Ăp nar aơ, ăp nău ƀư rsơl plơng ƀư lam hvi ta n’gor Dak Lak. Ta 12 ntŭk sŏk dơn nting mham ADN bah nuĭh bên tahen khĭt kăl e yor Công an n’gor Dak Lak mbơh ƀư, trong kan sŏk nting mham dơi ƀư ndăn, khoa học. Đại tá Võ Hùng Tường, Kruanh jrô kan Cảnh sát Mât uănh hành chính mpeh đăp mpăn nău rêh jêng, công an n’gor Dak Lak an gĭt, rlău ma 12 ntŭk sŏk dơn nâp nâl, ntŭk kan hôm pă 12 rmôt pah kan tât jay ăp nuĭh bên tahen khĭt săk ranh, săk soan mô ngăch, mô dơi hăn gay ntop kơl sŏk mham. “Mpôl hên mbơh ƀư na nao tâm 4 nar, bah 23/7 tât 26/7. Êng nar bôk năp ƀư, đah nău srôih ƀư bah ăp rmôt, mpôl hên lĕ sŏk rgum geh 928 nting mham, tâm nĕ geh 15 nuĭh dơi ƀư ta jay nuĭh ƀon lan. Rnoh geh bôk năp lah 2.886 nuĭh n’hanh hôm rlău 2 nar tay, rnoh ƀa ƀă mpôl hên mbra rgum jêh tay sŏk mham gay tŏng ăp 100% trong nchrăp”.

Ndrel đah trong kan sŏk mham ADN ƀư ndăn, nău ndâk ƀư jay ntop kơl kon deh ăp tahen geh khĭt dak si hóa học dơi ƀư dŭt n’hâm tâm khay 7 aơ. Rơh aơ, n’gor Dak Lak mbơh ndâk ƀư mhe 22 mlâm jay n’hanh nkra 20 mlâm jay jao an ăp rnăk. Nău ndâk ƀư mhe, nkra nchrăp jêh tâm lơ 27/7 aơ. Ta phường Ea Kao, n’gor djôt dơn ndâk ƀư mhe 2 mlâm jay n’hanh ntop kơl nkra 1 mlâm jay. Thiếu tá Đỗ Anh Dũng, Chính trị viên Ban Ntĭm rđău Tahen phường Ea Kao, an gĭt, đah nău lăp dŭt n’hâm bah lĕ trong chính trị, nău kan lĕ ntơm jêh lĕ rngôch. “Tĭng nkô̆ nău kan ngih pah kan na nê̆ râng ndâk ƀư, nkra jay an ăp nuĭh kon deh râng tâm lơh tâm su geh khih dak si hóa học, Ban Ntĭm rđău tahen phường lĕ ndâk ƀư trong nchrăp tâm ôp UBND phường mbơh ƀư. Mpôl hên ƀa ƀơ tâm rgop đah rnăk wâl, nuĭh ê nkra jay an ăp rnăk wâl”.

Nkah gĭt 79 năm nar tahen sôt rmanh tahen khĭt kalư e, UBND n’gor Dak Lak lĕ pă 21,5 rmen prăk bah tơm prăk, ndâk njêng 15 mpôl pah kan ƀư chop khâl, ntrŭt đă n’hanh jao ndơ tât 36.000 rnăk dơi kơl. Rlău ma nĕ, Dak Lak ƀư jao an ndơ bah Kruanh dak tât 27.200 nuĭh dơi kơl ta lam n’gor, đah dĭng lĕ prăk 8,23 rmen prăk. Wa Phan Đại Thắng, Groi Giám đốc N’gâng kan Nội vụ n’gor Dak Lak an gĭt, lĕ rngôch ăp ndơ lĕ dơi njuăl tât UBND 12 xă, phường gay an tât ty ăp rnăk dơi kơl. Rlău ma nĕ, N’gâng kan tâm rgop đah ăp rmôt kan geh tât mbơh ƀư rĭng âk bôk naư kan rsơl plơng nkhêp di 27/7. “Ăp gưl ủy, n’gâng kan ƀon lan ta ntŭk n’gor Dak Lak mbra ƀư mpoh su nhang nkah gĭt ăp tahen khĭt janh dăng  ta ăp nghĩa trang; mât nkra tay ăp ndơ ƀư Neh dak nchih săk ta lam n’gor. Mpeh nău kan 500 măng nar, gay rgum, joi săk ăp tahen khĭt kăl e, N’gâng kan Nội vụ tâm rgop rjăp đah N’gâng kan ntĭm rđău tahen n’gor n’hanh ăp ntŭk ƀư năl, rgum kơt joi nting tahen khĭt kăl e”.