VOV4.M’nông - Chính phủ lĕ an Nghị quyết mrô 63/NQ-CP mpeh ăp nău kan, trong mkra ntrôl hao jêng wăng sa, pă prăk ntuh kơl nsum n’hanh tăch n’gluh nâp nâl ăp khay dŭt năm 2021 n’hanh bôk năm 2022. Măng 12/7, nău mbơh bah Hiệp hội Ngân hàng Việt Nam (VNBA) an gĭt geh 16 ngân hàng thương mại lĕ tâm ban ŭch n’hŭch prăk kon an manh ntop kơl doanh nghiệp rlet rlău srê Covid-19. Ăp doanh nghiệp ta n’gor Dak Lak dŭt uănh tât nău aơ, yor aơ lah dơi an khân pơng rlet rlău jêr jŏt, ndâk hao nkra njêng, tăch rgâl.

          Tĭng rnoh kơp bah Ngân hàng ngih dak n’gor Dak Lak: Kơp tât 31/5/2021, ăp rmôt kan an manh ta n’gor geh dĭng lĕ nkah rnon khuch bah srê Covid-19 lah 15.436 rmen prăk. Ta rnôk aơ, ăp rmôt kan an manh lĕ n’hŭch prăk kon manh an 7.892 nuĭh đah nkah rnon lah 6.401 rmen prăk, rnoh prăk kon dơi n’hŭch lah 8 rmen 814 rkeh prăk. Nău ăp ngân hàng n’hŭch prăk kon đah ăp doanh nghiệp, kơl khân pơng n’hŭch oi jêr jŏt. Yơn lah aơ rnoh dŭt đêt, mbrơi mbrơi.

         Kruanh du công ty nkra njêng, tăch rgâl cà phê ta nkuăl Krông Pách, n’gor Dak Lak an gĭt: aƀaơ công ty dôl rnon ngân hàng bơi 50 rmen prăk. Năm 2020 công ty dơi ngân hàng n’hŭch prăk kon. Yơn năm 2021 aơ, prăk kon hôm e mât nâm ơm.

Nuĭh manh ta Dak Lak dôl kâp n’hanh mpŏng ăp rmôt kan an manh n’hŭch prăk kon tĭng ntĭm rđău bah Chính phủ kơt Ngân hàng Ngih dak Việt Nam gay rlet rlău lvang srê aƀaơ

         Wa Nguyễn Hữu Hoàng Dương, Kruanh Công ty xuất nhập khẩu Hoàng Dương Ban Mê an gĭt: aƀaơ công ty dôl rnon ngân hàng 8 rmen 700 rkeh prăk, đah prăk kon 9,9%/năm. 2 năm ma aơ nău nkra njêng tăch rgâl bah công ty geh nsrŭng tă bah srê Covid-19. Ndoh ndơ rmeh mô dơi tăch, tâm rnôk rnoh khlay ndơ nkra njêng lŏ hao, prăk kon hàng mô n’hŭch.

         “Aƀaơ hin doanh nghiệp mô hŏ saơ du ntil ndơ bah ngân hàng ntop kơl an doanh nghiệp. Tâm rnôk srê aơ 2 năm aơ doanh nghiệp dŭt jêr jŏt. Ndoh ndơ ri mô dơi tăch luh bah dih n’gor jêng dŭt jêr jŏt. Mpŏng ngân hàng nta an doanh nghiệp gay doanh nghiệp dơi rdâng rlău yan srê aơ. Mpŏng ngân hàng n’

hŭch prăk kon an công ty, gay công ty trok rnon mbrơi mbrơi n’hanh trok prăk kon jur đêt ri mư dơi rdâng tay”.

         Wa Nguyễn Văn Sanh, Kruanh Hợp tác xã ndơ lŏ mir Thanh Bình, xă Dur Kmăl, nkuăl Krông Ana an gĭt: Yan wai mhe rlău, Hợp tác xã ndơ lŏ mir Thanh Bình lĕ tâm rgop đah Ntŭk gŭ mĭn njêng n’hanh hun hao tơm tăm Việt Nam tiărr nti kỹ thuật nkra njêng phe ndơ sa ntil ba Đài thơm 8 tĭng di VietGAP an kônh wa tăm. Ntrong kan aơ lĕ pơk hvi trong nkra njêng, tuch tăm nsum, uĕh kah. Êng săk wa Sanh lĕ manh nchrăp sam ƀŭt kơp dơn dŏng neh n’hanh drăp ndơ bah rnăk wâl gay manh 3 rmen 400 rkeh prăk ntuh kơl an nkra njêng, tăch rgâl. Tât aƀaơ, wa Sanh kơt ăp nuĭh tâm Hợp tác xã mô hŏ dơi ngân hàng n’hŭch prăk kon.

Agribank mpeh bah lơ Dak Lak lah rmôt kan an manh dôl nsrôih ƀư nău n’hŭch prăk kon n’hanh an manh ăp ndơ manh kơl an ân doanh nghiệp ta Dak Lak geh khuch yor srê Covid-19

         “Aƀaơ dŭt jêr jŏt đah prăk, ngăn lah tơm prăk gay ma rdâng dak bŭk, rdâng duh phang, nkra tay ri dŭt ŭch prăk. Đah hợp tác xã ri geh du đêt nuĭh, ndrel kruanh lĕ an drăp ndơ bah nơm gay nchăm manh prăk bah ngân hàng gay trok prăk điện n’hanh prăk nkra, jêh nĕ prăk nuĭh kan-prăk khay an oh nô. Tât aƀaơ mô geh ngân hàng ntop kơl, kơl an đah prăk kon. Mpŏng, yor nău nuh srê aơ ngân hàng dơi n’hŭch oi an du gâl prăk kon”.

         Nău mbơh mpeh nău 16 ngân hàng thương mại, Hiệp hội Ngân hàng Việt Nam (VNBA) tâm ban ŭch n’hŭch prăk kon an manh ntop kơl doanh nghiệp rlet rlău srê Covid-19. Aơ lah nău ma doanh nghiệp mpŏng kâp, ŭch ngăn./.

                             Nuĭh rblang: Y Sưng Phê Ja