VOV4.M’nông:  Mhe aơ, Thủ tướng Chính phủ lĕ đă nău kan ntung trong ăp n’gor, nkual ƀon têh ta lam dak pơk “trong hăn” an mã QR Code ntop kơl doanh nghiệp nchoăn rdêng, hăn trong tăch ndơ lŏ mir n’hanh ăp ndơ ngêt sa. Bah dŭt khay 7/2021 tât aƀaơ, N’gâng kan ntung trong n’gor Dak Lak lĕ an rlău 2.000 mã thẻ QR Code “trong hăn”” an ndeh gay ntop kơl ăp ntŭk kan nchoăn rdêng kơt kơl nuĭh ƀon lan dơh lơn tâm rnôk rnê tăch ndơ lŏ mir mô lah ăp ndơ dŏng khlay.

Wa Đặng Quang Điện-Kruanh HTX dịch vụ tăch rgâl rdêng ndơ 63 n’gor nkual ƀon têh  Dak Lak nkoch, doanh nghiệp geh 45 bôk ndeh rdêng ndơ ăp ntil ndơ lŏ mir play dô ta ăp n’gor Tây Nguyên hăn ăp n’gor mpeh Bắc n’hanh thủ đô Hà Nội tăch. Rnôk Hà Nội n’hanh du đêt n’gor ƀư tĭng gŭ srang tâm ƀah tĭng ntĭm đă 16 bah Thủ tướng Chính phủ, nău rdêng ndoh ndơ dŭt khay 7 mhe rlău, N’gâng kan ntung trong n’gor Dak Lak mbơh ƀư pơk “trong hăn” an mã QR Code kơl an ndeh rdêng ndơ bah doanh nghiệp dơh lơn tâm nău hăn rdêng ndơ rnôk tât ăp ntŭk an ƀư gŭ srang tâm ƀah kon nuĭh tĭng ntĭm đă 16 bah thủ tướng Chính phủ.

“Jêh mbơh bah Ngih pah kan dơi kan mpeh nău an QR Code rdêng ndoh ndơ khlay, mpôl hên lĕ dăn tâm mạng, n’hanh sam ƀŭt dŭt dơh. Jêh rnôk dăn “trong hăn” dơi an mã QR Code ta n’gâng kan ntung trong n’gor Dak Lak ri ndeh mpôl hên dơi pă thẻ năl ndeh jêh nklăp 1-2 mông dăn. Rnôk geh thẻ, nău nchoăn rdêng ndơ hăn rlău ăp ntŭk uănh nđôi srê bah n’gor kơt ăp n’gor, nkual ƀon têh êng ngăch n’hanh dơh âk lơn. Rlău ma nĕ, lĕ rngôch ăp oh nô ƀĭt ndeh tâm công ty dơi ntop kơl test ngăch Covid-19 ta ntŭk uănh nđôi srê Covid-19 ma mô roh prăk n’hanh mô roh âk mong nar”.

Ăp nuĭh ƀĭt ndeh dơi soih ngăch ntŭk kâp uănh nđôi rnôk geh mã QR Code “trong hăn” gay rlău ăp ntŭk uănh nđôi njrăng, n’gang srê Covdi-19 ta ăp trong quốc lộ

Dak Lak geh 6 trong quốc lộ hăn rlău geh: 14 (trong HCM), 14C, 26, 27, 19 n’hanh 29 nthoi đah ăp n’gor Lâm Đồng, Gia Lai, Dak Nông, Khánh Hòa n’hanh Phú Yên. Aƀaơ lĕ rngôch ăp trong quốc lộ geh ntŭk njrăng n’gang srê Covid-19 uănh nđôi nuĭh n’hanh ndeh hăn luh lăp tâm ăp n’gor.

Trung tá Đặng Thanh Hòa-Cán bộ uănh nđôi ntung trong Trạm CSGT Krông Búk, tâm Công an n’gor Dak Lak an gĭt, ta ntŭk uănh nđôi Covid-19 ta mpông lăp mpeh bah lơ n’gor lah ntung 110 ta xă Ea H’leo, nkuăl Ea H’leo kâng n’har đah n’gor Gia Lai, rĭng ăp du nar geh rhiăng ndeh n’hanh rbăn nuĭh lăp n’gor Dak lak. Rnôk ăp ndeh rdêng ndơ geh sam ƀŭt năl ndeh geh mã QR Code hôm e tam yor n’gâng kan ntung trong ăp n’gor an ri mbra dơi an lor uănh nđôi gay ndeh hăn tâm mong ngăch ngăn.

“Trạm CSGT Krông Búk pă an lĕ rngôch rnoh nuĭh kâp njrăng măng nar gay tŏng ăp đăp mpăn ntung trong kơt ntop kơl trong kan njrăng, n’gang srê Covid-19. Ƀư tĭng ntĭm rđău “pơk trong hăn” bah Thủ tướng chính phủ, lĕ rngôch rmôt kan mbra uănh nđôi mã QR Code, lah ăp ntŭk kan rdêng ndơ dơi an n’hanh tong nar hăn mpôl hên mbra nta nơih gay ngăch rlău ntŭk uănh nđôi”.

Bah nar 19/7/2021 tât aƀaơ, N’gâng kan ntung trong n’gor Dak Lak pă an rlău 2.000 ndeh mã QR Code gay hăn ta ăp “trong hăn” rnôk rdêng ndơ

Tĭng wa Lê Đình Minh-Groi kruanh N’gâng kan ntung trong n’gor Dak Lak, ƀư tĭng ntĭm rđău bah Thủ tướng chính phủ kơt N’gâng kan ntung trong nău ntop kơl ăp ntŭk kan tăch rgâl rdêng ndơ dŏng khlay, n’gâng kan bah dâng lĕ mbơh tât ăp ntŭk kan nchoăn rdêng ta Dak Lak dăn pă mã năl QR Code ndeh gay an lor nău kan hăn nsong, rdêng ta ăp “trong hăn”.

Nău uănh an pă mã QR Code kơl an “trong hăn” dơi ƀư tĭng lĕ rngôch đah ăp phần mềm điện tử tă bah mang internet, đah sam ƀŭt dơh, ngăch n’hanh knŭng mô tât n’gul nar lah dơi an. Wa Lê Đình Minh lah:

“Kơp tât rnôk aơ mpôl hên lĕ pă geh 2.036 mã QR Code an ăp ndeh hăn rdêng ndoh ndơ dŏng khlay hăn ăp n’gor, nkual ƀon têh ta lam dak. N’gâng kan ntung trong mbơh tay n’hanh đă ăp doanh nghiệp rdêng ndơ dăn dâl mã QR Code “trong hăn” gay dơh lơn tâm nău rdêng ndoh ndơ tâm rnôk srê aƀaơ dôl geh jêr jŏt ta lam n’gor kơt lam dak. Mpôl hên pă an rmôt kâp măng nar n’hanh 7/7 nar tâm pơh pă an ăp ntŭk kan rdêng ndơ. Doanh nghiệp knŭng ndơ̆ sam ƀŭt rhăch nău pơk sŏng dăng tâm mạng lah 1-2 mông dơi mpôl hên pă dâl gay ntop kơl trong hăn rdêng ndoh ndơ ngăch lơn./.

          Nuĭh rblang: Y Sưng Phê Ja