Tâm sân khấu geh mpoh ang ŭnh chrah, ăp kon se kơt lah ueh rhơn lơn tâm nau nsoh nah ao ueh mhe ntor ueh. Bol ma tek tôr, bol ma mô lăng janh, kŏ geh tâm săk nơm nau rhơn tâm Tết bah kon se. Bah kơi ăp nau rhơn m’ak klơ sân khấu nê, lah âk ngăn nau ŭch rŏng ndrel nau nsôih êng bah ăp nai ntĭm nti. Nai nti Phan Thị Lệ, nai ntĭm kon se jrâu kơl an kon se jê̆, rhơn nkoch:

‘Yor ăp kon se mô dơi geh tăng djăt âm nhạc ri ma ăp nai ntĭm lĕ ntĭm ăp nau ƀư mpât jâng ty, săk jăn, jêh nê mơ dĭng geh rgum nsum ntĭm nti ma nau mprơ ndrel rnôk geh rgum nau njroh ma nau mprơ ri ăp nai ntĭm knŭng ntĭm ma ti, ma săk jăn, geh nsum kơt nê dơm ân ăp kon se dơi geh nkah nau ƀư ndrel ƀư tĭng nau geh đă”.

Đah ăp nŭih kon se klơ sân khấu Trung thu bah Ntŭk kan kơl an hun hao ntĭm nti tâm rnglăp nsum bah kon se rven rvo, kuet nte, măng aơ kŏ geh nau rhơn lơn đŏng. Ăp kon se geh nsoh kho ao ueh, geh nkrŏ ueh, ndrel ngăn lah geh ŭch rŏng, geh rnglăp nơm tâm nar rgum Bŏng khay. Ndrel ma rhơn đah ăp nai ntĭm nti ndrel ăp kon se tâm măng bŏng khay tâm Ntŭk kan kơl an hun hao ntĭm nti tâm rnglăp bah kon se rven rvo tâm n’gor Dak lak lah ăp me mbŏ.

Đah khân păng, rnôk saơ kon nơm gơm rum, geh tâm rnglăp nsum ma ăp băl êng ndrel kâp rhơn geh sa ƀanh, yan Trung thu năm aơ geh ăp ntil nau tŏng ueh khlay ngăn. Yuh Lê Thị Hồng, me mon Hoàng Lê Minh Khang, rhơn nkoch:‘Lah du hê nŭih e ri saơ rhơn m’ak ngăn ndrel dŭt n’hâm saơ ueh tâm nuih n’hâm, gâp saơ kon gâp kŏ kơt lah ăp kon se êng êng rhơn ngăn, dŭt n’hâm ŭch ro. Gâp dŭt n’hâm lah ueh ma ăp nai ntĭm nti tâm aơ đŏng”.

Wa Lưu Thị Bình Minh, Groi Giám đốc ntŭk kan kơl an hun hao nau tâm rnglăp bah kon se rven rvo n’gor Dak Lak mbơh, rnôk aơ ngih săm ƀŭt aơ lah ntŭk ngih nsum bah 144 kon se jê̆, tâm nê geh 42 kon se mô tăng tôr, mô blau ngơi, ndrel ma ăp kon se mbrơi gĭt blau bah bôk rngok êng êng. Ăp nau kan geh ƀư nsum ma nau ŭch rŏng kơt aơ mô knŭng leo tât ân ăp oh du nar ueh m’ak, ma hôm pơk luh ăp nau tâm mâp, nau gơih ngơi, kơl an kon se rnơm geh rnglăp ma nsum mpôl:

‘Ăp khay Ntŭk kan kơl an ƀư ăp nau kan bah dih mông nti ân ăp kon se, yơn Trung thu năm aơ ueh lơn lah geh nau kơl an bah rđau kan n’gor, N’gâng kan tât pă nklâm ndơ, ăp kon se ndrel ntŭk kan rhơn n’ơn ngăn. Aơ lah du Trung thu ueh ngăn ngăn yor măng nar puăn ăp kon se geh jă tât ntŭk kan Văn hoá gay ma râng đŏng”.

Ntio tay du yan Trung thu đŏng lĕ tât ma Ngih săm ƀŭt geh nau mha êng aơ. Ta aơ, geh nteh gâr, njroh lân, geh ăp nau njroh nau mprơ geh hoch dak rhal ndrel nau ŭch rŏng bah ăp nai ntĭm, geh ăp nklâm ndơ ma nau ŭch rŏng ndrel âk nau ŭch rhơn bah kon se kơt lah ang lơn. Măng rgum trung thu jêh nê lŏ lôch, yơn lah nau gơm, nau rhơn ndrel nau duh răm bah nau tâm boh kon nŭih hôm mro mrăng, n’hao nhaot jâng ăp oh nhoat rnơm lơn tâm trong hăn bah năp tay./.