VOV4.M’nông -  Bôl trong kan nchroh mbơh, njrăng n’gang, rdâng đah nu nău mih phŭt sial dơi Lâm Đồng n’hao n’hanh ntrôl dăng, yơn nău khuch bah trôk nar lơh geh ta n’gor aơ hôm e dŭt âk. Bah bôk yan mih tât aƀaơ, n’gor Lâm Đồng geh 20 rơh mih têh n’hanh mih tŭp pler, 12 rơh sial rwănh blông, 2 rơh pĭch rlâm neh n’hanh 5 rơh nglăi chong 2 nuĭh khĭt n’hanh 2 nuĭh sôt rmanh. Trôk nar ƀư rlău 1.300 ha tơm tăm geh khuch djơh n’hanh roh ƀ’hiău, 1,2 ha tui ka geh klôn rdu, 379 mlâm jay ndrel đah 20 ha jay bil, jay jal n’hanh 3 ntŭk ngih pah kan geh khuch djơh... dĭng lĕ khuch kơp êng geh 53 rmen prăk.

Tĭng wa Nguyễn Hà Lộc, Chi cục trưởng chi cục thủy lợi, nuĭh kan Ban ntĭm rđău Njrăng n’gang trôk nar n’hanh joi kơl nău rmanh n’gor Lâm Đồng, bôl 68 ntŭk uănh vĕ dak mih luh êng bah n’gor lĕ an dŏng săk rnglăy, ndrel đah nău wât n’hanh nău blău njrăng n’gang trôk nar lơh bah cán bộ n’hanh nuĭh ƀon lan lĕ dơi hao prêh, yơn nu nău trôk nar geh jêr jŏt jêng khuch tă bah trôk nar lơh ta lam n’gor hôm e âk. Gay n’hŭch tât đêt ngăn khuch khat, rlău ma ndơ mhe trong kan nchroh mbơh, mbơh njrăng trôk nar, n’gor dôl rgum ƀư ăp trong mkra tŏng ăp đăp mpăn n’glău dak bât.

Nŭih blang: Y Sưng Phê Ja