Xã gôl yôk Khánh Hoà, n’gor Khánh Hoà geh bơi tât 12 rbăn ƀon lan, rĭ geh tât rlău 8.500 nuĭh ƀon lan rnoi Raglai. Wa Cao Minh Khánh, Groi Bí thư Đảng Uỷ xã Khánh Sơn an gĭt, 5 năm ba năp rnăk ach o ta aơ hŭch ngăch, yơn hôm nha geh rlău 20%, nău geh râng geh du hê nuĭh kanŭng geh 30 rkeh prăk/năm. Đah âk nău kơl kan an tâm di dôl geh mbơh tơih, nău geh pah kan bâh ƀon lan dôl geh rgâl na nê̆. “Ăp bôk nău kan wăng sa ta gôl yôk mhe nơh lĕ geh mbơh tơih dŭt âk ta ntŭk, ƀon lan geh dơn tŏng ăp. Yơn lah, hăn jru, hăn na nê̆ đah ƀon lan lĕ geh saơ du đê̆ rnăk vâl ê hŏ geh n’hao săk rnglăy bôk nău kan. Hôm dŭt âk lah n’hao ueh ăp bôk nău kan kơl an n’hanh lĕ bah ach o nâp nâl”.

Kơp nsum ta lam n’gor Khánh Hoà, rnoh rnăk ach o tâm ƀon lan rnoi đê̆ hŭch râng geh rlău 5% ăp năm, tât aƀaơ hôm nha geh rlău 6.400 rnăk, geh rlău 10,7%. Rlău 3.500 ngih jay truh sat lĕ geh ndơn đah ngih jay nâp ueh. Trong hăn lĕ ueh aih, ngih nti, ngih dak si, điện n’hanh dak dŏng lĕ geh tât ta ăp rnăk ƀon lan. Ta âk ntŭk lôch nglăp kan nsum, rnoh neh, rnoh nuĭh lĕ hao, geh tay âk ntŭk hun hao, pah kan jan sa bôk năp lĕ geh trong hăn mhe. Kơt ta Trung Khánh Vĩnh dôl pơk hvi nău kan tăm tơm sa play. N’gâng kan kơl an tơm ntil, manh prăk, nti kĩ thuâtj, njêng nău nsrôih gay ma an ƀon lan nănh rgâl tơm tăm. Wa Cao Thị Ngọc Thanh, Kruanh UBND xã Trung Khánh Vĩnh an gĭt. “ Ta ntŭk geh rdâk njêng nău nchrăp kan an hun hao nău kan tơm tăm tơm khlăy, săch ăp ntil tơm an tâm di đah nkual neh, trôk nar, nkre lah tâm di đah nău ŭch hun hao wăng sa, nkre rgâl tuch tăm tĭng trong geh săk rnglăy. Âk ntil ndơ lĕ geh ndơ̆ ta ntŭk tăch rgâl, mât đăp mpăn rnoh geh, nău ueh, nsĭt tay nău geh ueh mpeh wăng sa n’hanh nău geh đăp mpăn an ƀon lan”.

Tĭng nău mbơh bâh n’gor, ta nkual Bắc Khánh Hoà lĕ ƀư lôch 29/30 nău mpong bôk nău kan ngih dak hun hao nkual ƀon lan rnoi đê̆ n’hanh gôl yôk, nău geh râng geh ta nkual rnoi đê̆ hao rlău 2,14 tơ̆ đah năm 2020. Ta Nam Khánh Hoà, 19/22 nău mpŏng dơi geh n’hanh rlet rlău, tâm nĕ ntoh lư lah lĕ rngôch rnăk ach o rnoi đê̆ geh kơl mpeh ngih jay gŭ. Yơn lah, hôm nha geh âk nkô̆ mpŏng ŭch ê hŏ dơi geh rnoh xã dŭt jêr jŏt ê hŏ hŭch, n’hao rnoh kon hoc rnoi đê̆ hao nti ta trung học phổ thông, mô lah nkum n’hâm bri.

Tĭng nău mbơh bâh wa  Nguyễn Ngọc Sơn, Groi Giám đốc ntŭk kan Dân tộc n’hanh phung chroh n’gor Khánh Hoà, nkual rnoi đê̆ n’hanh gôl yôk bâh n’gor hôm nha geh âk nău jêr, yơn lĕ geh âk nău dơi đŏng, ngăn lah mpeh tuch tăm. Nău wăng sa rêh jêng ta aơ mbra geh rgâl mpeh nău kan rnôk n’gor kuăl đă doanh nghiệp hăn ndrel, rdâk njêng ăp nău tâm rgop kan. Wa Nguyễn Ngọc Sơn sŏk nău ntĭt ta xã Khánh Sơn.“Ta nkual gôl yôk Khánh Sơn, aƀaơ lah tơm sầu riêng lĕ jêng tơm tăm tơm. Rdâk njêng geh nău ntơ n’hanh geh nău kơl ntuh kơl nkret njêng, tâl dŭng, rĭ sầu riêng ta Khánh Sơn mbra geh  hăn ngai. Yơn gay ma dơi ƀư nău nĕ, an geh ăp nău kơl kan na nê̆, an lor đah doanh nghiệp nău kan nĕ. Bâh nĕ nta nău kan an ăp nkual ƀon lan rnoi đê̆ hun hao”.

Nău kan n’huch ach o, n’hao nău rêh ƀon lan rnoi đê̆ ta Khánh Hoà lĕ geh âk nău dơi na nê̆, ăp nar lơ ma nâp nâl rnôk ndrel đah ndơ dŏng, ntung trong, ntĭm nti n’hanh nău rêh jêng. Doanh nghiệp lĕ hăn ndrel gay ma rnglăy nău dơi. Mbơh tơih chính trị bâh n’gor Khánh Hoà lĕ lah na nê̆ nău mĭn “Mô an du hê nuĭh nklơi ba kơi”, lĕ geh nkô̆ ŭch n’huch ach o nâp nâl âk ding 1 tât 1,5% ăp năm, lah na nê̆ nău ntrŭnh geh nsĭt tay nău geh hun hao lĕ rngôch, nâp nâl an ƀon lan rnoi đê̆, gôl yôk.