Khay 7 đah nar 27/7 lah rnôk gay lam dak chŭn mbah nkah gĭt ăp nuĭh kon ntoh lư hŏ dăng janh n’groh săk an đăp mpăn, dah rŏng bah neh dak; lah rnôk gay ăp nuĭh ƀon lan dơi rêh tâm nău rêh mô geh tâm lơh tâm su, đăp mpăn,nkah gĭt ăp rnăk dơi kơl, rnăk wâl tahen ơm khĭt, nuĭh geh  n’hâm suan đah cách mạng. Khay 7 “Ngêt dak kah gĭt tu tơm”, n’gor Lâm Đồng dôl nchih tay nău way ơm, bun dăp nău rŏng ƀon tơm neh dak ma ăp nău kan ngăn ngăn, geh  âk nkô̆ khlay.

  Nar bôk khay 7 ta phường Xuân Hương - Đà Lạt, n’gor Lâm Đồng, druh ndăm hŏ nsrôih ƀư ăp nău kan “Nkah gĭt n’hâm suan”, ôp khâl, mpăn nuih n’hâm rnăk wâl dơi kơl; mpôih kuaih, mpoh nhang ta nghĩa trang liệt sỹ. Yuh Nguyễn Thị Thúy, Bí thư Chi đoàn Tổ dân phố 9, an gĭt, aơ mô dơn lah nău kan nkah gĭt, ma hôm lah nău tă ơm gĭt ntĭm nti mpeh nuih n’hâm rŏng dak n’hanh nău dơn kan bah rơh kơn nar aơ:

“Mpôl hên hŏ kan nsum lhăt đah Ban mât bôk kan bah tổ dân phố n’hanh phường hăn khâl ăp rnăk dơi kơl ta ntŭk gay kơl ăp băl druh ndăm dơi mpơl nuih n’hâm nkah gĭt tât ăp rơh u che hăn bah năp. Rlău ma ăp nău kan nê ri mpôl hên hôm mpôih kuiah, mpoh nhang ta nghĩa trang liệt sỹ. Ăp rnôk geh kơt dja ăp năm lah rnôk dŭt uĕh gay mpôl hên ntĭm nti nuih n’hâm rŏng dak n’hanh nău dơn kan an ăp băl đoàn viên druh ndăm tâm dâng bah mpôl hên”.

Mpơl nuih n’hâm nkah gĭt jru đah ăp rơh u che he hăn lor bah năp yor an n’gâng kan rlăch ndăng rklaih luh rnoi nuĭh, mât njrăng n’hanh rdâk njêng nar aơ, tâm ăp nar dja Đoàn phường Xuân Hương - Đà Lạt rgum suan mom tâm âk nău kan ngăn ngăn, ring lam nuih n’hâm “Ngêt dak kah gĭt tu tơm”. Bí thư Đoàn phường Thái Thị Thu Thắm, an gĭt, ăp nău kan dơn geh nău tât râng rah rơch, dơn kan bah 106 chi đoàn đah rlău 5.000 đoàn viên druh ndăm:

“Nkhêp geh 78 năm nar tahen ơm khĭt- rmanh 100% ăp chi đoàn mhe aơ hŏ tĭng ƀư ăp gâl kan, kơt luh hăn kan mât kloh uĕh ntŭk ntô, luh hăn mpôih kuaih kloh uĕh Nghĩa trang liệt sỹ; ƀư ăp nău kan ôp khâl ăp rnăk geh n’hâm suan, rnăk dơi kơl ta lam phường. Bah meng nê lah mpôl đoàn viên, druh ndăm ntop kơl rnăk nuĭh geh n’hâm suan tât tâm ban kơt nkra dơi ăp siƀŭt ma rnăk wâl mô hŏ dơi tât ƀư”.

Ăp nău kan ngăn ngăn bah druh ndăm Đoàn phường Xuân Hương - Đà Lạt lah êng n’hanh druh ndăm n’gor Lâm Đồng lah nsum tâm ăp nar khay 7 hŏ nsĭt tay nău rhơn, nău rngot an âk tahen ơm, ăp tahen rmanh, ăp nuĭh hŏ n’groh an lĕ ma săk druh ndăm bah he an nău đăp mpăn bah neh dak. Wa Phan Xuân Khanh, 74 năm deh, tahen ơm rmanh 3/4, rngot rhơn:

“Ăp nuĭh mpôl hên hŏ ranh sĭt rlu ranh hôm yơn djăt ma tât nar 27/7 ri tâm nuih n’hâm dŭt rhơn nđơr đŏng yor nar dja lah nar lam dak nkah tât n’hanh sĭt n’glĭng  ăp nuĭh kon hŏ tâm lơh chuêl săk nơm an neh dak. N’hanh geh kơt nar aơ ân nơm geh ăp nău n’groh an khĭt să rlă lŭ bah ăp tahen dăng janh, ăp rnăk hŏ chuêl săk nơm rdâng lơh yor an đăp mpăn dah rŏng bah neh dak”.

N’gor Lâm Đồng geh rlău 21.000 tahen ơm khĭt, rlău 11.000 tahen rmanh, 2.460 Me Việt Nam dăng janh (aƀaơ 17 me hôm rêh) ndrel bar pe jât rbăn nuĭh geh n’hâm suan đah cách mạng. Nkah gĭt jru ăp roh yot, n’groh an bah rơh kơn hăn lor bôk năp, wa Y Thanh Hà Niê Kđăm, Ủy viên Trung ương Đảng, Bí thư Tỉnh ủy, Kruanh mpôl đại biểu Quốc hội khoá XV n’gor Lâm Đồng lah rjăp, mbra mât chăm tay lam lĕ rngôch lơn đŏng an ăp rnăk dơi kơl:

“Mpôl hên gĭt lah ăp ntil nău ƀư dơi ma mô hŏ tŏng geh lĕ ăp roh yot, n’groh an têh bah ăp tahen ơm n’hanh rnăk wâl geh n’hâm suan. Yor kơt nê, tâm let năp tay, Đảng bộ, n’gâng kan n’hañh ƀon lan n’gor nơm mbra nsrôih tay lơn gay  n’hao geh nău rêh drăp ndơ, nuih n’hâm an nuĭh geh n’hâm suan, mô an du hê nuĭh geh ntlơi êng bah kơi tâm rnôk rdâk njêng n’hanh hun hao bah n’gor nơm”.

Nău kan nkah gĭt ăp rnăk dơi kơl, rnăk wâl tahen ơm khĭt, nuĭh geh n’hâm suan đah cách mạng tâm ăp nar khay 7 ta n’gor Lâm Đồng mô dơn lah rnôk gay nkah, ma hôm gay hŭr tŏ tâm play nuih ăp nuĭh ƀon  lan ta ntŭk đŏng, lơn lah druh ndăm nău rŏng dak, nuih  n’hâm n’hao êng săk bah rnoi nuĭh he ntơm bah nê rêh uĕh lơn, nsrôih lơn. Ăp trong kơl ngăn ngăn rƀŏng tât ăp “ntŭk khlay”, kơt ntop kơl ƀư jay gŭ, mât chăm n’hâm suan, nta joi nău kan, ntop kơl nău rêh ăp rnăk dơi kơl, rnăk wâl tahen ơm khĭt, nuĭh geh n’hâm suan đah cách mạng ta n‘gor Lâm Đồng dôl rgop mât ndray n’hanh nđơn tay nău way ơm “Nkah gĭt n’hâm suan”, “Ngêt dak kah gĭt tu tơm” bah rnoi nuĭh.