VOV4.M'nông: UBND nkuâl Krông Păk, n'gor Dak Lak hŏ an rlu pah kan du hê kruanh UBND xã Vụ Bổn yor an geh nuh srê Covid-19 ntưp rêng lam ƀon lan. Tĭng nê, wa Trần Văn Sáu, Kruanh UBND xã Vụ Bổn, nkuâl Krông Păk, n'gor Dak Lak geh an rlu pah kan 15 nar, kơp ntơm bah nar 10/8 tât nar 24/8/2021. Nkô̆ tă bah wa Sáu geh UBND nkuâl an rlu pah kan lah yor rđău đă pah kan njrăng n'gang nuh srê Covid-19 mô năn ngăch, an rgum âk nuĭh n'hanh rđău đă an gŭ rgum êng ta jay mô lhăt jăp, an nuh srê ntưp rêng lam ƀon lan. Kơp tât kêng măng nar 10/8, ta xã Vụ Bổn geh 2 tơm nuh srê Covid-19, ta thôn 6 n'hanh thôn 7 đah 19 nuĭh. Tâm nê, êng tơm nuh srê ta thôn 7 lah 16 nuĭh. Rnoh nuĭh ntưp Covid-19 năl geh ta xã Vụ Bổn tâm nar 10/8 hŏ ƀư rnoh nuĭh ji ta nkuâl Krông Păk hao âk ngăch, jêng nkuâl geh rnoh nuĭh ntưp ji Covid-19 âk tâl 3 ta n'gor Dak Lak. Aƀaơ ăp nhih pah kan dơi kan n'gor Dak Lak dôl ƀư mpă wêl, nsrôih ƀoi tĭng, uănh năl mham n'hanh tĭng ƀư ăp trong nkra dak si gay mât kân nuh srê Covid-19 ta xã Vụ Bổn.

Nuĭh rblang: Điểu Thân