Rnôk aơ, n’gor Dak Lak geh rlau 1.060 nŭih bu rnơm ntoh lư, tâm 49 rnoi mpôl oh nô tâm nkuăl. Khân păng lah nŭih leo trong, gĭt nau vay ơm, nau ŭch bah kônh wa ƀon lan, lah ntŭk nsing nuih n’hâm bah ƀon lan lah ntung nthoi đah ƀon lan ndrel n’gâng kan, nsôih râng hun hao văng sa, rêh jêng, mât đăp mpăn, lơh rdâng ma nau mhik bah ăp phung rlăng, rgop nau mât đăp mpăn chính trị tâm dâng.

            Tâm nar mâp măt, ăp ntoh măt hŏ tâm pă mbơh nau blau tâm nau kan bonh đă, tâm rjaih nau, ndâk ƀon lan mhe, bonh đă druh ndăm hăn tahen. Wa Y Tum Ayun, nŭih bu rnơm tâm ƀon Ea Tuk, xã Cư Pơng ân lah, nau tâm ban tâm ƀon lan lah nau tơm gay ma ndâk ƀon lan hơm răm, ueh lăng. Ndri ma ăp nŭih ân geh nau nsôih tâm rnglăp, nsum n’hâm ndâk njêng ƀon lan:

            ‘Lŏ ndrel ma Đảng, n’gâng kan tâm nkuăl ndâk ƀon lan tâm nau kan hun hao văng sa, đăp mpăn rnă njrăng chính trị, đăp mpăn nau rêh lam tâm nkuăl, nkoch mbơh, ntĭm nti ân kônh wa mpeh ăp nau mhe, tâm di, bonh đă kônh wa pah kan, mât chăm ân kon hăn nti, nsôih rklaih hao luh bah ach o”.

Ntoh măt kŏ tâm nchră, nkoch mbơh nau kan ueh tâm nau n’hao nuih n’hâm nkah, njrăng rdâng lơh ma nau mhik bah phung rlăng gay lơh lơi nau tâm boh, n’hao nau tâm rnglăp nsum ma tahen ƀon lan.

            Ntoh nau tâm nar mâp, Đại tá Niê Ta, Rđau kan n’gâng kan tahen n’gor Dak Lak lah ueh nau rgop têh, khlay bah ăp bu ranh ƀon, kruanh ƀon, nŭih bu rnơm đah nau kan tahen, neh dak bah nkuăl. Nkre ân đă nŭih bu rnơm lŏ tâm rgop rklaih đah pháp luật ndrel nau vay, bonh đă ân ueh, nâp:

            ‘Gĭt ntrong kan, nau ntrŭnh bah Đảng, pháp luật bah Ngih dak, tâm rgop ueh đah pháp luật ndrel nau vay gay nkoch trêng bonh đă ƀon lan rêh ndrel pah kan tĭng hiến pháp ndrel pháp luật. Nkoch trêng, ntĭm mbơh ân kônh wa ăp rnoi mpôl đê̆ mô djăt, mô tĭng ăp nau nkoch mbơh rlăm, nklă lă lêng bah phung rlăng ŭch ƀư khuch tât nau đăp mpăn neh dak, ƀư tơm bah nkual neh neh dak”

            Rnôk aơ, N’gâng kan rđau tahen n’gor Dak Lak pă săm ƀŭt rnê 30 nŭih geh nau ntoh lư tâm nau ƀư nau kan neh dak, tahen tâm nkuăl năm 2025 rgop nau ndâk neh dak đăp mpăn lam ƀon lan./.