VOV4.M’nông: Rnơm ƀư ueh nau kan njrăng, rdâng srê Covid-19, Công ty TNHH du ntŭk kan Cà phê 15 tâm Quân khu 5, N’gâng kan neh dak geh ntŭk kan ta xã Cư Dliê Mnông, nkuăl Cư M’gar, n’gor Dak Lak hŏ mât ueh nau kan tăch rgâl ân săk tam đăp mpăn nau rêh ân nŭih pah kan.

Công ty cà phê 15 lah du rmôt kan tahen geh nau kan hun hao văng sa ndrel đăp mpăn rnă njrăng neh dak. Rnôk aơ, ntŭk kan tăm rlau 800 ha cà phê, 300 ha cao su, pă kan pah ân rlau 1.200 nŭih pah kan, tâm nê geh rlau 170 nŭih rnoi mpôl đê̆.

Đah nau kan “tuch tăm, hun hao ndrel đăp mpăn” tâm nau ƀư bar ntil kan, rơh rlau aơ, Công ty 15 hŏ n’hao nau kan ndrel ƀư ân rjăp ăp nau kan, nau njrăng rdâng srê Covid-19, nkre mât nau kan đăp mpăn mpeh tuch tăm. Rmôt kan uănh khlay nau kan nkân njrăng srê tă bah bôk năp. Cán bộ, tahen, công nhân, nŭih pah kan kŏ ƀư tĭng ân ueh nau ntrŭnh mpeh nau njrăng rdâng srê ji, geh ƀư xét nghiệm Covid-19 đah nau test ngăch RT-PCR mro. Ăp ndeh klơ, ndoh ndơ luh ndrel ma lăp tâm ntŭk kan, ngih máy kŏ geh mpuh kman lĕ. Rnơm nê, ăp ngih máy, xí nghiệm, ăp rmôt ƀư mât chăm cà phê mro mât nau ƀư nau kan tuch tăm.

Yuh H’Duân Niê, công nhân ta công ty cà phê 15 nkoch: Nau khuch bah srê nuih Covid-19 ƀư rnăk vâl yuh mâp âk ngăn nau jêr, yơn rmôt kan hŏ năn bonh đă ăp nŭih, kơl an nau đăp mpăn nau rêh ndrel ntĭm ƀư nau njrăng rdâng srê năn ri ma ăp nŭih đăp mpăn ƀư ăp nkô̆ nau kan:

‘Mpeh nau njrăng rdâng srê ri kŏ geh ƀư tŏng ăp 5K. Mpeh công ty kơl an ăp, ăp rnôk mâp nau jêr ri kơl an phe, dak măm, boh gay ma sa ndrel ma kơl an prăk khay gay geh prăk dŏng ngêt sa ăp nar”.

Nô Ma Văn Tân, nŭih pah kan ndơn mât chăm cà phê tâm Công ty Cà phê 15 mbơh:

‘Rnơm đah công ty kơl an nŭih pah kan, tâm yan srê aơ kŏ geh chuh vắc xin gay nŭih pah kan đăp mpăn nau pah kan tâm rmôt kan ndrel tâm boh jŏ jong ma công ty đŏng”.

Đại uý, tahen Nguyễn Thị Thu Ngân, kruanh rmôt 3, mbơh, tât rnôk aơ 100% công nhân bah rmôt kan hŏ geh chuh vắc xin Covid-19 ăp. Rnơm bư ueh nau kan nkoch trêng, cán bộ, công nhân, nŭih pah kan hŏ n’hao nau gĭt mpeh nau njrăng rdâng srê, nsôih mô ân geh srê ntoh tay, ntưp rêng lơh khuch tât nau kan ê nkra, tăch rgâl vah Công ty ndrel nau kan pah bah nŭih pah kan:

‘Đah phung hên, ntơm bah rnôk geh srê ri nau kan geh 100% nŭih pah kan bah rmôt hôm geh mât đăp mpăn. Ndrel nau ueh nâp bah nau njrăng, rdâng srê kŏ geh ntŭk kan rnê lah ƀư dŭt ueh, mô geh nau kan ƀư roh nau đăp mpăn kơp n’ăp ma tâm rnoh nŭih ƀư pah kan tâm lam nkuăl. Nau kan tơm bah rmôt kan hên lah mât chăm ân cà phê ma tâm cà phê ri ân geh ƀư nau kan mât nau nkhah srang đŏng đah ba dih, mô ân geh rgum ri ma nau kan mât chăm cà phê hôm geh ƀư nâm ơm”.

Tĭng Đại tá Phạm Xuân Thảnh, Giám đốc Công ty TNHH Cà phê 15, rnơm ntrŭnh ƀư tâm ban ăp nau kan njrăng, rdâng srê, ngăn lah nau ƀư rjăp nau kan 5K bah n’gâng kan dak si, tât rnôk aơ, Công ty đăp mpăn nau njrăng rdâng srê, mât đăp mpăn nau pah kan, tăch rgâl ân geh săk rnglay:

‘Ăp rmôt kan tâm ntŭk hên, kơt lah Rmôt kan văng sa neh dak, ăp rmôt kan tuch tăm kŏ geh rmôt kan ƀư nau njrăng rdâng srê Covid-19 vay ăp nar mât ân tâm dăch, mât ân nâp tâm nkuăl gay ma geh nau nkoch mbơh tât nau kan njrăng rdâng srê ndrel nau geh bah srê ji tâm nkuăl. Mpeh ntŭk kan ƀư nau kan ri mô geh nau kâp rnơm tâm nau kơl an bah n’gâng kan ba lơ. Đah ntŭk kan ri hôm mât nau kan ê nkra, tăch rgâl du trong ueh ơm. Êng 9 khay bôk năm, phung hên hôm geh nau săk geh văng sa rlau 3 rmen prăk, rlet 1,5 tơ̆ rđil đah nau nchrăp bah năm 2021. Tâm rnôk geh nau jêr ngăn kơt rnôk aơ yơn Đảng uỷ, Ban giám đốc, rmôt kan nŭih pah kan nsôih lôch n’hâm gay ma mât nau kan ê nkra tuch tăm”.

Công ty cà phê 15, Quân khu 5 lah du ntŭk ntoh ang tâm nau ƀư nau dơi bah nau kan bar ntil kan: Nkre njrăng rdâng srê, nkre đăp măpn tâm nau kan ê nkra tăch rgâl, pơk trong ueh ân nau kan ndrel đăp mpăn nau rêh ân nŭih pah kan./.

Nŭih rblang: H’Thi