Tâm xã Ea Bung, wa Nguyễn Thị Đinh-ur tahen sôt rmanh Nguyễn Huy Nuôi, nkoch rnôk geh Kruanh UBND n’gor Dak Lak ndrel rmôt hăn kan tât ôp khâl, pă ndơ. Wa Đinh nkoch, bah năp nơh yor nau rêh hôm jêr jŏt, sai păng geh răk rong tâm ntŭk nŭih geh n’hâm kơl an. 15 năm ma aơ, rnăk vâl leo sai wa nsĭt răk tâm ngih ndrel mro geh nau kơl an bah ăp gưl n’gâng kan:

 ‘Ntơm n’gor, nkuăl, xã, thôn ăp năm lah tât nar lễ, Tết ăp rmôt kan kŏ tât mât chăm ueh tŏng, duh răm nuih n’hâm ngăn. Rnơm Đảng, Ngih dak jêh ri ăp ntŭk kan rmôt kan, đah nau rêh kơt hên kŏ geh dơi kơl an, kŏ mbơi oi đŏng”.

Tâm xã Ea Knôp, wa Nguyễn Ái Quê, tahen sôt rmanh hạng ¾, geh kơl an 110 rkeh prăk, ndâk ngih mhe, hvi 50m2.  Wa tă lah tahen tâm lơh tâm Quân khu 5, rmanh jâk tâm Quảng Nam năm 1973. Năm 1985, wa leo rnăk vâl hăn tâm Dak Lak ndâk ƀư nau kan tâm rnôk geh âk nau jêr ngăn:

‘Bah năp nơh ƀư geh ngih kđar kŏ mâp âk nau jêr hôm, rnôk aơ Ngih dak lŏ yŭ an, kơl an geh kơt aơ lah ueh ngăn hôm. Lah ueh ma rđau kan ăp gưl kơl an ân ma gâp, gâp rhơn ngăn. Kônh wa ƀon lan bu tât gŭ pâl ri nơm kŏ geh ntŭk ueh đŏng”.

Tâm xã Quảng Phú, wa Ngô Văn Tường dôl ndrel ma ăp nŭih nkra ngih mhe ân wa, rnoh 150 rkeh, tâm nê Ngih dak kơl an 110 rkeh. Wa Võ Thị Nghĩa, ur wa Tường lah nŭih geh n’hâm ma cách mạng, tă geh bu nhŭp krŭng tâm ngih nkông krŭng Buôn Ma Thuột năm 1973 rnôk leo ndơ sa, leo săm ƀŭt, pă mbơh nau ân tahen:

‘Geh ngih gŭ kơt aơ ri ur sai hên đăp mpăn hôm, gay ma hăn pah kan geh tay ndơ gay ma rnăk rong ân nau rêh bah ur sai hên nơm”.

Tĭng nau ntrŭnh 131 năm 2021 ndrel nau ntrŭnh 21 năm 2024 bah Chính phủ, n’gor Dak Lak hŏ ƀư jêh, ndrel kơl an 593 rnăk geh n’hâm gay ma nkra ndrel ndâk ngih gŭ (142 rnăk ndâk mhe, 451 ngih nkra nâp). Rnôk aơ, Dak Lak hŏ ƀư âk nau leo mpoh kthup, mpoh jrêng tâm ăp môch tahen khĭt tâm n’gor, tâm xã; pă ndơ ân ăp rnăk dơi kơl an, ƀư nau leo nŭih geh n’hâm ma cách mạng hăn uănh, pâl, tâm mât măt ta Hà Nội.

Wa Lê Đức Tịnh, Groi Giám đốc Sở Nội vụ n’gor Dak Lak mbơh, n’gor kŏ rgŏ jă nau kan kơl an âk ntŭk gay ma mât chăm ân ueh lơn ma ăp nŭih tahen sôt rmanh, rnăk vâl nŭih geh n’hâm:

‘Sở Nội vụ tâm mbơh nchră nau ân n’gor gay lŏ ntrŭt dăng nau kan “Lam ƀon lan mât chăm ân ăp rnăk vâl tahen sôt rmanh, tahen khĭt ndrel nŭih geh n’hâm ma cách mạng’, đăp mpăn nau ngăn, jru hvi, săk tam; rgum ueh nau lăp râng kan bah ăp gưl, ăp ntŭk kan ndrel lam ntŭk rêh jêng tâm nau ndâk ndrel hun hao Tơm prăk kơl an aơ. Vay ôp khâl, kơl an, gĭt nau mĭn, nau ŭch bah nŭih geh n’hâm ma các mạng, đă gưl uỷ ndrel n’gâng kan ăp gưl năn rklaih nau kan geh tât, đăp mpăn nau dơi bah nŭih geh n’hâm đah cách mạng”.

Bah năp nê, rmôt kan ntoh măt Quốc hội n’gor Dak Lak hŏ ƀư Bôk nau kan tât sĭt khâl tay tâm ăp ntŭk nkah ơm ueh bah neh dak tâm xã Đồng Xuân, ntŭk ndâk Chi bộ Đảng cộng sản bôk năp bah n’gor Phú Yên ơm ndrel ntŭk căn cứ cách mạng H9, ƀon Dak Tuôr, xã Cư Pui, n’gor Dak Lak. Ta aơ, ăp ntoh măt ndrel ƀon lan kŏ geh tăng nkoch âk nau tă bah âk nŭih tă râng kăl e, ăp nau mô dơi geh chuêl mpeh  năm khay lĕ chuêl bah năm khay tâm lơh ta H9, nkuăl neh ơm, ntŭk nkah nau kan janh dăng bah tahen ndrel ƀon lan nơm.  Wa Nguyễn Thị Thu Nguyệt, Groi Kruanh rmôt kan, ƀư nau kan ntoh măt Quốc hội n’gor Dak lak, lah rjăp:

‘Rnôk hăn tât khâl uănh ntŭk ơm tâm rnôk aơ kơl an ăp ntoh măt Quốc hội, ăp nŭih cán bộ công chức, viên chức, nŭih pah kan ndrel ƀon lan geh rnôk tâm nkah tay nau ơm ơm ndrle gĭt jru tay nau kơl an bah nô, mbŏ nơm tâm nkuăl neh geh ak nau ơm cách mạng aơ. Bah nê, ăp nŭih lơn ma gĭt kloh nau roh hoach, ntop nuih n’hâm ŭch rŏng ƀon tơm, neh dak. Aơ kŏ lah nau nsôih gay ma ăp cán bộ, ƀon lan lŏ nsôih rgop nau ndâk njêng n’gor nar lơn ma hun hao”.

Rmôt kan ntoh măt Quốc hội n’gor Dak Lak ndrel ăp nŭih tă hăn kơl an hŏ pă 30 bôk ndeh, kho ao mhe ân kon se geh nau rêh jêr jŏt, ndrel 236 nklâm ndơ tât ăp rnăk dơi kơl, kônh wa rnoi mpôl đê̆, nŭih geh bu rnơm ndrel pă ntŭk chưng play, ngih gŭ ân xã. Nau mât răk nŭih geh n’hâm tâm Dak Lak mô êng lah nau kan, ma hôm lah nau ntoh nau rŏng “Ngêt dak nkah gĭt tu”, rgop nau ƀư nâp nau tâm rnglăp lam ƀon lan./.