VOV4.M’nông: Tâm pă jêr jŏt bah nuĭh ƀon lan nkual ƀon têh Hồ Chí Minh rnôk an gŭ srang ngai êng tĭng nău ntrŭnh mbrô 16 bah Thủ tướng Chính phủ, ăp "Bôk ndeh rdeng tâm rŏng" bah ăp mpôl kan, ăp nuĭh ta Dak Lak hŏ hăn kơl. Bar pe jât tấn ndơ sa hŏ n'hanh dôl rdeng tât play nuih Miền Nam, bol ma Dak Lak nơm ân mbrôn suan gay ntrôl rŭch COVID-19.

Tăng lư Hội chữ thập đỏ nkual ƀon têh Buôn Ma Thuột dôl tâm rgop đah Hội phụ bu ur Công an n'gor Dak Lak n'hanh ăp nuĭh lŏng nuih n'hâm ƀư “Bôk ndeh tâm rŏng” gay rdeng bum biăp kơl nuĭh ƀon lan nkual ƀon têh Hồ Chí Minh tâm ăp nar ƀư gŭ srang ngai êng lam rêh jêng kon nuĭh, yuh Lê Thị Thanh Tâm, nuĭh tơm tăch ndơ Lợi Tâm, nkual ƀon têh Buôn Ma Thuột, hŏ ndăn tâm ôp đah ăp băl mpôl gay ndrel hăn. Yuh Tâm nkoch: uănh Sài Gòn lơp chrêk rngơ̆ ma jêng djôr huănh yor nuh srê, yuh saơ ji nuih n'hâm ngăn, ŭch tâm pă ndơ kơl dĭl:

“Saơ nkual ƀon têh Hồ Chí Minh dôl mâp jêr jŏt jêng gâp kan nsum đah Hội chữ thập đỏ gay kơl ƀon lan nkual ƀon têh Hồ Chí Minh gay rlău dơi nuh srê krit nji dja. Mpŏng lah nkual ƀon têh Hồ Chí Minh ơm rlău dơi  nuh srê gay plơ̆ tay nău rêh kơt ơm".

Yuh Tống Thị Tươi ta phường Tân Lợi, nkual ƀon têh Buôn Ma Thuột -  nuĭh nsrôih râng rgŏ jă ăp nuĭh lŏng nuih n'hâm ndrel hăn đah ăp "Bôk ndeh tâm rŏng" nthoi Dak Lak đah nkual ƀon têh Hồ Chí Minh nkoch, lĕ rngôch bum, biăp, play do dơi rgum njuăl tâm nkual ƀon têh Hồ Chí Minh dơi mpôl công an n'gor n'hanh ăp nuĭh lŏng nuih n'hâm jŭr tât tâm mir tăm biăp bah ăp nkual tăm biăp ta Buôn Ma Thuột rvăt sĭt. Tơm biăp njuăl tâm nklang ntŭk nuh srê, nkre kơl ƀon lan nkual ƀon têh bah ir mô dơh ru, nkre rgop kơl n'gluh dơi tơm biăp âk mpưm ta Dak Lak:

“10 nar bah năp nơh ri gâp saơ nuh srê kơt aơ kônh wa mô dơi tăch luh. Rnôk saơ nô nău nuh srê bah nkual ƀon têh Hồ Chí Minh duh jêr ri oh nô mpôl hên tâm nchră hăn lăp tâm nê nkre kơl kônh wa tăch dơi biăp nkre nsĭt tay tơm biăp dja tât ăp ntŭk dôl ŭch geh n'hanh tâm rnôk dja lah nkual ƀon têh Hồ Chí Minh dôl ât rdâng nuh srê. Bôk ndeh dja lah bôk ndeh tâl bar n'hanh mpôl hên mbra geh bôk ndeh tâl pe rdeng.”

Wa Nguyễn Thị Lý, Groi kruanh Hội chữ thập đỏ nkual ƀon têh Buôn Ma Thuột an gĭt, lôch rnôk Hội chữ thập đỏ nkual ƀon têh kan nsum đah Hội Bu ur Công an n'gor Dak Lak ƀư bôk nău kan "Bôk ndeh hăn kơl tâm rŏng" rƀŏng sĭt mpeh tơm nuh srê, lĕ bar đơn vị hŏ dơn geh ndơ kơl dŭt âk bah ăp nuĭh lŏng nuih n'hâm. Tât aƀaơ, bôk nău kan "Ndeh rdeng ndơ kơl tâm rŏng" hŏ njuăl bơi 50 tấn bum, biăp, hang rbăn tăp kik djăr n'hanh cà phê rdeng lăp tâm nkual ƀon têh Hồ Chí Minh, đah lĕ rngôch rnoh khlay bơi 400 rkeh prăk. Pah kan mât đăp mpăn an ăp nuĭh ƀĭt ndeh tâm rnôk rdeng biăp hăn dơi uănh khlay đŏng, đăp mpăn njrăng n'gang nuh srê.

“Gay đăp mpăn an nuĭh ƀĭt ndeh hăn rdeng n'hanh lăp tâm nklang ntŭk nuh srê ri Hội chữ thập đỏ nkual ƀon têh tâm boh kan nsum đah ntŭk rgum kan dak si nkual ƀon têh nkra test ngăch an nuĭh ƀĭt ndeh. Lôch ăp nuĭh ƀĭt ndeh tă bah nkual ƀon têh Hồ Chí Minh sĭt ri ntŭk rgum kan dak si uănh năl tay mham ngăch an ăp nuĭh ƀĭt ndeh gay ăp nuĭh nê mô hôm rvê lăp tay tâm nău rêh kơt ơm".

Ta ăp nar lam dak, lơn lah nkual ƀon têh Hồ Chí Minh, dôl mbrôn suan rdâng lơh đah nuh srê COVID-19, ăp bôk ndeh rdeng ndơ tâm rŏng bah Dak Lak mô dơn lah nău ntop kơl drăp ndơ. Nê lah nuih n'hâm tâm pă, lah nău ngơi du nuih n'hâm rgop suan kơl rlău dơi jêr jŏt, ntrôl rŭch nuh srê./.

Nuĭh rblang: Điểu Thân