Tâm ngih mhe geh ndâk nâp ueh, bu ranh Kră Jăn Ha Nhang, tâm thôn Đam Pao, xã Phú Sơn Lâm Hà, n’gor Lâm Đồng, hôm âk mông nar ƀư nau kan ma wa uănh lah nau kan bah nơm, kơt: Bonh đă kônh wa mât nau ơm yau, rnăk wa geh bơi tât 5 ha cà phê, nklăp 100 tơm sầu riêng ndrel nau tanh njuh kơl an nau rêh đăp mpăn. Yơn nau ma bu ranh rvê ŭch ngăn lah geh nkre tâm ngih nơm, păng lĕ ndâk ngih rnoi nơm, tâm nê geh yông chĭng, ndơ nơm tanh ma ty ndrel ăp ndoh ndơ dŏng geh tâm dăch ma ăp nar bah rnoi K’Ho Cil.

            Ntơm nau kan bah nơm, bu ranh Kră Jăn Ha Nhang bonh đă ndrel kônh wa mât nau tanh njuh. Ndrel nau rhơn lơn rnôk tâm thôn Đam Pao, nau tanh njuh hôm geh âk rnăk vâl mât ơm:

            ‘Ta aơ lah bơi tât 300 rnăk rnoi mpôl đê̆, nau kan tanh juh ri geh rlau 225 rnăk. Ăp mon kon se ntơm 15 năm tât ma ăp bu ranh 70, 80 năm ngăn kŏ blau tanh da dê. Ăp bu ranh kŏ ndăn mông ru lôch kan lŏ mir gay ma gŭ tanh bok ao jêh rĭ geh ntop tay đê̆ đă, tăch geh 300 400 rbăn tĭng ntil ndơ nơm tanh, kŏ geh prăk oi đŏng”.

            Nau nkoch tâm Đam Pao ân saơ, nau mât kan bah ơm bah rnoi nơm kŏ lah mât du gưl nau ơm yau ueh tâm nau rêh nar aơ, ngăn lah rnôk nau tanh njuh kơl an ƀon lan geh tay prăk ndrel nau kan ân rơh mom.

            Đah nŭih bu rnơm nau bonh đă ê lor tât tă bah nau kan ƀư trong ang. Rnôk ma bu ranh ƀư kan lor, ngơi đah ăp nau tâm dăch dơh ma nau rêh ndrel nsum ma kônh wa doh rklaih ăp nau kan jêr n’hêl, nau ngơi ngơi nê mơ nơih lăp tâm ƀon lan lơn. Aơ kŏ lah nau ma n’gâng kan tâm Phú Sơn Lâm Hà kơp dơn kloh tâm rnôk jêh dăp rgum tay nkuăl ƀon lan gŭ, ƀư tay ntrong kan nkoch trêng, bonh đă ƀon lan:

            ‘Tâm rơh rƀŭn ri bu ranh mbơh nkoch nau ri ƀon lan djăt ndrel ma rnơm ngăn đah ăp nau ntĭm mbơh, nau bonh đă, nkoch trêng bah bu ranh ƀon, nkoch tay ăp nau ƀư pah kan jan sa blau, mât nau vay ơm bah nơm ndrel n’ăp ma mpeh nau kan chính trị, rnă njrăng tâm nau rêh jêng. Bu ranh kŏ nsôih ngăn, nkoch mbơh nau ŭch, nau mpŏng bah ƀon lan’.

            Năl kloh nŭih bu rnơm lah ntung njŏ đah gưl uỷ, n’gâng kan ndrel ƀon lan, ăp năm rlau aơ, ăp gưl uỷ, n’gâng kan ndrel rmôt kan bah n’gor Lâm Đồng uănh khlay nau ƀư tŏng ăp nau ntrŭnh đă tĭng nau dơi; tâm nê geh nau pă mbơh ăp nau gĭt kan mhe, mât chăm nau rêh drăp ndơ ndrel nuih n’hâm. Ndrel nau khlay lơn lah pơk trong nơih gay ăp rmôt nŭih aơ ƀư ueh nau dơi nkre tâm ƀon lan nơm.

            Tâm xã jêr ngăn tâm Sơn Điền, wa Trịnh Văn Dũng, Kruanh jrâu kan Văn hoá-Xã hội xã, mbơh, nau tâm rgop nsum ma bu ranh ƀon, nŭih bu rnơm geh mât ƀư ƀa ƀơ. N’gâng kan jă nŭih bu rnơm râng ăp nar rƀŭn, mbơh nau mpeh nau ntrŭnh bah Đảng, nau kơl an, pháp luật bah Ngih dak gay ăp nkô̆ nau aơ geh nkoch trêng tât ƀon lan đah nau ngơi tâm dăch, tâm êp, nơih gĭt lơn:

            ‘Ntơm bah bôk năm, xã ntrŭt dăng nau ndâk nau nchrăp mât chăm nŭih bu rnơm tâm nkuăl nơm kŏ kơt lah nau kan tâm rgop nsum. Tâm ăp rơh rƀŭn bah Đảng uỷ, UBND xã kŏ jă nŭih bu rnơm tâm nkuăl râng ăp nar rƀŭn mbơh gay geh ăp nkô̆ nau tâm nchră, tâm djăt kŏ kơt lah gĭt ăp nau ntrŭnh, trong kan bah Đảng, pháp luật bah ngih dak gay ma nkoch trêng ân ƀon lan tâm xã Sơn Điền”.

            Ntơm bah nau kan hun hao văng sa, mât nau ơm yau tât nau tâm rjaih ăp nau tâm rkeh, nkoch trêng pháp luật, njrăng rdâng nau tât khuch tât nau rêh jêng ndrel râng ƀư ăp nau kan mât đăp mpăn, rnă njrăng, nau dơi bah nŭih bu rnơm dôl ma geh tât tâm ăp ding bah nau rêh tâm ăp ƀon lan bah n’gor Lâm Đồng.

            Jêh rnôk dăp rgum rmôt kan hành chính, Lâm Đồng geh rnoh neh hvi, nsum mpôl ƀon lan âk rnoi, đah âk nkuăl rnoi mpôl đê̆ gŭ rêh.  Wa Bùi Ngọc Sơn, Groi Giám đốc Sở Dân tộc ndrel Tôn giáo n’gor Lâm Đồng, mbơh, nau ƀư ueh nau dơi bah ăp nŭih geh ƀon lan rnơm ndrel nkoch mbơh nau mĭn, nau ŭch tă bah tâm dâng:

            ‘Jêh rnôk ƀư tâm rnglăp n’gor ri rmôt kan bah ăp nŭih bu rnơm tâm nkuăl bah lam n’gor geh 883 nŭih. Nŭih bu rnơm ntoh nau dơi leo trong tâm nau kan ndâk njêng, ntĭm mbơh, nkoch trêng, bonh đă kônh wa ƀon lan râng ăp nau ntrŭnh tâm nau rêh jêng, ntrong kan bah Đảng kŏ kơt lah nau ntrŭnh đă pháp luật bah ngih dak. Nŭih bu rnơm nkoch trêng nau kan ueh, jêh ri nŭih ueh, kan ueh, ntĭm mbơh nau kan tuch tăm, rêh jêng ân kônh wa ndrel râng mât đăp mpăn rnă njrăng tâm nkuăl”.

            Nthoi tay nau râng kơl an bah Đảng, ngih dak đah nau dơi bah nŭih bu rnơm tâm ƀon lan, nsum mpôl, lơ 20/9/2026, nau ntrŭnh rmô 307 bah Chính phủ ngăn ngên geh nau tam ngăn n’hêl, đah ăp nŭih bu rnơm tâm nkuăl ƀon lan rnoi mpôl đê̆. Đah rnoh kơl an mpeh nau kan tât, kơl an drăp ndơ, bonh đă nuih n’hâm geh n’hao prêh. Aơ lah nau gay n’gor Lâm Đồng lŏ ƀư ân ueh nau ntrŭnh đah nŭih bu rnơm, nkre lah nau nsôih gay nŭih bu rnơm tâm nkuăl ƀư ueh lơn nau dơi nau kan tâm mpeh tâm dâng”./.