VOV4.M’nông: Jêh rnôk rgop rhiăng tấn biăp, bum, play kơl kônh wa nkual srê ăp n’gor mpeh bah dâng, âk kôn h wa n’gor Dak Nông lĕ srih tay ăp ntil biăp bum gay ntop kơl nuĭh ƀon lan nkual srê.

          Rnôk kơl rlău 2 tấn blân ônh n’hanh âk biăp, bum, play, rnăk nô Trịnh Văn Khởi, ta thôn Thuận Hải, xă Thuận Hạnh, nkuăl Dak Song, n’gor Dak Nông srih tăm tay rlău 7 sào biăp ăp ntil gay tâm pă jêr jŏt đah kônh wa nkual chôt srê. Nô Khởi an gĭt, bôl wăng sa rnăk wâl khuch tă bah srê yơn rnôk aơ kônh wa ta ntŭk hôm e jêr jŏt lơn jêng gâp ŭch ndrel ty tâm kơl khân pơng răm nuih n’hâm n’hanh ơm rlet rlău chôt srê.

          “Rnăk wâl dôl kay rli du đêt neh hôm e tăm tay du đêt tơm tuh mbô, tăm bum biăp cải gay ntop kơl an kônh wa ta ăp nkual jêr jŏt. Lah srê jŏ jong săk gâp geh trong rgŏ jă oh nô, kônh wa srih tăm tay gay jêh aơ ăp ntŭk khuch srê hô he hôm e ntop kơl tay kônh wa”.

          Tâm ban ma nĕ, wa Nguyễn Thị Năm, ta xă Quảng Tâm, nkuăl Tuy Đức jêh rnôk rgŏ jă rlău 20 tấn biăp, bum, play njuăl an ntop kơl ăp n’gor ntŭk srê. Wa manh tay neh srih tăm rlău 1 ha biăp gay geh tay ăp rơh ndơ ntop kơl kônh wa nkual srê.

          “Aƀaơ rnoh ndơ tuch tăm mbrơi mbrơi khar mpêt, jêng gâp dôl manh neh ta pĭt mir bah rnăk wâl, tâm rgop đă Rmôt bu ur ƀư tăm biăp, tuh cove gay pă an rơh bah kơi tay an nchrăp lor. Gâp mĭn ăp nău ƀư aơ mbra du gâl mkra an nău rêh nuĭh ƀon lan ta nkual srê kơt nuĭh pah kan ach o”.

          Ta xă nkual ngai Dak Som, nkuăl Dak Glong, ntŭk geh bơi 70% ƀon lan rnoi đêt yơn rnôk kônh wa nkual ƀon têh HCM mâp jêr jŏt yor gŭ srang tâm ƀah kon nuĭh, ăp nuĭh nsrôih tâm rgop biăp, bum play njuăl an dơm. wa Bùi Ngọc Tân, Kruanh UBND xă Dak Som an gĭt, tât aƀaơ, kônh wa tâm xă lĕ ŭch kơl êng rlău 5 tấn biăp, bum njuăl an nuĭh ƀon lan nkual srê nkual ƀon têh HCM. Âk rnăk lĕ tăm tay ăp ntil biăp gay ntop kơl nuĭh ƀon lan nkual srê.

          “Xă Dak Som lah xă nkual 3, nkual dŭt jêr jŏt, dŭt âk lah kônh wa nuĭh rnoi mpôl đêt, rnăk ach o, êp ach o. Tâm ăp năm bah năp, kônh wa bah xă dơi ntop kơl ndrôm sam ƀŭt, kho ao, phe, bôh dak măm bah ăp nuĭh lŏng bôk tôr, kơt ăp rmôt kan, êng nuĭh bah nkual ƀon têh HCM. Rnôk nkual ƀon têh HCM dôl mâp jêr jŏt tâm chôt srê Covid-19 ăp rnăk wâl, êng nuĭh bôl hôm e jêr jŏt yơn đah nuih n’hâm tâm yô̆ tâm kơl ăp ndrô̆ng prit, ăp ntil biăp bum, play gay geh ăp ndơ hăn ndơ̆ jŭr nkual ƀon têh HCM”.

          Hang rhiăng tấn ndơ tuch tăm, ndơ sông sa ntop kơl nuĭh ƀon lan geh khuch lĕ dơi hăn rdêng, ndrel ăp mbôr biăp rih dơi srih tăm lah nuih n’hâm bah kônh wa ƀon lan ăp rnoi mpôl n’gor Dak Nông rƀŏng tât ntŭk srê ăp n’gor mpeh bah dâng đah nău ŭch chôt srê ơm rlău, nău rêh ơm plơ̆ tay nâm ơm.

          Nuĭh rblang: Y Sưng Phê Ja