VOV4.M’nông: Ôi 13/7, ta Nhih pah kan kruanh dak, Kruanh dak Nguyễn Xuân Phúc wơt ăp Đại sứ bah ăp dak Thái Lan, Chi-lê, Cuba, Liêng bang Nga hao ndơ̆ si ƀŭt neh dak nkhêp geh hăn dơn nău kan ƀư Đại sứ ta Việt Nam. Wơt Đại sứ Liên bang Nga ta Việt Nam, wa Gennady Bezdetko hao ndơ̆ si ƀŭt neh dak, Kruanh dak Nguyễn Xuân Phúc lah rjăp, Việt Nam uănh khlay tâm boh têh dơi jŏ jong lam lĕ rngôch đah Liên bang Nga, way ntrŏng uănh Liên bang Nga lah ngoăy tâm ăp dak tâm boh khlay dâk bôk năp tâm  trong kan tâm boh dak bah dih bah he, ŭch rŏng n'hao dăng lơn đŏng tâm boh đah Nga kalơ ăp trong kan. Kruanh dak rnê âk Liên bang Nga ăp năm rlău aơ way đăp mpăn chính trị, wăng sa- rêh jêng kon nuĭh hun hao uĕh, ntŭk gŭ kan kalơ lam ntŭr neh tâm trong nkra ăp nkô̆ nău dak bah dih, nkual dơi n'hao prêh. Đại sứ Liên bang Nga lah rjăp Việt Nam way lah dak tâm boh an lor bôk năp bah Liên bang Nga mô dơn ta nkual Đông Nam Á ma hôm lah nkual Châu Á – Thái Bình Dương. Đại sứ lah rjăp mbra nsrôih ntrŭt ntrôl âk ntil đah bar ding./.

Nuĭh rblang: Điểu Thân