VOV4.M’nông – Tâm ăp nar dăch aơ n’gor Kon Tum na nao kơp dơn ăp nuĭh F0 dơi saơ tâm nkual nkhah êng n’hanh bah dih ntŭk gŭ rêh. Ta năp nu nău aơ n’gâng kan ƀon lan n’hanh rmôt kan dơi kan bah n’gor n’hao uănh nđôi gay nking n’gang tu tơm ntưp srê Covid-19. Ta Rƀŭn nchră giao ban trong kan báo chí khay 10, dơi Ban Tuyên giáo N’gor ủy Kon Tum ƀư nar 28/10, wa Nguyễn Đình Cầu, Groi Chánh Văn phòng UBND n’gor Kon Tum mbơh, n’gor Kon Tum mât tay ntŭk uănh nđôi srê ta ăp trong quốc lộ lăp tâm n’gor. Uănh mĭn êng bah n’gor aơ lah ăp ntŭk uănh nđôi mô di lah ntŭk uănh nđôi ntung trong jêng n’gor mbra mô rơih jăng kơt nău rgop bah N’gâng kan ntung trong.

Du nkual uănh nđôi săk soan ntŭk gŭ rêh jêh nkhah rgum ta phường Lê Lợi, nkual ƀon têh Kon Tum.

2 nar mhe rlău ta Ntŭk uănh nđôi srê mrô 1 Sao Mai, nkual ƀon têh Kon Tum n’hanh ntŭk uănh nđôi srê mrô 2 yôk Lò Xo, nkuăl Đăk Glei ta trong Hồ Chí Minh lĕ saơ 3 nuĭh ntưp đah SARS-CoV-2, tâm nĕ geh du hê bah Hà Nội sĭt n’hanh 2 hê bah n’gor Dak Lak hăn. Ta năp nu nău nuĭh ƀon lan lĕ nar nkhah êng rgum sĭt ƀư nkhah êng, uănh nđôi săk soan ta jay mư saơ ntưp đah Covid-19 jêng tât ntưp rêng srê ntŭk gŭ rêh, du đêt nkuăl, nkual ƀon têh bah n’gor Kon Tum đă nuĭh ƀon lan dăn gŭ tay nkual nkhah rgum ntop 7 nar tay.

Tât aƀaơ n’gor Kon Tum geh 328 nuĭh ntưp Covid-19, tâm nĕ geh 22 nuĭh ji, 106 nuĭh plơ̆ ntưp tay. Tâm rnoh ăp nuĭh ntưp 206 nuĭh saơ ta ăp ntŭk nkhah rgum, 15 nuĭh saơ tâm ntŭk gŭ rêh n’hanh du hê saơ tâm nkual nkhah ngih dak si.

Nuĭh rblang: Y Sưng Phê Ja