VOV4.Mnông-Nar 28/10, n’gor Dak Lak kơp dơn tay 126 nuĭh ntưp Covid-19, tâm nĕ geh tât 39 nuĭh geh saơ tâm ntŭk rêh jêng. 126 nuĭh ntưp Covid-19 mhe đah 39 nuĭh geh saơ tâm ntŭk rêh jêng ta n’gor Dak Lak rgum dŭt âk ta ăp nkuăl Cư Mgar, Krông Buk, nkuăl têh Buôn Hồ n’hanh nkuăl ƀon têh Buôn Ma Thuột. Aơ lah ăp ntŭk geh kơp dơn âk nuĭh ntưp tâm ntŭk rêh jêng tâm 1 pơh ba năp n’hanh ăp nuĭh ntưp dŭt âk geh tât bâh ăp nuĭh plơ̆ sĭt bâh ăp n’gor mpeh ba dâng.

Âk xã, phường ta ăp ntŭk aơ lĕ n’hao nău mbơh ntưp dŭt ngăch bâh mbrô 1 , mbrô 2 tât mbrô 3, mbrô 4, nĕ lah bâh ntơm mô geh ntưp, tât mbra geh ntưp âk n’hanh ntưp dŭt âk. N’gâng kan dak si n’gor Dak Lak dôl nsrôih uănh nđôi, joi nuĭh tă tâm mâp đah nuĭh geh srê, an gŭ êng n’hanh xét nghiệm ăp nuĭh geh tâm mâp đah nuĭh geh srê, ngăch saơ ăp nuĭh ntưp ta ntŭk rêh jêng.

Geh tât nău nuh srê Covid-19 ta Dak Lak dôl geh ntưp âk, nar 28/10, UBND n’gor Dak Nông lĕ geh sƀ ntrŭnh ndal bâh nar 19/10, cán bộ n’hanh nuĭh pah kan ta Dak Nông mô dơi tât mô lah sĭt ta Dak Lak tâm 14 nar,  mô kơp ăp nuĭh hăn pah kan mô lah geh nău an hăn kan bâh ntŭk leo kan.

Nuĭh rblang: Thị Đoắt