Poh Niam chài – Lòt nhơl Gia Lai nam 2023 geh bơyai lơh bơh ngai 11 tus 19 nhai 11 tàm ƀòn dờng Pleiku, kơnhoàl Chư Păh mờ kơnhoàl Ia Grai, càr Gia Lai, tàm hơ̆ geh ală broă lơh: Sơn đờm Poh Niam chài – Lòt nhơl Gia Lai nam 2023; Pơrlòng ai tơngŏ bơta niam chài cing mồng càr Gia Lai nam 2023 mờ broă tus bal bơh mờr 1 rơbô nă cau chài tus bơh 5 càr tàm Tây Nguyên.

Drà ràng tơlik kă bro mờ yal phan geh lơh bơh suơn sre krơi is càr Gia Lai dê; Poh Bơkào quỳ-Bơnơm ồs Chư Đang Ya nam 2023; Pơrlòng ntoăt “Gia Lai city trail 2023 – Jơnau kơ̆p kờñ brê bơnơm”; Pơrlòng was plung độc mộk tàm dà dờng Pô Kô pơrlòng cúp A Sanh mờ Pơrlòng dròng cing mồng kơnhoàl Ia Grai; pơrlòng soh phan ờs mờng, pơrlòng tamya… Poh Niam chài – Lòt nhơl Gia Lai nam 2023 geh bơyai lơh nàng yal ală bơta kwơ niam chài krơi is, niam bơh càr Gia Lai dê, tàm hơ̆ uă ngan là bơta niam chài cing mồng Tây Nguyên.