VOV4.M’nông-Mỹ mbra n’hao nău tâm kơl đah ăp ngih dak Bantich n’hanh lah ŭch geh nău kan mbra đă tay tahen tât ta nkual gay ma njrăng rdâng ăp nău ntêt nkri mbra geh bâh Nga. Aơ lah nău mbơh mhe aơ bâh kruanh n’gâng kan mât rnă njrăng ngih dak Mỹ Loi Ót-xtin (Lloyd Austin), nuĭh dôl geh rơh tât khâl bôk năp tât Latvia kơp bâh rnôk dơn nău kan bâh bôk năm 2021. Wa Ót Xtin lah kruanh n’gâng kan mât rnă njrăng ngih dak bôk năp bâh Mỹ tât ngih dak Bantich aơ tâm bơi tât 30 năm. Tĭng nău mbơh bâh kruanh n’gâng kan Loi Ớt Xtin, Mỹ mbra rgum lĕ tahen bâh ăp mpôl kan ta Rumani, ăp dak châu âu êng n’hanh geh rnôk lah bâh Mỹ gay ma mât đăp mpăn nău nchrăp tâm pleh mpôl kan tât ta nkual neh Bantich. Mpeh đah nơm, kruanh n’gâng kan mât rnă njrăng ngih dak Latvia Pa brich du tơ̆ tay kuăl đă Mỹ n’hao nău kơl an tahen n’hanh tơm prăk gay ma rvăt năp ndơ dŏng tahen mhe, tâm ban kơt n’hao nău dơi njrăng rdâng ta ka lơ trôk n’hanh kơh dak lêng.

    Nuĭh rblang: Thị Đoắt