Ngan ngồn sơnđờm mut lơh bơh ngai 28/08 mờ jŏ jòng tus jơh ngai 5/09 tàm Hà Nội, Ràng tơlik Cồng nha lơh geh Dà lơgar dê 80 nam gùng lòt Lơngăp lơngai is, Khat gơboh, Gơboh gơbài yal tơngĭt cồng nha lơh geh bơh Dà lơgar dê tàm uă gah broă. Ồng Tạ Quang Đông, Thứ trưởng Ƀộ Niam chài, Tàp pràn să jan mờ Lòt nhơl đơs sùm:“Do là dùl dơ̆ ràng tơlik mờ bol he yal tơngĭt uă geh uă ngan bè rùp hin kòn bơnus, dà lơgar Việt Nam, ală cồng nha lơh geh bơh Việt Nam dê gơwèt mờ gơ̆p bơyô tàm dunia, gơwèt mờ làng bol tàm lơgar tàm ngai 2/09 do. Do là dùl tiah tơrgùm bal, dùl tiah tus rơ̆p gơ hòi gơ jà mpồl uă ngan làng bol càr lơgar ală càr, ƀòn dờng rê tàm do sền dơ̆ ràng tơlik mờ bơh do rơ̆p là bơta gơ rề uă cồng nha lơh geh bơh Dà lơgar bol he dê”.

Tus bal dơ̆ ràng tơlik là 34 anih ràng tơlik niam ngan, cèng bơta pơn rơ is bơh 34 càr, ƀòn dờng mờ ală mpồl, ƀộ, gah broă Dà lơgar. Dùl tàm ală tiah tờm bơh dơ̆ ràng tơlik dê là ù tiah ràng tơlik phan tam lơh ling klàng dê, tơngŏ bơta dờng pràn bơh ling klàng làng bol Việt Nam dê. Thiếu tướng ồng Tống Văn Thanh, Phó Kwang lam bồ Kụk Tuyên huấn, Tổng kụk Cíñ trị Ling klàng làng bol Việt Nam yal:“Tàm do bol añ ngui ală măi mok tàm ràng tơlik yal tơngĭt bơhiàn ờs mờng mờ tơngai pa tŭ do, is ồn là kung geh rơndăp tiah sền gĭt bơh năc tus sền, tiah sền gĭt do kung là dùl tiah gơ kờñ ngan. Dơ̆ 2 là tus bal ràng tơlik tàm tiah bơdìh mờ tơngume “Đào mờ nha kơryan” mờ bă ù ơnàng mờ mpồl bơyai lơh ai rlau 2 lồ. Tàm do bol añ rơndăp uă phan bơna sền gàr Dà lơgar, ală bơta phan tam lơh, phan bơna pa rcang pa ngan bơh ală mpồl ling, mpồl lơh sa kă bro sền gàr Dà lơgar kơlôi sơnơng mờ bơtàu tơnguh”.

Tàm Anih tờm Sră ƀăo Ràng tơlik “Cồng nha lơh geh dà lơgar dê 80 nam gùng lòt Lơngăp lơngai is- Khat gơboh- Gơboh gơbài”, ồng Lê Hải Bình, Thứ trưởng Duh broă sùm Ƀộ Niam chài, Tàp pràn să jan mờ Lòt nhơl pà gĭt: “Anih tờm sră ƀăo là tiah rơ̆p ai ală broă drơng nàng drơng niam ngan rlau jơh ai broă lơh lơh broă bơh ală cau lơh ƀăo tàm lơgar mờ lơgar bơdìh in, kung bè bơsong ală jơnau sồr tàm broă lơh lơh broă bơh ală cau lơh ƀăo dê. Mờ jơnau kờñ bè hơ̆, bol añ rơ̆p lơh geh ală bơta ƀuơn ngan ai ală cau lơh ƀăo tàm lơgar mờ lơgar bơdìh in yal bè dơ̆ Ràng tơlik kung bè ală cau lơh ƀăo kung rơ̆p dờp geh jơnau yal gờñ  ngan rlau jơh bơh ală broă lơh Ràng tơlik dê”.

 Tàm do kung geh bơyai lơh ală broă lơh đơs crih tam ya, cribơyai, pơrjum bơyai, tìp mat lơh kwèng, sền gĭt li la uă ngan. Ràng tơlik ờ mìng là broă lơh cíñ trị - niam chài kwơ màng lơm mờ gam pơgồp bơnah lơh gơ rề uă nùs nhơm jơi bơtiàn, lơh kah wơl bơta kơ̆p kờñ bơt bơtàu Dà lơgar dờng pràn. Do kung là bơta tờm tàm ală broă lơh gờm chờ Kăc màng nhai 8  mờ Sơntờm Dà lơgar 2/09.