Bôk nău kan gưl neh dak hun hao  wăng sa rêh jêng kon nuĭh nkual rnoi mpôl đê̆ n’hanh  mpeh yôk yang lvang năm 2021-2030, lơn lah trong nchrăp 8 "Tĭng ƀư tâm ban bu ur bu klô n’hanh nkra ăp nkô̆ nău jăch ndăn an bu ur n’hanh kon se", hŏ njêng luh ăp nău rgâl uĕh tâm nău gĭt êng n’hanh nău rêh bah bu ur. Yơn lah, rnôk an ƀư, nha hôm âk nkô̆ nău nchiăng khan, ntul rlong ân dơi uănh năl n’hanh nkra gay nău ndop bu ur bu klô geh nău tam ngăn n’hanh jŏ jong.

Trong nchrăp 8 lah trong nchrăp mha êng mpeh bu ur bu klô lor bôk năp gŭ tâm du bôk nău kan gưl neh dak, mpơl nău uănh khlay jru bah Đảng n’hanh Ngih dak. Lvang năm 2021-2025, Trong nchrăp 8 hŏ geh nău dơi uĕh. Pah kan mât bôk kan n’hanh an ƀư ơm, đah nău njêng Ban ƀĭt juet trong nchrăp kan bah Trung ương tât gưl n’gor ta lĕ rngôch ăp ntŭk. Trung ương hŏ n’gluh an dŏng 17 siƀŭt ntĭm nti n’hanh leo ƀư ôp uănh, nkra bah nău kŏ kol năn ngăch.

Tơm prăk dơi rgum âk, đah tơm prăk n’gluh an manh bơi 2.000 rmen prăk, lơn âk tă bah Trung ương. Âk rnoh tât kan n’gâng tơm geh tât nău njêng rmôt nkoch trêng nsum mpôl, câu lạc bộ bah nău rgâl, n’hanh n’hao nău dơi kan an cán bộ bu ur rnoi mpôl đê̆ hŏ tât n’hanh rlău trong nchrăp. Ăp trong ntĭt leo kơt "Ntŭk nsing nơm" hŏ ntik n’hao nău dơi tam, mô dơn nê hŏ kơl lĕ ma bu klô tâm ăp nkô̆ nău geh tât.

Bol geh ăp nău dơi ngăn, nău ndop bu ur tâm ăp trong nchrăp kan n’glăp gâl bah rnoh tât kan gưl neh dak nkual rnoi mpôl đê̆ n’hanh mpeh yôk yang nha hôm ât rdâng đah âk "ntŭk kol khan" ân dơi uănh năl sŏng dăng. Nê lah mpăng đêt tâm pă n’hanh dŏng prăk ngân sách ta n’gor; lah ăp jêr jŏt tâm nău ntrŏng nuĭh n’hanh an ƀư nkô̆; lah ăp nău khoah tâm pah kan kơi năp nti n’hao nău dơi kan; mô lah ăp mpăng đêt ndop bu ur tâm ăp gâl kan êng êng.

Mpeh ăp mpăng đêt tâm pă n’hanh dŏng tơm prăk, bol Bộ Tài chính hŏ geh Thông tư 55 njêng trong tĭng gay n’gor tâm pă tơm prăk ngân sách, yơn I ngăn, âk n’gor nkual rnoi mpôl đê̆ n’hanh mpeh yôk yang mâp jêr jŏt mpeh tơm geh, jêng tât nău tâm pă tơm prăk dŏng an trong nchrăp 8 mô hŏ tŏng đah nău ŭch geh. Ăp rmôt nkoch trêng nsum mpôl, bol dơi njêng n’hanh kơi năp nti, hôm dơn geh du rnoh prăk dŏng đêt dơm, bol mô tŏng  tơm ndơ gay mât kơn nău kan du trong ngăn ngăn. Nău kan lam nuĭh kơl gay rgum tay prăk dŏng kan hôm âk jêr jŏt đŏng, mô hŏ tât geh kơt nău mpŏng.

Mpeh ăp mpăng đêt tâm nău ndop bu ur tâm ăp trong nchrăp kan n’glăp gâl êng ƀa ƀă, uănh bah nuĭh rnâng kan mbơh nti trong kơl, Tiến sĩ Phạm Thái Hưng an gĭt: ăp siƀŭt ntĭm nti bah Trung ương n’hanh n’gor mô hŏ njrăng uănh khlay ngăn tât nău dja du trong ăp tŏng ngăn.

Tâm rnoh bơi 200 rnoh nchih trong luh bah bôk nău kan gưl neh dak n’hanh mpeh yôk yang geh tât 71 rnoh ân geh tâm pă ntil tĭng săk bu ur, yơn nău tĭng ƀư tâm ngăn ngăn hôm ntul rlong. Nău dja ƀư an nău dơn kan ntrŭt ntrôl tâm ban bu ur bu klô tâm nkual rnoi mpôl đê̆, ơm hŏ jêr, hôm lơn ma jêr dơi tât rnoh kan gưl neh dak ndơ̆ luh đŏng.

Tĭng Tiến sĩ Phạm Thái Hưng, gay ntrŭt ntrôl geh nău tam ndop bu ur, đăp mpăn ăp rnoh tât mpeh tâm ban bu ur bu klô bah Nghị quyết 88 Quốc hội n’hanh trong kan gưl neh dak, ân geh ăp nău rgâl tơm tâm trong tât dăch. Tâm nê ân ndop bu ur tâm lĕ rngôch ăp trong nchrăp kan n’hanh gâl kan jê̆ bah bôk nău kan gưl neh dak. Nău dja ân ntĭm nti na nê̆ mpeh trong tâm n’guăk tơm prăk ngân sách n’hanh trong ƀư, bah Văn phòng tâm pă bôk nău kan gưl neh dak n’hanh Ủy ban Dân tộc. ân rgâl mhe pah kan ntĭm nti n’hao nău dơi kan. Rgâl bah kơi năp nti glêh nar jêng trong nkra n’hao nău dơi kan tĭng rêng ƀư, uănh khlay nău tă ơm gĭt kan n’hanh ngăn ngăn. Rlău ma nê, ân n’hao âk nkoch trêng nsing tâm nsum mpôl; Ntrŏng năl tay rgum tơm ntuh kơl n’hanh mât kơn mbro n’hanh pơk hvi trong ntĭt leo nsĭt geh nău dơi.

Nău nkra ăp nchiăng khan dja mô dơn lah nău n’hao nău dơi tam kan bah trong nchrăp 8 ma hôm lah ndơ sơn nâp gay bôk nău kan gưl neh dak nkual rnoi mpôl đê̆ n’hanh mpeh yôk yang tĭngt ƀư tât rnoh dơi nkrum lam mpeh hun hao nâp dăng n’hanh geh nău tâm ban, mô an geh du hê nuĭh ntlơi êng bah kơi./.