Ăp nar bôk khay 7, ta ăp ntŭk rdâk mon jay rnăk dơi kơl ta n’gor Quảng Ngãi, nteh n’gôr máy pot bê tông, nteh me nôp pâng, nteh ndruih ot n’gôr gră. Cán bộ, tahen, Công an ndrel mpôl druh ndăm n’hanh nuĭh ƀon lan ta ntŭk rgop nar luh da dê, ntrôl ngăch rdâk njêng ăp jay tâm rŏng lôch jêh bah năp nar 20/7.

Lôch bơi 15 năm geh sai n’hanh gŭ rêh ta jay nchep nchop, jŭr djơh, yuh Lê Thị Kiều, ta thôn Xuân Trung, xã Trà Bồng geh du mblâm jay nâp uĕh đŏng. Yuh Kiều lah kon bah nuĭh tahen ơm kop ji tă khuch bah dak si khêh dioxin, săk yuh nơm lah nuĭh geh tât khuch bah dak si hóa học, âk năm aơ nău rêh rnăk yuh dŭt krit jêr. Rnoh ndơ kơl ăp khay bah yuh man ma tŏng sa dơm, hôm nău rdâk mon jay kơt lah mô nănh mĭn tât.

Mhe aơ, rnăk yuh Lê Thị Kiều dơi ngih dak ntop kơl 60 rkeh prăk bah bôk nău kan jut jăng jay truh sat, jay nkưp nde an rnăk dơi kơl. Ntop đah rnoh prăk rgum ntêm âk năm aơ, ur sai yuh Kiều hŏ rdâk geh jay mhe. 

"Jay mhe bah rnăk gâp hŏ ƀư lôch hôm yơn mô hŏ ntrŭp mpông, năk ŭnh mô hŏ ƀư ơm. Rnăk gâp dôl nsrôih joi prăk gay ƀư tay I jay bah dâng n’hanh jay ŭnh. Jay dja lơn âk bar hê me kon gŭ, nsrôih gay ơm ƀư jay ŭnh geh ntŭk n’gon trău gay kon bu ur đăp mpăn nti ren. Aƀaơ geh jay mhe dja lah rhơn hôm". 

Jay bah wa Hồ Văn Ngoạt gŭ thôn Trà Hiệp, xã Thanh Bồng dôl dơi ndăn ƀư lôch jêh đŏng. Wa Ngoạt lah kon bah nuĭh hăn tâm lơh geh ntưp dak si khêh hóa học. Âk năm aơ rnăk păng rêh tâm jay jŭr djơh, rnôk ăp tơ̆ phŭt sial nuih n’hâm mô đăp mpăn. Dơi Ngih dak ntop kơl 60 rkeh prăk, wa Hồ Văn Ngoạt manh tay 200 rkeh prăk gay rdâk jay nâp uĕh:

"Ntơm nơh jay gâp truh sat, jŭr djơh hôm. Aƀaơ dơi Ngih dak ntop kơl manh tay 60 rkeh prăk, rnăk nơm ntop tay prăk gay ƀư jay, geh ntŭk gŭ đăp mpăn. Aƀaơ dŭt lah uĕh Ngih dak hŏ ntop kơl đŏng. Geh jay gŭ uĕh reh hôm, rnăk hên dŭt rhơn răm ngăn".

Ta xã Thanh Bồng geh 4 rnăk dơi kơl jut jăng nhih jay truh sat, nkưp nde. Rdâk ƀư ntơm bah khay 5/2026, tât aƀaơ 4 rnăk ƀư lôch hŏ nklăp 70% rnoh âk. Gay năn ƀư lôch jêh bah năp nar 20/7 tĭng nău rđău đă bah n’gor Quảng Ngãi, n’gor dja njêng ăp rmôt ntop kơl, rgum ăp mpôl kan Công an, Tahen, Mặt trận, ăp nsum mpôl n’hanh nuĭh ƀon lan ndrel râng rơih jay ơm, rdeng lŭ loih, kuĭh jâng jay, kơl rdâk mon. Ăp nar luh kơl kan hŏ kơl ăp rnăk hŭch bah ir roh huach prăk rdâk mon jay.

Wa Hồ Thanh Trường, Groi kruanh UBND xã Thanh Bồng, n’gor Quảng Ngãi an gĭt, lĕ rngôch ăp rnăk dơi ntop kơl mpeh săk jêr jŏt da dê. N’gor nkre rgŏ jă ăp rnăk ndơn sŏk geh bah tơm keo, mât rong gay ntop prăk ƀư jay; nkre kuăl jă cán bộ, công chức, ăp nuĭh lŏng nuih n’hâm n’hanh Rdâk prăk nkrem an nuĭh ach o ntop kơl tay, kơl ăp rnăk geh ndơ ma rdâk njêng ăp mblâm jay nâp uĕh, đăp mpăn lơn:

"UBND xã Thanh Bồng tâm pă ăp mpôl kan kơt Công an, Tahen kan nsum đah Mặt trận, ăp mpôl n’hanh nuĭh tâm thôn, lơn lah ăp rnăk kiău ma ndrel ntop kơl ăp nuĭh geh săk dơi ntop kơl ta xã, kơt rơih jay ơm, rdeng lŭ loih, choih xi măng, kuĭh jâng jay... gay ndăn ngăch rdâk jay gŭ tĭng nău rđău đă bah n’gor, ƀư lôch jêh bah năp nar 20/7/2026."

Khay 3/2026, Thủ tướng Chính phủ tâm ban ŭch trong nchrăp ntop kơl jut jăng nhih jay truh sat, nkưp nde an kon nuĭh hăn tâm lơh geh ntưp dak si hóa học ma tơm prăk hôm rmeh bah Prăk nkrem an nuĭh ach  o bah Trung ương. Lôch nê, UBND n’gor Quảng Ngãi n’gluh an dŏng trong nchrăp, đă ăp ntŭk tâm dâng ndăn ngăch ra uănh tay, an ƀư đah nău nsrôih ƀư lôch jêh bah năp nar 20/7/2026.

N’gor Quảng Ngãi geh 157 kon bah nuĭh hăn tâm lơh kăl e geh ntưp dak si hóa học ta 51 xã, phường, đặc khu geh nău ŭch ntop kơl mpeh jay gŭ. Bộ Chỉ huy Quân sự n’gor Quảng Ngãi hŏ njêng 74 rmôt đah 727 cán bộ, tahen ntop kơl na nê̆ nuĭh ƀon lan rdâk njêng jay. Sở Xây dựng n’gluh an dŏng ăp rup weh ntĭt lor, đăp mpăn nâp uĕh n’hanh tâm di đah ngăn ngăn tĭng ntŭk. Mô dơn ntop kơl jay gŭ, âk ntŭk ta n’gor Quảng Ngãi hôm ndop trong kơl ăp tŏng geh nău rêh êng ƀa ƀă đŏng kơt ntop kơl kon si ntil, nta trong dơh kơl nuĭh ƀon lan tât đah tơm prăk manh dơh bah ăp bôk nău kan gưl neh dak gay hun hao joi geh trong rêh, tĭng kơn đăp mpăn nău rêh.