Lòt gan git nđờ bơta tam gơl tŭ tơngai dê, hìu kuơ̆ Pô Sah Inư kung gam ntàu song bè dùl cau lơh cơng kah yau, prap gàr wơl ală bơta kuơ niam chài krơi is kòn cau Prum dê tàm ù tiah Bình Thuận yau, tŭ do là càr Lâm Đồng. Tơngai lài, bal mờ broă prap gàr phan lời wơl, ală broă lơh lòt sền niam chài geh bơyai lơh sùm, ngan là tàm ală ngai chờ, ngai sa tềp, tơngai ơm rlô bơkang, neh pơgồp bơnah khồm bơta pràn kis pa ai anih tus Tiah tềl lời wơl hìu kuơ̆ Pô Sah Inư in. Nac lòt nhơl Nguyễn Anh Tuân, tus bơh càr An Giang pà git:

“Añ gŏ nđờ tiah tềl kah yau cau Prum dê niam ngan, kờñ pal prap gàr wơl ală bơta niam chài ai mpồl bơtiàn jơi bơtiàn Việt Nam tơnơ̆ do in bơtàu tơnguh niam bơnĕ”.

Tiah tềl lời wơl Pô Sah Inư là dùl tiah tềl lời wơl bè niam chài lơh hìu đam, pin dờn jat yàng pơn rơ ngan làng bol kòn cau Prum dê gam geh prap gàr wơl ndrờm bè gam bè ờs tơn. Mờ niam chài bơceh lơh hìu đam krơi is, hìu kuơ̆ Pô Sah Inư neh geh sap sèng là tiah tềl lời wơl dà lơgar mờ tŭ do gam là dùl tàm ală anih lòt nhơl gơ kờñ ngan tus mờ nac lòt nhơl tàm lơgar mờ bơdìh lơgar.

Tus ndo, nac lòt nhơl gam geh gơ rờm huềng nùs he dê tàm jơnau tamya Apsara cau Prum dê. Ală jơnau tamya bal mờ jơnau đơs crih, gơ bơrlŭ bal mờ sap ntas ală bơta đờng goòng bơh yau cau Prum dê bè sơng gơr Ghinăng, sơng gơr Paranưng, kơmbuat Saranai.. lơh gơ kờñ ngan nùs nhơm cau dê. Bơdìh hơ̆ tai, nac lòt nhơl gam geh sền broă mòn phan ù buh, broă tàñ ồi kòn cau bơh yau cau Prum dê. Ồng Bá Sinh Tý - mpồl đơs crih tamya kòn cau Prum tàm Pô Sah Inư pà git:

“Mpồl đơs crih tamya kòn cau Prum drơng broă tàm do neh jŏ ngan rau. Añ drơng broă đơs crih tamya mờ nhơl bơrlŭ bal đờng goòng kòn cau Prum, nac lòt nhơl kờñ ngan mờ chờ ngan. Tŭ guh tàm hìu kuơ̆, nac kờñ ngan sền ală jơnau đơs crih tamya kòn cau Prum dê”.

Bal mờ broă lơh prap gàr tiah tềl lời wơl, ală nam rềp ndo, Mpồl atbồ Tiah tềl lời wơl hìu kuơ̆ Pô Sah Inư neh sền gròi tus broă tơnguh bơta niam drơng broă mờ lơh li la ală broă lơh sền git lời ai nac lòt nhơl in. Bi Châu Thị Cẩm Tú, nac lòt nhơl tus bơh càr Vĩnh Long đơs:

“Añ gŏ gơ lơh ring lơngai, ngềt ngơt mờ bềng lìu bơta niam gah huềng. Añ gŏ nhơm kis kung bè kòn bơnus tàm do sơrmah sơrmài ngan, kờñ ngan nac, gơ tàm sòr ngan. Să tờm añ mờ jơh hìu bơnhă ki ngàm ngan, geh sền git bơta hơ̆”.

Broă pơgồp bal đah lòt sền, jòi git kah yau mờ sền niam chài đơs crih tamya ờs mờng neh pơgồp bơnah lơh gơs phan lòt nhơl cèng bơta niam krơi is. Mpồl hìu kuơ̆ Pô Sah Inư yô yau, ndu gơn rơh gam là anih tus cèng tềl lời wơl kah yau, niam chài mờ pin dờn mpồl bơtiàn cau Prum tàm ù tiah Lâm Đồng dê, ngai sơlơ gơ hòi gơ jà gal ngan nac lòt nhơl tus trăng sền.