Lôch rơh hop bôk năp, Quốc hội khóa XVI, Mpôl đại biểu Quốc hội ăp n’gor Gia Lai, Lâm Đồng n’hanh Dak Lak hŏ ƀư mâp cử tri ta âk ntŭk, nchih nkah âk nău rgop, dăn đă geh tât ntung trong, rgâl dơh glêh siƀŭt, trong kơl n’hanh n’hao nău dơi kan bah n’gâng kan tâm dâng tâm rnôk ntrôl dăng tâm pă gưl, tâm pă nău dơi kan aƀaơ.

Mpôl đại biểu Quốc hội n’gor Gia Lai ƀư Tâm nchră mâp cử tri lôch Rơh hop bôk năp, Quốc hội khóa XVI tĭng trong ƀư nkre đah pơk sŏng dăng tât ăp xã, phường. Ta tâm nchră, cử tri 2 đơn vị bầu cử lah âk  nkô̆ nău geh tât ntuh kơl ntung trong, trong kơl an nuĭh ƀon lan, đăp mpăn ăp tŏng geh nău rêh, nkra ƀư siƀŭt, tâm pă nuĭh mô way kan, ntop kơl đah cán bộ khối Đảng tâm pleh jŭr kan tâm dâng, trong kơl an bu hăr blău n’hanh ăp câu lạc bộ nghệ thuật way ơm. Âk cử tri mpơl nău uănh khlay tât nău dơi mât bôk kan bah n’gâng kan tâm dâng rnôk gưl xã bơi tâm pă tay âk nău dơi kan. Cử tri an lah nău nkra ƀư siƀŭt ta du đêt ntŭk hôm mbrơi, mô geh nchrăp lor; yor kơt nê̆ gưl xã ân rgâl mhe nău mĭn mât bôk kan, n’hao nău dơn kan rhŏ dŏng ƀon lan, der bah an nuĭh ƀon lan rsong hăn âk tơ̆ kơt aƀaơ.

Lah ta rnôk tâm nchră , Groi kruanh Quốc hội Nguyễn Hồng Diên nchih nkah ăp nău rgop lĕ nuih n’hâm, grêt dăch ngăn ngăn bah cử tri n’hanh an gĭt Mpôl đại biểu Quốc hội n’gor Gia Lai mbra rgum ăp tŏng gay njuăl tât nhih pah kan geh nău dơi kan mĭn uănh, n’glêh an:

“Lôch rgum nchih nău rgop, mpôl hên tâm pă ăp ntil nkô̆ nău jêng bar rmôt tơm: wăng sa- ntuh kơl n’hanh leo mât bôk kan – trong kơl. Du n’gul ăp nău rgop dăn đă dja mpeh nău dơi nkra bah gưl n’gor n’hanh gưl xã, mpŏng ăp oh nô kruanh rđău kan xã, phường ân rgum âk gay nkra, yor I ngăn aƀaơ nău dơi bah gưl xã, phường lah dŭt têh. Lơn lah, Chính phủ dôl tâm nchră mpeh nău koh n’hŭch lĕ ăp siƀŭt mpeh Trung ương gay ndơ̆ jŭr an tâm dâng. Jêng ăp nău dơi kan, nău dơn kan n’hanh n’glĕ nău dơi bah gưl xã tâm let năp tay mbra n’hao dŭt têh. Xã, phường lah ntŭk mâp n’hanh pah kan đah ƀon lan, jêng ân nsrôih, lor nchrăp gay nkra dŭt bah ăp nkô̆ nău ngăn ngăn geh tât nău rêh bah nuĭh ƀon lan”.

Ta xã Phúc Thọ Lâm Hà, wa Lâm Văn Đoan – Groi Chủ nhiệm Ủy ban Văn hóa n’hanh Xã hội bah Quốc hội, mpeh ĐBQH n’gor Lâm Đồng, hŏ mâp cử tri lôch Rơh hop bôk năp. Quốc hội khóa XVI. Tâm mông nar geh nău tâm ban, sŏng dăng, cử tri mpơl nău tâm ban ŭch đah nău lôch jêh rơh hop, nkra nkoch lah âk jêr jŏt, wăk kol ta ntŭk đŏng.

Âk nău rgop dăn đă mpeh nô nău du đêt trong nchrăp kan mbrơi an ƀư tâm rnôk nău sŏk mplơ̆ neh dơi ƀư ndăn ngăch, ƀư nuih ăl an nuĭh ƀon lan. Cử tri lah nău nkra ƀư siƀŭt hôm khoah âk, ƀư nuĭh ƀon lan ân rsong hăn âk tơ̆ đŏng; nkre dăn đă uănh khlay ntuh kơl, n’hao têh uĕh ntung trong hăn tâm thôn ƀon, nta trong dơh an rsong hăn, nchuăn rdeng ndơ n’hanh tât đah ndơ rhŏ dŏng dak si, ntĭm nti ta nkual jru, nkual ngai.

Lah ta rnôk tâm nchră, wa Lâm Văn Đoan rnê âk nuih n’hâm dơn kan, ăp nău rgop lĕ nuih n’hâm bah cử tri; lah rjăp Mpôl ĐBQH n’gor mbra djăt ăp tŏng nău rgop gay nđơn nkoch tay tât Quốc hội, Chính phủ n’hanh ăp n’gâng kan. Nkre dăn đă ăp n’gâng kan tâm n’gor n’hao dăng kan nsum tay, rgum nkra dŭt bah ăp nkô̆ nău mpeh n’glĕ nău dơi, der bah ntoch jong khuch tât nău geh tâm di bah nuĭh ƀon lan.

Ta Dak Lak, wa Ngô Trung Thành - Groi Chủ nhiệm Ủy ban Pháp luật n’hanh Tư pháp bah Quốc hội ndrel Mpôl đại biểu Quốc hội n’gor Dak Lak hŏ mâp cử tri ăp xã Krông Bông, Cư Pui n’hanh Hòa Sơn. Cử tri dăn đă Ngih dak uănh khlay ntuh kơl ntung trong ăp kôp, dak bât, trạm bơm, n’hong dak bât ta ăp ntŭk way geh dak bŭk; nkra têh uĕh tay trong mbluh hăn xã, mbluh hăn thôn jŭr djơh; ntrôl ngăch ƀư trong dôl ruih nkai ntoch jong. Bah meng nê, cử tri ŭch rŏng geh trong kơl an sơch lăp lor nai ntĭm an nkual jru, nkual ngai; ơm n’gluh an dŏng di rnoh ntŭk kan, ntop kơl an cán bộ thôn, ƀon; ơm kơi ntop tơm prăk ntuh kơl n’hanh tơm prăk bôk nău kan gưl neh dak gay tĭng ƀư geh nău tât hun hao bar mbrô; uănh khlay tay pah kan nkrum nđĭr neh yôk lưn, mât njrăng bri n’hanh nkra lơh ndŏk mbrâm nkual ƀon lan.