Nar dŭt khay 7, bri duh nar, Thiếu tá Trần Văn Dũng, Groi Kruanh Công an xã n’har bri Quảng Trực, n’gor Lâm Đồng ndrel ma tahen lŏ hăn tât ƀon Bu Prăng 1A gay ma kơl nchuăn găch, rluk choih, nkra ngih dăch dŭt gay ma năn jao 66 ngih ân kônh wa tâm xã.  Thiếu tá Dũng mbơh, tâm rnôk ăp n’gâng kan, ntŭk kan ntrơn nau kan tĭng n’gâng kan 2 gưl, rnoh nau kan bah ntŭk kan Công an hao âk. Ndri ma, ăp nô mro nsŭn n’hâm gay ƀư lĕ 3 nau kan: Hành chính, rnă njrăng ndrel mât nâp nau kan jut lơi ngih truh sat tâm nkuăl ân jêh nau nchrăp luh:

          ‘Công an xã hŏ rƀŭn ndrel pă nau kan ân ăp rmôt gay ma mât nâp rmôt ƀư nau kan ndâk nkra tĭng nkuăl bah thôn, ƀon, geh ăp rnăk dơi geh kơl an bôk nau kan kơl an ngih truh sat. Phung hên mât tâm dăch nau kan ma nkô̆ nau kan mhâm ƀư gay ngih ndâk nê ân nâp, dăng da dê ndrel ntă tôl ân nâp đŏng. Êng nê, ri kŏ uănh nau kan pă ngih ân kônh wa ân lăp gŭ”.

          Tâm n’gor Gia lai, nau jut ngih truh sat lơn ma jâk yor geh rlau 12.500 ngih, tâm nê Công an ndơn ƀư rlau 6.500 ngih. Gay năn ƀư ăp nau kan, ăp cán bộ tâm rmôt hŏ hăn mâp ma ăp nŭih geh nau blau ƀư kan, ăp ntŭk bu tăch ndơ ndâk nkra ngih...du đê̆ cán bộ hôm ân prăk khay nơm geh têm nkrem âk ngăn bah nơm. Trung tá Lê Đình Hải, Groi Kruanh Công an xã Ia Pa, n’gor Gia Lai lah ngoai tâm rnoh nê, nô lah nŭih khlay tâm, nau ntơm ndâk lăp dŏng ngih bah wa Kpă Huê, nŭih rêh ndrâu êng, rven tâm săk tâm thôn Ma San, xã Ia Pa. Wa Rmah H’Đa, Kruanh Thôn Ma Sa, mbơh:

          ‘Thôn Ma Sa mhe nơh geh 2 rnăk geh kơl an jut ngih truh sat. Êng ngih pă ân wa Kpă H’Huê yor đồng chí Hải kơl an rnoh 80 rkeh prăk; du ngih êng geh Ngih dak kơl an 60 rkeh. Gĭt nau kơl an bah Đảng ndrel Ngih dak, kônh wa tâm thôn mro ƀư ueh nau ntrŭnh, ntrong kan bah Đảng, pháp luật bah Ngih dak; mô djăt tĭng phung mhik, mro tâm rnglăp ndâk njêng ƀon lan nar lơn hun hao”.

          Trung tá Lê Đình Hải, mbơh, nau kan nơm rgop prăk têm nkrem ndâk ngih pă ân ƀon lan, du gưl yor ŭch rgop nau ueh ân nau kan jut ngih truh sat tâm ƀon geh tay nau khlay. Hôm nkô̆ đŏng, aơ lah nau ma dơi geh tâm rnglăp ma ƀon lan bah công an tâm dâng:

          ‘Wa Kpă H’Huê lah nŭih rven tâm săk, gŭ ma sau păng ndrel mô geh drăp ndơ mô lah lŏ mir ôh, păng gŭ tâm ngih kđar sat hôm. Păng kŏ mô geh tâm rnoh geh jut ngih truh sat ôh, săk gâp nơm saơ rvê ngăn, ri ma gâp tâm nchră ma ur gâp. Gâp nchră ndrel mbơh kloh ma ur nơm lah nơm gŭ tâm ƀon lan, tâm dăch ma ƀon lan, ri nơm ŭch geh bu kơl, nơm ƀư jêh nau kan ndrel jêh nê hên nkra ân wa ngih aơ gay ma gŭ tâm lôch nau rêh. Tăng gâp mbơh kơt nê ri ur gâp uch đŏng, ndrel gâp mbơh ma  Đảng uỷ ba lơ ndrel kuăl bu hăn ndâk ngih ân wa dơm”.

          Bah nau kơp uănh, nkuăl Tây Nguyên geh nklăp 18 rbăn ngih mô geh ngih gŭ. Kơt tĭng nau jut lơi ngih truh sat bah Chính phủ, ăp n’gor hŏ ndâk Bôk nau kan n’hêl, rgum n’ăp ma tơm prăk ndrel ƀon lan kơl an jut ngih truh sat tâm ăp xã. Rmôt công an hŏ jêng nŭih tơm tâm nau ƀư kan, ndơn nau kan rgum tơm prăk, ndơ dŏng nkra ndrle nŭih kan, nkre bonh đă nau hăn ngăch ƀư, uănh nau ndâk rlau 12.700 ngih. Tât dŭt khay 7, ăp ngih mhe yor công an ndâk hŏ geh jêng nkra ndrel jao ân ăp rnăk lăp gŭ. Tâm nau rnơm geh lăp ngih mhe, nâp ueh, yuh H’Miên Ayun tâm n’gor Dak Lak nkoch:

‘Gâp rhơn ngăn, mô blau nau ma nkoch ơm. Geh ngih mhe nơm gŭ hôm, mô hôm geh rdâng ma nau gŭ tâm ngih truh sat kơt ntơm nơh ôh”.

          Rnê nuih n’hâm nsôih rlet nau jêr, yor ƀon lan chuêl săk nơm, kơl an ƀon lan, bah ăp rmôt công an tâm dâng bah Tây Nguyên, Trung tướng Phạm Thế Tùng, Kruanh n’gâng kancông an ân lah, tâm rnôk lam ntrong kan chính trị dôl mô ru ma nau ƀư kan, rmôtcông an tâm dâng nkre ƀư jêh nau kan, nkre mât nau đăp mpăn, tâm dăch ma nau jut ngih truh sat nê lah nau nsôih têh. Nau kan bah aơ tahen công an tâm ăp n’gor bah Tây Nguyên mô êng kơl an rgop nau ndâk nau rnơm bah ƀon lan Tây Nguyên ma Đảng, Ngih dak, rnơm tâm nau ueh dơi bah nau kan đŏng:

          ‘N’gâng kan công an rnê prêh nuih n’hâm bah Công an tâm ăp n’gor Tây Nguyên ndrel ăp rmôt kan tâm N’gâng kan ta aơ, yor đah nuih n’hâm prêh ndrel nuih n’hâm pah kan gơih ngăch, nsôih lôch n;hâm nơm “Yor ƀon lan kơl an” hŏ rhuăt gleh năch nau ƀư ân jêh rnoh nau kan têh tâm nau ndâk ngih gŭ ân ƀon lan, Gâp rnơm lah, đah ntŭk gŭ mhe đăp mpăn, nâp, ăp rnăk mra đăp mpăn pah kan jan sa, lŏ hun hao tâm nau rêh, nsôih râng đăp mpăn rnă njrăng tâm ntŭk kan, rgop nau ndâk njêng ndrel hun hao văng sa, rêh jêng bah nkuăl”.

          Tây Nguyên rnôk aơ hŏ nthoi ma dak lêng. Đah ăp ngih geh ndâk mhe, geh pă ân kônh wa, ăp ƀon lan mra geh nau ueh mhe đŏng. Bôk nau kan jut ngih truh sat yor Thủ tướng Chính phủ rgŏ jă đă ƀư đah ăp nau tă geh dơi mô êng lah nau ueh tâm nau rêh, pơk trong ân hun hao mhe ma hôm pơk luh du trong rgum nau kan bah lam ntrong kan chính trị ndrel nau dơi tơm bah nau rêh gay rklaih nau kơl an tâm nau rêh jêng. Jêh lôch tâm rnglăp, ăp n’gor Tây Nguyên hŏ geh bri, geh dak lêng. Nau kan kơl an ƀon lan geh nau rêh jêr jŏt ơm geh nau rêh đăp mpăn mra lah nau ntrôl gay ƀon lan ăp n’gor Tây Nguyên ơm hun hao luh nkuăl dak lêng têh./.