Gĭt wă jrô bồ tơngoh Hồ Chí Minh dê, gĭt wă uă ngan bè tiah, gơnoar kwơ màng bơh niam chài: “là hwềng tờm bơh jơi bơtiàn dê”, “Niam chài gam den jơi bơtiàn gam”, Tổng Ƀí thư ồng Nguyễn Phú Trọng neh lời uă ngan nùs nhơm bơt bơtàu rài niam chài pa ngan, cèng bềng bơhiàn niam chài niam bơnĕ ngan jơi bơtiàn dê, ngan ngồn là bơnàng jă nùs nhơm bơh mpồl bơtiàn, là bơta pràn tàm dơlam is, bơta gơn kơnờm kwơ màng nàng bơtàu tơnguh Dà lơgar. 

Tŭ đơng lam pơrjum gùt lơgar bơsram, lam lơh jat Jơnau lơh nền tàm pơrjum sồ 23 bơh Ƀộ Cíñ trị dê bè Gùng dà broă lơh bơtàu tơnguh lơh sa - mpồl bơtiàn, sền gàr lơngăp lơngai Dà lơgar, lơngăp lơngai tiah Tây Nguyên tus nam 2030, rơndăp broă tus nam 2045, Tổng Ƀí thư ồng Nguyễn Phú Trọng neh đơs sùm tơngume do: "Bơt bơtàu rài niam chài Tây Nguyên gơguh jak cèng bềng bơhiàn niam chài jơi bơtiàn, tơrgùm dùl tàm li la uă ngan. Sền dờng màng ală bơta kwơ niam chài krơi is đah ală jơi bơtiàn, sền do là bơta gơn kơnờm bơnàng jă ai bơtàu tơnguh mờ mut gơ rờm bal ală lơgar. Lài ngan sền gàr, prap gàr, lơh niam wơl mờ ngui niam ală bơta kwơ phan lời wơl niam chài, bơta kwơ bơh yau, bơhiàn niam chài niam bơnĕ bơh ală jơi bơtiàn dồ ết nă cau, ngan là ală dơ̆ lơh chờ bơh yau, ù tiah niam chài cing mồng Tây Nguyên. Añ kờñ đơs uă ngan là bơta niam chài. Đơs tus Tây Nguyên bol he geh bơhiàn niam chài, niam bơnĕ is ngan, ală kwang bàng pơnđơl pràn lơh ngan gơtùi lơh geh halà ờ? Do ờ mìng là niam chài nhơl lơh pơrài bồ tơngoh lơm, do là prap gàr niam chài niam bơnĕ jơi bơtiàn, mờ do kung là gah mờ bol he in lơh sa tàm tơngai pa tŭ do là gơ kờñ uă ngan”.

Kah wơl 13 nam rê wơl hơ hờ ndo, tŭ Tổng Ƀí thư ồngNguyễn Phú Trọng tus còp kơnhoàl Mường Lát, càr Thanh Hóa, ồng Lầu Minh Pó, lài do là Phó Ƀí thư Huyện ủy kơnhoàl Mường Lát kung geh iăt ală jơnau nting tơngkah bơh Wa dê bè tơn jơh ală bơhiàn yau bơrngơl gơla mờ prap gàr bơhiàn niam chài niam bơnĕ jơi bơtiàn dê. Tŭ do làng bol kòn cau Mông tàm kơnhoàl Mường Lát neh tơn jơh gơtùi bơhiàn yau cau chơ̆t ờ ơn tàm gơbăng mờ ngui niam geh ală niam chài bơh yau dê. Ồng Lầu Minh Pó, đơs: "Bơhiàn niam chài tŭ lòt tus tàm do Wa đơs là bulah bè lơi den jơi bơtiàn lơi kung pal prap gàr niam chài bơh jơi bơtiàn hơ̆ dê, den tàng bè hơ̆ kòn cau Mông tŭ do kung gam prap gàr niam bơhiàn niam chài, ngan là đơs tàm dơ̆ ñô bau. Kòn ùr ntào dờng lòt bau pal tơryang tơryồng, hơ̆ là niam chài bơh kòn cau Mông. Dùl bơta tai hơ̆ là uh kơwào, uh rơkèl, den kơwào sơndồi bơh kòn cau Mông dê gam pơn đơl pràn lơh ngan lơh niam wơl”.

Bi Đinh Ply, kòn cau Bahnar tus bơh càr Gia Lai gam ơm kis tàm hìu ơm bal 54 jơi bơtiàn (ơm tàm Ƀòn niam chài Lòt nhơl ală jơi bơtiàn Việt Nam, Đông Mô- Sơn Tây- Hà Nội), prap lời wơl kir sơnrai bè jơnau nting tơngkah bơh Tổng Ƀí thư dê bè prap gàr niam chài:"Wa neh đơs bè prap gàr mờ ngui niam prap gàr niam chài bơh yau jơi bơtiàn bơh Việt Nam đơs bal kung bè ală jơi bơtiàn dồ ết nă cau dê lơh bè lơi nàng tam klăc bal, bal mờ gơ̆p tam klăc bal, bal mờ gơ̆p bơt bơtàu ƀòn lơgar sơlơ bơtàu tơnguh, dong kờl bal nàng bơtàu tơnguh lơh sa, kung bè là dong kờl bal mờ gơ̆p, bơsram bal mờ gơ̆p bè niam chài. Ngui niam gơnoar broă hơ̆ den añ pơn đơl pràn lơh ngan cih dờp nàng prap gàr jat jơnau sồr bơh Wa dê, kung neh nting tơngkah kung bè pa do neh lòt dờp pang sră bơh Wa dê, neh pơyoa pà ai làng bol ală jơi bơtiàn in. Pang sră ngoh rơngăc ngan, jơnau Wa dê cih wơl nàng prap gàr, sền gàr bơta niam chài ală jơi bơtiàn Việt Nam kung bè là jơi bơtiàn kòn cau Bahnar gam ngui niam prap gàr tàm ƀòn Niam chài đơs bal, niam ngan mờ geh uă bơta kwơ kwơ màng ngan gơwèt mờ jơi bơtiàn Việt Nam bol he dê”.

 Tàm Pơrjum Niam chài gùt lơgar nam 2021, Tổng Ƀí thư ồng Nguyễn Phú Trọng đơs sùm: “Niam chài là bơhiàn niam chài bơh jơi bơtiàn dê, niam chài gam den jơi bơtiàn gam, niam chài roh den jơi bơtiàn roh”. Jơnau đơs cèng bơta kwơ tờm ngan do neh mờ gam cèng wơl rài kis pa, muh mat pa tàm ală tiah sar lơgar ngài bơh Dà lơgar dê. Rlau mờ hơ̆, bơhiàn niam chài ală jơi bơtiàn geh prap gàr, ngui niam neh sơlơ lơh geh “bơta pràn tai” nàng tơn jơh bơhiàn yau bơrngơl gơla, tơn jơh jơgloh, bơrngơl gơla, lơh kah wơl ală kơnhoàl ù tiah, wèt tus dùl rài tơnơ̆ do àng niam rlau tai.