VOV4.M’nông – Kêng măng 14/7, ta Ntŭk kruanh dak, Kruanh dak Nguyễn Xuân Phúc lĕ geh rơh kuăl điện tâm nchră đah Tổng thống Rumani Klaus Werner Iohannis. Ta rơh kuăl điện tâm nchră, 2 kruanh lĕ tâm nchră âk trong mkra na nê̆ gay n’hao pơk hvi n’hanh ƀư jru lơn tâm boh đah 2 dak, tâm ban ŭch n’hanh ntrôl ăp trong ƀư tâm nchră ăp ding nkre ntrôl dăng kan ndrel tâm du đêt nău kan kơt wăng sa-tăch rgâl, ntĭm nti, kan ndrel pah kan.

Kruanh dak Nguyễn Xuân Phúc tâm nchră đah Tổng thống Rumani

 
Tổng thống Rumani mbơh, tĭng nău tâm boh dăch dêh uĕh lăng đah 2 dak, Chính phủ Rumani lĕ an Việt Nam 100 rbăn dĭng vaccine Astra Zeneca kơt mbra uănh mĭn tay nău tâm an vaccine an Việt Nam tâm khay tât. Kruanh dak Nguyễn Xuân Phúc lah uĕh ta năp nău kơl khlay n’hanh ntop kơl ơm ma Tổng thống n’hanh nuĭh ƀon lan Ruani an Việt Nam tâm rnôk mâp âk jêr jŏt, mĭn lah rnoh vaccine aơ mbra rgop ngăn ngêt tâm nău njrăng n’gang srê Covid-19 bah Việt Nam.

Nuĭh rblang: Y Sưng Phê Ja