VOV4.M'nông: Gay ntop kơl nuĭh ƀon lan bah nkual ƀon têh Hồ Chí Minh dơi n'gor Dak Lak wơt sĭt tâm măng nar 10/8, Mpôl druh ndăm ăp nhih pah kan n'hanh doanh nghiệp n'gor Dak Lak ƀư bôk nău kan “N'gon măng druh ndăm" gay n'gor an 500 nuĭh sa kơl an dơm an nuĭh ƀon lan plơ̆ sĭt bah nkual nuh srê. Ăp du hê nuĭh sa lah por jâng sŭr, dak toh mbo n'hanh dak ngêt tâl rchŏk.

Ăp ngan por dơi tâl hôp, an duh tâm thùng xốp n'hanh rdeng njŭn tât ntŭk rgum ta nhih nti THPT Dân tộc nội trú Nơ Trang Lơng n'gor Dak Lak. Măng nơh, 345 nuĭh dơi wơt sĭt lah ăp nuĭh dơi an wơt lor kơt: Bu ranh, kon se, bu ur bŭn, bu ur dôl mât kon jê̆ ta nâm 36 khay deh; nuĭh hăn but săm ji, khâl băl mpôl, hăn pah kan mô hŏ dơi plơ̆ sĭt; nuĭh dôl geh dơn sa ndơ kơl lam rêh jêng kon nuĭh ăp khay; me bơ̆ hăn ndrel kon se ta nâm 10 khay deh, bu ranh, bu ur bŭn, nuĭh ji...geh nău ŭch plơ̆ sĭt ta jay he nơm. Nuĭh ƀon lan plơ̆ sĭt lôch jêh uănh năl ngăch mô mpơl ntưp mbra rgum sĭt an gŭ êng ta ntŭk nơm gŭ 14 nar n'hanh tĭng groi nđôi tay ngăch dăng n'hâm suan ta jay nơm hôm 7 nar tay đŏng. Nkhêp geh nuĭh mpơl ntưp mbra rdeng tât ntŭk săm ji bah n'gor.

Kŏ tâm lơ 10/8, bôk nau kan kơl an “Bôk ndeh ŭch rŏng” hŏ leo ndơ sa dak ngêt kơl an ƀon lan tâm ntŭk geh nkhah rgum nŭih tâm xã n’har bri Ia Rvê, nkuăl Ea Súp, n’gor Dak Lak. Bôk nau kan yor rmôt kan bu ur tahen Biên phòng n’gor tâm rgop nsum đah rmôt kơl an Thiện Tâm 47 ndrel ăp rmôt kan kơl an geh ntŭnh ƀư. Tâm xã Ia Rvê, rmôt kan hŏ njoăl 30 nklâm ndơ ân ăp rnăk ƀon lan dôl mâp nau jêr tâm thôn 8 dôl ƀư nau nkhah êng tâm ngih. Du nklâm ndơ geh: 5kg phe, du thùng mì tôm, dak ngi, dak mắm, bột ngột, bánh mì, chả giò ndrel 100 rbăn prăk. Ăp nklâm ndơ geh Rnâng kan ntoh măt bah thôn ndơn ndrel ma pă tay ân ăp rnăk. Ndrel ma nê rmôt kan hôm kơl 500 kg byăp bum ân ƀon lan, pă 500 chai dak ngêt ndrel 100 bil njrăng mprănh dak diu ân ăp nŭih ƀư nau kan tâm ăp ntŭk njrăng rdâng nŭih./.

Nŭih rblang: H’Thi