.