Tâm xã Ia Krel, n’gor Gia Lai, Binh đoàn 15 (n’gâng kan neh dak) ƀư nau ntơm leo lăp dŏng ndrel jao pă Ngih săm ƀŭt Mầm non Sao Mai ân an nai ntĭm ndrel kon se nti tâm xã Ia Krel, n’gor Gia Lai. Aơ lah ngoai tâm rnoh ăp ntŭk ngih săm ƀŭt geh N’gâng kan neh dak ndrel ăp ntŭk kan bah tahen ntrŭnh ƀư tâm nkuăl n’har bri. Tâm n’gor Gia Lai, ngih săm ƀŭt geh jao ân Binh đoàn 15 ƀư tâm 5 khay. Ntŭk ngih săm ƀŭt geh ƀư kơt: Ngih pah kan bah rmôt nai 231 mét vuông, 2 rmôt jrâu nti dĭng lĕ lah 800 mét vuông geh 5 krâu nti rgum nsum: Ngih ŭnh, ngih nchiăr nti săk jăn, nglan pâl, ntŭk ân ndeh...tŏng dơi nau ŭch ntĭm nti ân rlau 300 kon se nti mầm non tâm 24 ƀon, bah ăp xã n’har bri ba dâng Gia Lai.

Đại tá Khuất Bá Cao, Bí thư Đảng uỷ, Groi rđau kan Binh đoàn 15 mbơh: nau leo lăp dŏng Ngih săm ƀŭt Mầm non Sao Mai ông dơi rgop nau kơl an ntĭm nti bah oh kon cán bộ, tahen, nŭih pah kan ndrel kônh wa ƀon lan, ndâk nau dơi ân hun hao nâp nâl bah nkuăl n’har bri. Binh Đoàn 15 ŭch nkuăl, ngih săm ƀŭt mra ndrel Binh đoàn ƀư ueh nâp nâl nau khlay tam bah ngih săm ƀŭt:

‘Tâm rơh tât, Binh đoàn mra lŏ tâm rgop nsum ma n’gâng kan tâm nkuăl ndrel Rmôt kan văng sa, neh dak 75 tâm nau mât dŏng ăp ntŭk kan aơ ân tâm di nkô̆, săk tam, nâp nâl; kơl an nau mât, nkra lah geh nau tât; nsum ty mât ngih săm ƀut ndrih-kloh-ueh, pơk nau nơih ueh gay ăp kon se geh ntĭm nti, nchiăr săk tâm ntŭk ngih săm ƀŭt ueh ngăn”.

Râng nau ntơm ndâk nkra, bu ranh Rah Lan Vọng, ƀon Ngol Le, xã Ia Krêl, n’gor Gia Lai rhơn mbơh, Ngih săm ƀŭt Sao Mai kơl an mât rong, ntĭm nti kon se tâm nkuăl ueh lơn, gay kônh wa đăp mpăn pah kan jan sa, mât nâp tâm nkuăl:

‘Ngih săm ƀŭt ueh nâp, kloh, ueh, kon sau phung hên geh hăn nti ueh ngăn, tât dŭt tât lôch, jêh aơ têh jêng mra geh kơl an nhe dak. Phung hên rhơn ndrel rnơm tâm Đảng ndrel ngih dak”.

Tâm xã n’har bri Đức Cơ, n’gor Gia Lai, Ngih săm ƀŭt Mầm non 18/4 (tâm Công ty 72, Binh đoàn 15) geh 18 ntŭk ngih săm ƀŭt, tâm 5 xã. Rnôk aơ ngih săm ƀŭt geh 1000 kon se nti nhà trẻ ndrel mẫu giáo, tâm nê 1/3 lah kon rnoi mpôl đê̆. Ăp kon se kŏ nti lôch du nar. Êng kon se rnoi mpôl đê̆ mô kâp ndŏ prăk nti. Êng nê, Công ty 72 hôm kơl an kon se 8000 prăk sa ăp nar. Công ty manh ndeh gay vơt njŭn kon se ăp nar.

Tâm xã n’har bri Mô Rai (n’gor Quảng Ngãi), Công ty 78 (Binh đoàn 15) kŏ ndâk ngih săm ƀŭt mầm non nâp, ndơ dŏng ntĭm nti ăp tŏng. Gay pơk trong ân ăp rnăk công nhân, nŭih kan geh kon jê̆ hăn kor rtăk cao su, ăp 11 ntŭk ngih nti yor Công ty ndâk ƀư geh bay vơt njŭn ntơm bah ôi ơm. Tâm ăp ngih săm ƀŭt, Ban giám hiệu kŏ tâm pleh gay vơt kon se hăn nti.

Đại tá Khuất Bá Cao, Bí thư Đảng uỷ, Groi rđau kan Binh đoàn 15 mbơh “Đah nau mĭn ƀư rgum tu tơm ndâk ntŭk ntu ngih săm ƀŭt ueh ngăn ân kon se hăn nti, Binh đoàn 15 hŏ ndâk 9 ngih nti mầm non, 2 ngih nti nhà trẻ, đah 130 ntŭk nti tâm nkuăl n’har bri Tây Nguyên. Tâm ăp năm ăp ngih săm ƀŭt ndơn, ntĭm nti, mât chăm rlau 4.500 kon se, tâm nê rlau 2/3 lah kon se rnoi mpôl đê̆. Ndrel ma nau ntĭm nti rgum, n’hao nau nâp ntĭm nti, rmôt mât nau kan, nai ntĭm, nŭih pah kan tâm ăp ngih săm ƀŭt mầm non bah Binh đoàn hôm nsôih nkoch trêng, bonh đă kon nŭih rnoi mpôl đê̆ hăn nti. Nau nsôih, ƀư kan rjăp, kơl an nâp bah Cán bộ Binh đoàn 15 hŏ doh rklaih nau nkol gay mât chăm ân oh kon rnoi mpôl đê̆ tâm nkuăl n’har bri./.