VOV4.M’nông- Ôi nar 4/8, kruanh n’gâng kan nchră nău đah dak bah dih Bùi Thanh Sơn lĕ leo mpôl đại biểu Việt Nam tât râng ăp rơh rƀŭn nchră kruanh n’gâng kan nchră nău đah dak bah dih ASEAN+1 n’hanh ASEAN +3, n’hanh nuĭh ndrel leo rơh rƀŭn nchră kruanh n’gâng kan nchră nău đah dak bah dih ASEAN-Hàn Quốc. Ta ăp rơh rƀŭn nchră, ăp đại biểu lĕ uănh năl n’hanh ngluh mbơh trong kan ntrôl tâm kơl. Ăp dak kan ndrel lĕ mpơl nău uănh khlăy tâm boh kan, kơl an nău kan ƀư tơm bâh ASEAN. ASEAN n’hanh ăp dak kan ndrel tâm ban ŭch tâm nchră n’hanh tâm kơl yor nău đăp mpăn, ueh lăng, hun hao nâp nâl, têh dăng lah nău kan tơm khlăy bâh nău tâm boh kan. Tĭng nĕ, ăp ding tâm ban ŭch an geh ntrôl dăng tâm kơl kan mpŏng tât ndâk nsơm lĕ rngôch, nâp nâl lôch nuh srê. ASEAN kâp knơm ăp dak kan ndrel Đông Bắc Á tâm kơl têh kuăng, geh nău kan ueh, tâm ăp trong kan kơt dak si, rgâl mhe rnoh mbrô, công nghệ mĭn kan mhe, nău kan ueh mhe, nuĭh kan blău, hun hao ueh nđir, nâp nâl.

Nuĭh rblang: Thị Đoắt