Tĭng nau mbơh bah nau kan kơl an ƀon lan, Rnâng kan Uỷ ban Dân nguyện ndrel mêt uănh đă Chính phủ rgum rđau âk nau kan ndal kơt lah mêt uănh, ƀư kloh nau kan điểm thi môn Toán geh nau mô tâm di tâm Tuyên Quang; n’hao nau lơh rdâng ma nau kan ê nkra, tăch rgâl ndơ rlăm, ndơ sa rlăm, dak si rlăm; ntrŭt dăng nau njrăng, rdâng ma srê rtoh trong mham; rklaih ăp nau tih tâm nau kan xuất bản; đăp mpăn njrăng rdâng ŭnh sa, trong  dak ndrel rklaih ăp nau kan geh tât nau phong dôih âk nŭih, ntoch jong.

            Mra dơi saơ, ăp nau đă ntoh tă bah nau kan dôl geh khuch ngăn tât nau geh dơi ndrel nau rêh bah ƀon lan. Tâm nê, ndơ rlăm, ndơ sa rlăm ndrel dak si rlăm dôl lơh khuch ngăn yor mô êng knŭng khuch tât n’hâm soan ma hôm ƀư roh nau rnơm bah ntrong mât ndoh ndơ tăch kŏ geh âk ntoh măt đă nkah. Kruanh Uỷ ban Khoa học, Công nghệ ndrel Ntŭk ntu Nguyễn Thanh Hải mbơh lah, ân geh ƀư kloh lơn ăp nau rvê bah cử tri mpeh nau tât bah rnoh ndoh ndơ tâm rơh rlau aơ:

            ‘Cử tri kŏ geh ăp nau nkoch mbơh kơt aơ. Rnôk rnoh xăng pring lam ntur neh hao khlay, rnoh ndoh ndơ tâm ntŭk tăch rgâl kŏ hao tĭng đŏng ndrel hao ngăch ngăn. Yơn lah rnôk rnoh dak pring xăng n’huch thuk ri rnoh tăch lŏ mô geh huch mô lah geh huch ma huch mbrơi ngăn. Ntŭk plăng nkô̆? Mât nau kan mpeh rnoh, mât ngih dak tâm nau kan aơ ân geh ƀư n’hêl mhâm geh ndrel ntă dê nŭih ndơn ƀư?”.

            Aơ kŏ lah nau ngăn ma âk nŭih ƀon lan ndơn saơ kloh ngăn tâm nau rêh ăp nar. Rnoh ndoh ndơ pring xăng vay geh uănh lah nau kan tơm bah âk ntŭk kan ê nkra, nchuăn rdeng. Yơn lah, rnôk rnoh dak pring xăng huch, âk ndoh ndơ êng êng hôm tâm rnoh prêh, ƀư ăp nau dŏng tâm nau rêh bah ƀon lan ê geh nau rgâl tâm ban. Nau aơ ndŏ luh nau đă ma ăp ntŭk kan mât kan tâm nau n’hao lơn tay nau nkân uănh ntŭk tăch rgâl, rdâng nau têm ndơ gay tăch khlay, đăp mpăn nau ntul rlong ân tâm ban tâm nau njêng rnoh tăch.

            Du nkô̆ nau geh rgum nau kơl an bah ƀon lan lah nau mô tâm di bah nau geh Toán tâm rơh thi tốt nghiệp THPT năm 2026 tâm Tuyên Quang. Tâm rnôk rơh thi geh nau khlay đah âk rkeh kon se ndrel rnăk vâl, ăp nau mpơl mô tâm di ân geh mêt uănh ân kloh rvah gay đăp mpăn nau tâm ban. Groi Thủ tướng Chính phủ Nguyễn Văn Thắng, mbơh:

            ‘Đah ăp nau kan ma ƀon lan ngăn ngên uănh khlay kơt lah ƀư rơh thi THPT năm 2026, geh tât nau geh dơi bah môn Toán ta Tuyên Quang, Chính phủ hŏ ntrŭnh nau rđau N’gâng kan ntĭm nti ndrel ăp ntŭk kan n’gâng kan ndâk mêt uănh, uănh năl kloh, ăp ntil. Lah saơ nau tih ân geh rklaih rjăp tĭng nau ntrŭnh đă bah pháp luật, đăp mpăn nau tâm ban đah ăp kon se nti ndrel mât nâp nau rnơm bah ƀon lan đah n’gâng kan ntĭm nti”.

            Rđau đă bah Chính phủ ntoh nau mĭn sŏng nê lah mô dơi der, mô dơi nkŭm nking đah ăp nau ma geh ƀon lan uănh khlay. Yor lah ndrel ma nau rklaih tâm di nŭih, tâm di nau tih, ri nau khlay lơn lah ƀư nâp nau rnơm bah nŭih ƀon lan tâm nau  ƀư kan rjăp ngăn bah pháp luật ndrel nau tâm ban tâm nau kan ntĭm nti.

            Ntơm bah ăp nkô̆ nau geh tâm nchră ta nar rƀŭn tal 4 bah Uỷ ban Rnâng kan Quốc hội ân saơ, nau kan kơl an bah ƀon lan nar lơn ma tâm dăch ma nau ngăn geh bah nau rêh. Ăp nau đă bah cử tri mô knŭng nkoch nau mĭn, nau ŭch bah ƀon lan ma hôm lah “mâng veh” ân săk tam tâm nau mât ngih dak tĭng ăp nau kan./.