Tâm nar rƀŭn, Kruanh Quốc hội Trần Thanh Mẫn lah rjăp, Đại hội ntoh măt Đảng bộ Quốc hội tal bôk năp geh tâm nrôk neh dak nơm mhe lăp tâm rach năm hun hao mhe, bah năp nau đă lơn ma prêh, ndŏ luh nau dơi, nau kan têh đah Đảng uỷ Quốc hội, rgop nau njêng ntrong hun hao rjăp tâm nau kan ndâk njêng ndrel mât neh dak:

            ‘Aơ mô knŭng lah rnôk gay ma uănh, nchră tât nau kan, ăp ntil bah ăp nau geh dơi, nau ê dơi, nkô̆ ƀư, nau tă geh rhuăt bah năm bah bah năp, ma hôm nchrăp nau rƀŏng, nkô̆ nau kan, nau rƀŏng hun hao ndrel nau kan tơm tâm năm kan 2025-2030; nkre săch nau, ƀư nâp rmôt cán bộ rđau kan tŏng dơi nau dăng, nau blau, nau janh, nau gĭt mĭn, gay ma đăp mpăn ƀư nau kan bah Đảng, Quốc hội ndrel ƀon lan jao ân”.

            Tâm rơh rƀŭn, ăp nŭih kan bah Rnâng kan Đảng uỷ Quốc hội hŏ rgop nau n’hêl mpeh nau kan nchrăp ân nau ntrŭnh bah Đại hội, ăp nau kan nkoch mbơh, nchrăp kan, ƀư nau kan kơl an ndrel nau kan mêt uănh ƀư kan.

            Kruanh Quốc hội Trần Thanh Mẫn rnê prêh ăp tiểu ban, ăp ban Đảng, uỷ ban mêt uănh ndrel Jrâu kan Đảng hŏ nchrăp, nsôih ntrŭnh ƀư nau kan, đăp mpăn nau nâp, nau ngăch ăp nkô̆ nau nchrăp Đại hội; Nua kan nŭih geh ƀư tâm di nau ntrŭnh, nau đă, đăp mpăn ƀon lan ƀư tơm, kloh, năn kơp uănh ƀư ân rjăp năl nau kan, gưl uỷ. Pă nau kan n’hêl ăp đồng chí Uỷ viên Rnâng kan Đảng uỷ rđau đă Đại hội ăp đảng bộ tâm ntŭk.  Nau ntrŭnh Đại hội hŏ ndâk ăp nau nchrăp, ƀư nau sŏk nau rgop âk, djăt, ƀư jêh tĭng nau ngăch đă. Nkô̆, nau ƀư Đại hội bôk năp geh nau dơi, tâm ban prêh. Nau kan mêt uănh geh njrăng khlay, đăp mpăn tâm di nkô̆ nau tâm di chính trị, hồ sơ, nau kan săch ăp nŭih kan tơm.

            Mpeh nau kan ndâk njêng nau ntrŭnh Đại hội, Kruanh Quốc hội jao ân Tiểu ban văn kiện djăt tŏng ăp nau đă tă bah chi bộ, đảng bộ, nŭih ƀư nau kan, đảng biên, nŭih pah kan, ăp nau mbơh nkoch tâm di nau ngăn, nchră mbơh ueh, ăp ntil, tâm di rjăp geh tât nau tă geh dơi, nau ê dơi tâm năm kan rlau aơ, nkô̆ nau, nau tă geh dơi tă gŭt geh geh ntoh kloh nau rƀŏng, nau kan tơm ndrel nchrăp luh nau kan ngăn geh nau dơi ƀư, geh tât nau rgâl mhe tâm nau kan tât:

            ‘Ăp nau ntrŭnh Đại hội ân geh rtŭt gleh, geh nau jru, nơih tâm nchră, njêng nau tâm ban prêh ngăn tâm Đại hội. Tâm nê, nau mbơh chính trị lah nau mbơh tơm khlay, ân geh mât rjăp ăp nau mĭn rđau, nau ntrŭnh, nau rƀŏng têh tâm ăp nau ntrŭnh kan Đại hội XIV bah Đảng; mbơh nau kan geh uănh bah ăp gưl uỷ ân geh nau tma lơh, n’hao nuih n’hâm kan mĭn ƀư kan êng ndrel năl kloh nau kan bah rmôt kan, êng săk nŭih mpeh ăp nau tă geh tâm nau rđau kan, rđau đă bah Đảng uỷ Quốc hội. Nau ntrŭnh ân geh tâm dăch ma nau rƀŏng bah Bộ Chính trị, Ban Bí thư bah Trung ương lah nau snum, yơn nau dơi ngăn bah Quốc hội ndâk pháp luật, mêt uănh ndrel ntrŭnh tât ăp nau kan khlay bah neh dak”.

            Mpeh nau kan rnoh nŭih kan, Kruanh Quốc hội jao đă lŏ mêt uănh ân rjăp, đăp mpăn ƀư tâm di nau ntrŭnh bah Đảng, ƀư ueh nau kan mbơh năl bah cán bộ, nau mbơh săch nŭih ân geh săch bah Rnâng kan gưl kan mhe đăp mpăn tâm di, kloh, geh nau ndơn ơm, rgâl mhe, uănh khlay nau tam kan, geh rnoh nŭih âk ndrel nau pă kan ân tâm di; gưl uỷ năm kan mhe ân ntoh lư mpeh nau kan chính trị, nau blau, nau rêh, nau kan, nau dơi, nau rnơm. Nkre, ƀư ueh nau mĭn, pơk trong tâm ban, tâm rnglăp nsum, mât nâp nau đă, nau nchâp bah Đảng.

            Kruanh Quốc hội rnơm lah, đah nau tâm rnglăp, nau nsôih prêh ndrel nuih n’hâm ƀư nau kan bah dĭng lĕ cán bộ, đảng viên, nau kan nchrăp ân Đại hội ntoh măt Đảng bộ Quốc hội tal I mra geh ntrŭnh ƀư ân tâm di ngăch, đăp mpăn nâp, rgop nau ƀư dơi nau kan Đại hội lah êng ndrel Đại hội Đảng tal 14./.