N’gâng kan Công an n’gor Gia Lai dôl ntrôl dăng pah kan ntĭm nti, pă an siƀŭt ƀĭt ndeh hạng A1 an ƀon lan rnoi mpôl đê̆ geh nău rêh jêr jŏt, nuĭh ƀon  lan ta nkual jru, nkual ngai, nkual n’har bri ta n’gor. Gâl kan gay n’hao nău gĭt êng an kônh wa rgop kân bah ir tâm tom ndeh tâm nkual rnoi mpôl đê̆.  

Lĕ ma pơh aơ, djăt ma tâm ơm ôi, bơi 400 nuĭh ƀon lan ta xã n’har bri Ia O, n’gor Gia Lai hăn rgum ăp tŏng tât nklang xã hŏ râng nti sŏk siƀŭt ƀĭt ndeh mô tô hạng A1. Lah ntŭk geh bơi 70% lah ƀon lan rnoi mpôl đê̆, nău rêh hôm âk jêr jŏt, tă bah nău dơi ntĭm n’hanh tâm rlong gay dơi sŏk siƀŭt ƀĭt ndeh an kônh wa dŭt rhơn nđơr. Nô Ksor Thí, ƀon O, xã Ia O an gĭt.

“Gâp gĭt ƀĭt ndeh bah ơm hôm yơn mô hŏ geh siƀŭt ƀĭt ndeh. Lôch dơi hăn nkoch trêng, gâp hŏ đăng ký nti gay rƀah gĭt nău gĭt blău, pháp luật mpeh đăp mpăn hăn ntung trong. Lôch nti, tâm rlong geh siƀŭt ƀĭt ndeh hôm săk nơm ƀĭt ndeh rsong hăn mbra đăp mpăn lơn”

Gay nuĭh ƀon lan dơh tât, ăp nhih  pah kan  dơi kan hŏ kan nsum ƀư pơk jrô nti ta xã dĭl. Rlău ma nău đăm gĭt Luật hăn ntung trong, kônh wa hôm dơi ntĭm nti na nê̆ ăp bài thi ntĭt lor kơt: Hăn rvăch mbrô 8, hăn ta trong tor sŏng, hăn rlău sop kol...wa Võ Thị Hà, Groi Giám đốc Ntŭk rgum  kan ntĭm nti n’hanh tâm rlong siƀŭt ƀĭt ndeh, phường Pleiku, n’gor Gia Lai an gĭt, nău pơk jrô nti ta nkual jru ngai hŏ dơi kơp nđăp na nê̆ gay tâm di đah kônh wa n’hanh đăp mpăn săk blău:

“An ƀư du đêt nkô̆ kơt chŭp rup, an ƀư siƀŭt hồ sơ an kônh wa. Ta ntŭk rgum ntĭm nti ƀĭt ndeh dôl geh bôk năp kan an rong dơm prăk nti lĕ rngôch đŏng, lơn lah kônh  wa rnăk ach o, dăch kêng ach  o”

Lôch ra uănh tay, ta n’gor Gia Lai hôm hang rbăn nuĭh ƀon lan mô hŏ geh siƀŭt ƀĭt ndeh hạng A1, rgum âk ta ăp xã nkual jru, nkual ngai, nkual ƀon lan rnoi mpôl đê̆. Thượng tá Ksor H’Bơ Khắp, Groi Giám đốc Công an n’gor Gia Lai an gĭt, gay nkra bah nô nău dja, ntơm bah bôk năm 2025 tât aƀaơ, Công an n’gor Gia Lai hŏ rđău đă mpôl kan dơi kan tâm boh nsum đah ăp ntŭk rgum ntĭm nti- tâm rlong sŏk geh siƀŭt ƀĭt ndeh, n’gâng kan ta ntŭk, ăp ntŭk kan dak si tâm n’gor n’hanh ăp nuĭh tơm kơl but dăm n’hâm suan, ntĭm nti, tâm rlong sŏk geh siƀŭt ƀĭt ndeh, pă an siƀŭt ƀĭt ndeh hạng A1 an nuĭh ƀon lan ta lĕ rngôch ăp ntŭk ŭch geh.

“Mô dơn n’glĕ ta nkual jru nkual ngai, nkual n’har bri, ma hôm lĕ ma ta ăp nkual xã phường nklang nkual yơn nha hôm geh nău rêh dŭt jêr jŏt đŏng ân dơi Ngih dak ntop kơl. Lôch nê mpôl hên  kan nsum tâm rnôk geh tât tĭng ƀư pă an siƀŭt ƀĭt ndeh. Leo ƀư hop n’hanh  pah kan đah ăp doanh nghiệp, ăp nuih n’hâm uĕh lŏng nchih săk gay kơl an ăp nuĭh ƀon lan dơi râng tâm rlong n’hanh pă an siƀŭt ƀĭt ndeh”

Tĭng trong nchrăp, ntơm bah aơ tât năm 2025, Công an n’gor Gia Lai ndrel ăp nhih pah kan geh tât ndơ̆ rnoh ŭch tât geh ntĭm nti n’hanh pă an siƀŭt ƀĭt ndeh hạng A1 an bơi 47.000 nuĭh nti, lơn âk lah nuĭh ƀon lan rnoi mpôl đê̆. Nău kan dja hôm lah trong nkra tâm di gay n’hao nău gĭt êng pháp luật, rgop kân bah ir tâm tom ndeh du trong jŏ jong tâm ƀon lan rnoi mpôl đê̆ ta n’gor.