VOV4.M’nông – “Ăp ntŭk mô thơ tha, mĭn nchrăp ăp trong mkra rnôk geh srê Covid-19 ta ntŭk”. Aơ nău lah bah Kruanh n’gâng kan dak si Nguyễn Thanh Long ta Rƀŭn nchră pơk sŏng dăng “N’hao trong kan njrăng n’gang srê Covid-19” đah 63 n’gor, nkual ƀon têh ƀư ôi 16/4. Ntoh ngơi ntơm rƀŭn, Kruanh N’gâng kan dak si Nguyễn Thanh Long lah rjăp: Nu nău srê Covid-19 hôm e jêr jŏt ta lam ntŭr neh, nău uănh nđôi srê tâm năm aơ lah ntul rlong têh đah ăp dak n’hanh n’ăp Việt Nam. Tĭng Kruanh n’gâng kan dak si, dak he lĕ rlău 3 rơh srê, tât rnôk aơ lĕ geh 21 nar dak he mô geh nuĭh ntưp Covid-19 tâm ntŭk gŭ rêh, ăp nău kan bah nuĭh ƀon lan bơi plơ̆ tay nâm ơm. Bah ăp rơh srê lĕ rhoăt âk nău blău gay uănh nđôi srê Covid-19. Kruanh n’gâng kan dak si Nguyễn Thanh Long lah rjăp: nkual hô ngăn aƀaơ lah n’har bri Tây Nam n’hanh ăp n’gor Tây Nam Bộ. Yor nê, ăp ntŭk aơ an n’hao uănh nđôi trong n’har bri. N’gâng kan dak si lĕ tâm rgop đah N’gâng kan mât njrăng bri dak ăp rmôt kan hăn kâp njrăng ta n’har bri.

Nŭih rblang: Y Sưng Phê Ja