Tàm tơngume tìp mat lơh kwèng đah sỹ quan kơnòm să Mpồl ling sền gàr tiah nhàr lơgar Việt Nam mờ sỹ quan kơnòm să Kwang àng lơgar Lào, tàm Hìu niam chài Lơh bơyô bal Việt Nam- Lào mờ Campuchia tàm thôn Tà Ka, xã tiah nhàr lơgar Pờ Y, kơnhoàl Ngọc Hồi, càr Kon Tum geh bơyai lơh uă broă lơh geh kwơ, ngan ngồn sơlơ tam klăc bal đah sỹ quan kơnòm să 2 lơgar dê.

Tàm do ală sỹ quan kơnòm să Việt Nam mờ Lào bơyai lơh pơrjum mblàng yal, yal tơngĭt adat boh lam ai làng bol tàm tiah nhàr lơgar 2 lơgar dê. Ală sỹ quan kơnòm să Việt Nam mờ Lào kung jàu priă bơsram “Dong kờl kơnòm lòt bơsram” ai 40 nă kơnòm bơsram, tàm hơ̆ geh 20 nă kơnòm bơsram Việt Nam mờ 20 nă kơnòm bơsram lơgar Lào geh rài kis kal ke; tam bal gĭt nđờ rơhiang tờm chi lơh bơyô bal tàm ƀlàng Hìu niam chài dê nàng lơh tềl broă lơh mờ lơh geh tai ù tiah ơm kis niam.