VOV4.M’nông – Ƀư tĭng ntĭm rđău bah Tập đoàn Điện lực Việt Nam (EVN), tâm 2 khay 7 n’hanh 8/2021, Công ty Điện lực Dak Lak ƀư tĭng n’hŭch mô sŏk prăk điện an bơi 150 rbăn nuĭh ta nkuăl Cư Kuin n’hanh nkual ƀon têh Buôn Ma Thuột, ăp ntŭk an ƀư gŭ srang tâm ƀah kon nuĭh tĭng ntĭm đă 16 bah Chính phủ gay njrăng n’gang srê Covid-19. Tâm rơh 4, Công ty Điện lực Dak Lak ƀư tĭng ntop kơl rlău 12,5 rmen prăk ƀư tĭng n’hŭch rnoh prăk điện, n’hŭch prăk điện an nuĭh dŏng.

Dak Lak: 150 rbăn nuĭh ƀư tĭng gŭ srang tâm ƀah kon nuĭh tĭnh ntĭm đă 16 dơi n’hŭch 12,5 rmen prăk điện

Tĭng nĕ na nê̆ geh: N’hŭch 15% prăk điện (bah năp soay VAT) ta sam ƀŭt prăk điện an nuĭh dŏng tât 200 kWh/khay; n’hŭch 10% prăk điện (bah năp soay VAT) ta sam ƀŭt prăk điện an nuĭh dŏng rlău 200 kWh/khay. Wa Hà Văn Chương-Groi  kruanh Công ty Điện lực Dak Lak an gĭt, ƀư tĭng gŭ srang tâm ƀah kon nuĭh njrăng n’gang srê Covid-19 tĭng ntĭm đă 16 bah Thủ tướng Chính phủ, ăp nuĭh an gŭ ta jay jêng nău ŭch dŏng điện hao âk. Nău n’hŭch prăk điện an nuĭh dŏng lah nău khlay tâm rnôk srê mro mrăng. Ntŭk kan dôl ndăn tâm rgop đah ngih pah kan dơi kan nchih săk nuĭh dŏng gay ntop kơl n’hŭch prăk điện tĭng nău ntrŭnh.

“Công ty điện lực Dak Lak lĕ đă UBND n’gor Dak Lak, nkual ƀon têh Buôn Ma Thuột, nkuăl Cư kuin n’hanh ngih pah kan dơi kan gay uănh năl săk ăp nuĭh dŏng ta 2 ntŭk an ƀư tĭng nkhah êng tĭng ntĭm đă 16 dơi an n’hŭch prăk điện tâm rơh aơ. Rnôk dơi năl săk, mpôl hên mbra ƀư dâl nău n’hŭch prăk điện an rmôt nuĭh dŏng aơ tĭng di nău ntrŭnh tâm khay 7 n’hanh khay 8 năm aơ”.

Nuĭh rblang: Y Sưng Phê Ja