VOV4.K’ho – Sền gàr kơ\ dà lơgar, sền gàr kơ\ tiah kis ngap lơngai, kơ\ kơljap là dùl tàm ală tơngume bơh pơrjum dờng Đảng dơ\ 12. Do kung là tơngume geh kuang bàng, cau geh Đảng mờ làng bol sền gròi, pơyua uă bơta kơp kờ` lài mờ pơrjum:

Dùl tàm ală cồng nha geh pơn rơ, kuơ màng, gơ glòm jơh tàm 30 nam mut lơh gùng dà broă lơh tam gơl tềng đap bơta đơng lam bồ bơh Đảng dê là sền gàr kơ\ ngap lơngai is gơnoar tờm, ringbal, tơl làm ù tiah, sền gàr kơ\ tiah kis ngap lơngai, lơh geh ală bơta [uơn nàng dà lơgar bơtàu tơnguh mhar, tơl làm mờ kơ\ kơljap. Tàm bơta tu\ do, tu\ dunia mờ kơnhoàl gam pơhìn uă bơta aniai tus ngap lơngai, rlau mờ tu\ lơi jơh, bơta sền gàr kơ\ dà lơgar, sền gàr kơ\ tiah kis ngap lơngai kơ\ kơljap pal geh sền gròi mờ do kung là bơta kơp kờ` bơh gùt làng bol dê. Ringbal uă mờ bơta bơh pơrjum dờng Đảng dơ\ 12, ai tơngume sền gàr kơ\ dà lơgar, sền gàr kơ\ tiah kis ngap lơngai, kơ\ kơljap là dùl tàm 5 tơngume kuơ màng bơh pơrjum dê. Đại tá Nguyễn Tiến Dũng, kuang jat jơng atbồ hìu sơnơm ling klàng 354 đơs là, kờ` brồ guh cồng nha sền gàr dà lơgar tàm tơngai tus pal bơtàu tơnguh bơta pràn tàm dơlam is mờ bơta pràn bơh bơdìh tơn: “ Bơdìh broă bol he pal sùm sùm at kơ\ `gkơr phàu, pơlam tàp ling klàng, bơtàu tơnguh bơta pràn sền gàr dà lơgar, den 1 broă kuơ màng tai là bol he pal mut lơh niam broă lơh cribơyai mờ lơgar ndai nàng pơgồp bal đah bơta pràn tàm lơgar mờ bơta dong kờl bơh gơp bơyô dunia dê mờ bol he lơh gơs bơta pràn, tàm hơ\ geh mpồl sền gàr, gơnoar, bơngă cribơyai mờ lơgar ndai bol he dê tàm dunia. Bè hơ\ den bulah bol sò tơm jòi kai nàng git bơta ha pah he dê kờ` lơh aniai, kờ` sơ gràm kung pal gơtìp bơta kòl yan kơljap ngan hơ\ là pràn tàm dơlam is bol he dê niam mờ bol he geh mpồl bơtiàn dunia dong kờl.”

Ràng tơlik bơta ờ suk bè ală gơlik geh kal ke tàm dà lềng đah mattơngai lik tàm tơngai pa do, Trung tướng Nguyễn Quốc Thước, kuang đơng lam bồ Quân khu 4 lài do đơs là, tơngai lài bulah sền gàr ngap lơngai dà lơgar geh uă tam gơl mơya pơn drờm mờ jơnau kờ` sền gàr dà lơgar, tơl làm ù tiah, dà lềng den ồng kung gam ờ suk, ngan là broă sền gàr dà lềng, bồt dà lềng. Trung tướng Nguyễn Quốc Thước đơs: “ Kờ` sền gàr dà lềng, bồt dà lềng, jat a` Đảng mờ dà lơgar pal lơh krà` rlau tai. Sền gròi mờ sền gàr kơ\ dà lềng đah mattơngai lik, ờ mìng geh ală ling tàm bồt, mờ gam geh git nđờ tơlak nă cau lơh ka tàm dà lềng. jat a` pal geh 1 rơndap broă kuơ màng tàm dà lềng, geh mpồl đơng lam nàng sền gròi sùm tus gah do.”

Bal mờ hơ\, uă cau đơs là, kờ` sền gàr tơl làm ù tiah, mpồl sền gàr dà lơgar gùt làng bol là kuơ màng ngan. Kuơ màng là sền gàr kơ\ mờ bơtàu tơnguh mpồl rơcang gàr tàm làng bol. Thướng tá Đỗ Xuân Tụng, kuang atbồ mpồl đơng lam Đảng sư đoàn 316, di Quân khu 2 đơs: “ Cau lơi kung git mpồl rơcang gàr gùt làng bol kuơ màng bè lơi, mơua kờ` bơtàu tơnguh geh rơcang gàr gùt làng bol den ờ [uơn. Tài gơ rềng tus bơta rài kis làng bol, bồ tơngoh git wă mờ làng bol lơh tờm. Den tàng a` kung dan mờ Đảng, lài ngan pal sền gròi, đơng lam bồ, chồl pràn rlau tai bơtàu tơnguh lơh sa mpồl bơtiàn, tàm hơ\ sền gròi tàm ală tiah sar lơgar ngài, tiah nhàr lơgar, bồt dà lềng, là ù tiah kuơ màng dà lơgar dê. Pal geh ală broă lơh nàng gàr tơl niam rài kis mpồl bơtiàn, tơn jơh jơgloh, tơmù rơbah, sền gròi làng bol, lơh iang nùs làng bol, sơlơ tơnguh bơta ringbal mpồl bơtiàn nàng bơt bơtàu mpồl rơcang gàr gùt làng bol.”

Dùl bơta tai pal geh đơs tờm bơh bơta geh ngan broă lơh sền gàr mờ bơt bơtàu dà lơgar mpồl bơtiàn ringbal làng bol lơh tờm geh cồng nha là ngai sơlơ gàr kơ\ mờ sơlơ tơnguh bơngă đơng lam bồ tơn bè tơl bơta bơh Đảng dê tus mờ mpồl ling, mờ broă lơh sền gàr dà lơgar – sền gàr ngap lơngai, sền gàr dà lơgar. Bal mờ ală rơndap broă tam gơl pa bè sền gàr dà lơgar tàm rơndap cih sră nggal yal tus pơrjum dơ\ 12 bơh Đảng dê, pin dờn là rài sền gàr dà lơgar gùt làng bol, mpồl sền gàr dà lơgar gùt làng bol, bơta pràn sền gàr dà lơgar – sền gàr ngap lơngai pơnjat tai geh tơnguh, bơta pràn pơgồp bal sền gàr dà lơgar ngai sơlơ geh tơnguh tàm tơngai pa bal mờ ală broă lơh tus do bơh pơrjum Đảng gùt lơgar dơ\ 12.

                                                      Cau cih mờ yal tơngit K’ Duẩn.