Mhe aơ, ta n’gor Dak Nông lĕ geh ƀư rơh tâm mâp tâm rgop pah kan jan sa đah tăch ndơ tuch tăm, đah nău tât râng bâh rlău 30 doanh nghiệp tât bâh nkuăl ƀon têh Hồ Chí Minh ndrel đah bơi tât 200 ndơn kan ăp doanh nghiệp, hợp tác xã, ƀon lan kan lŏ mir bâh n’gor Dak Nông. Ta rơh tâm mâp, ăp doanh nghiệp tât bâh nkuăl ƀon têh Hồ Chí Minh ndrel đah ăp doanh nghiệp, HTX, ƀon lan kan lŏ mir ta Dak Nông lĕ tâm mbơh na nê̆ răng dăng ăp nău tâm kơl tâm rgop tăch rgâl ndơ tuch tăm n’hanh nău ŭch ăp ding. Wa Nguyễn Văn Mười, kruanh ntŭk kan mpeh ba dâng bâh Hội ƀư mir Việt Nam an gĭt.

“Geh tât ăp nău ŭch na nê̆ bâh ăp doanh nghiệp rĭ mpôl hên lĕ rgum lĕ rngôch ndơ̆ an Hội nông dân n’gor n’hanh mbra njoăl an ăp HTX. Mpeh đah ăp HTX rĭ mpôl hên lĕ đă hội nông dân rgum nău bâh ăp HTX mpeh nău dơi bâh nơm, nĕ lah htx mơh nău geh n’hanh he an geh tâm rgop nău kan mhâm ƀư.

Ntoh ngơi ta rơh tâm mâp, wa Hồ Văn Mười, kruanh UBND n’gor Dak Nông, lah na nê̆, tuch tăm công nghệ mhe lah ngoăy tâm 3 nău kan tơm hun hao wăng sa bâh n’gor. Đah ăp nău dơi geh mpeh neh ntu, rnoh dak, mih sial...n’gor geh nău dơi dŭt têh hun hao tuch tăm ndrel đah pâl nđaih rlu rlău. N’gor  jă n’hanh mbra nta nău dơh nơih gay ma ăp doanh nghiệp tât ta Dak Nông.

 “Rhoăt nău tă gĭt blău kan bâh rơh tâm mâp aơ rĭ năm ba kơi he mbra ƀư tĭng trong kan têh lơn, rĭ gâp mĭn săk rnglăy ngăn. Yơn lah bâh rơh tâm mâp aơ gâp ŭch mbra geh nău trĕ lam mpeh nău tuch tăm tuh mbo bâh Tây Nguyên lah nsum n’hanh Dak Nông lah êng tât đah nuĭh dŏng ndơ, mhâm ƀư gay ma ndơ tuch tăm hăn tât ntŭk, di nău ueh n’hanh rnoh khlăy tăch tâm di, ngăn lah kơl an ƀon lan kan lŏ mir geh ŭch hun hao tay ndơ tuch tăm bâh nơm, mhâm ƀư gay ma  lơi an geh mô khlăy tăch geh âk ndơ n’hanh rlơ̆ tay, mô an geh dŏng nău tâm kơl rvăt”.

Tâm ba năp nơh, n’gâng kan Công thương way geh rgum ntrôl dăng ăp nău kan mbơh nău tăch rgâl gay ma tâm rgop nău tăch rvăt ndơ an nuĭh ƀon lan, tâm nĕ ƀon lan rnoi đê̆ gôl yôk, nkual njônh ngai. N’gâng kan Công thương lĕ ndrel đah ăp ntŭk nsrôih gay ma dơi geh mbơh tơih ta ăp ntŭk tăch rgâl n’hanh geh âk nuĭh joi knơm tât. Bình Phước lah ntŭk geh nkual neh tâm di, geh nău ueh jêng dơh nơih gay ma hun hao tơm điều n’hanh dơi uănh lah ntŭk tăm điều rnôk geh bơi tât 50% rnoh neh n’hanh rlău 54% rnoh điều ta lam dak. Wa Thân Thị Xiêm- Giám đốc Công ty TNHH MTV An Thuận Phát an gĭt.

“Mpôl hên lĕ hăn ndrel đah ƀon lan bâh Bình Phước, bâh ƀon lan rnoi đê̆ an tât ƀon lan rnoi Stiêng, rĭ hên lĕ tă geh dăch bên âk năm lah tâm rgop kan đah ƀon lan rnôk ma khay mih tât, ăp nău jêr bâh ƀon lan rĭ hên geh tâm kơl n’hanh rnôk pĕ lêh rĭ hên ndrel đah ƀon lan geh dơn nău kan aơ, gay ma ndơ̆ điều tât máy nkrem rnoh ndơ dŏng, di rnoh tu tơm ta Bình Phước gay ma pă nău pah kan an ƀon lan lôch ăp nar mih n’hanh lôch ăp nar pĕ lêh, yor ƀon lan bâh nkual neh Bình Phước kanŭng geh điều lah nău geh tơm dơm.

Ƀư tĭng bôk nău kan tâm rgop pah kan jan sa, nkret njêng n’hanh tăch rvăt ndơ tuch tăm, Lâm Đồng lĕ rdâk njêng n’hanh hun hao geh rhiăng nău tâm rgop kan, đah bơi tât 16 rbăn rnăk tuch tăm n’hanh klâp ma 2 rbăn n’gul rnăk mat rong. Ăp nău tâm rgop kan aơ geh ƀư tĭng nău kan têh rlău 30 rbăn ha tơm tăm ăp ntil n’hanh ndrôk rpu, sŭr djăr klâp ma 850 rbăn mblâm. Wa Nguyễn Văn Châu, groi Giám đốc ntŭk kan tuch tăm n’hanh hun hao ƀon lan Lâm Đồng an gĭt, nău kan aơ geh lĕ rnoh prăk klâp ma 270 rmen prăk. Nkô̆ mpŏng ŭch geh ngluh mbơh tât dŭt năm 2023, lam n’gor geh 200 nău tâm rgop kan jan sa n’hanh tăch rvăt ndơ tuch tăm đah 30% rnoh ndơ tuch tăm tơm mbra geh tăch bâh nău tâm ton kan.

“Ăp ntil ndơ pah kan tĭng nău tâm rgop kan geh đăp mpăn ntŭk tăch, n’hao nău khlăy, mât đăp mpăn mpeh nău ueh ndơ sông sa lah yor geh dŏng ăp nău ntrŭnh way pah kan tâm ban an tâm di đah nău geh đă bâh ntŭk tăch rgâl. Yơn lah, rnoh ndơ tuch tăm bâh n’gor Lâm Đồng ăp nar lơ ma hun hao rĭ nău ŭch tăch ndơ đăp mpăn bâh ăp nău tâm rgop kan hôm nha dŭt âk, tâm rnôk tơm prăk ngih dak rĭ mô âk. Yor nĕ, tâm nău nchrăp njêng tay n’gâng kan tuch tăm lvang năm 2022-2025 mhe geh n’gor an dŏng rĭ lĕ geh pă dăp du đê̆ rnoh prăk gay ma pơk hvi tay n’hanh hun hao tay ăp rnoh pah kan tâm rgop kan mhe”.