Đah 90,51% ntoh măt Quốc hội ân ƀư, Quốc hội yor ty nchrăp nau ntrŭnh mpeh nau hun hao văng sa, rêh jêng năm 2026. Nau ntrŭnh năl kloh 15 nkô̆ nau tơm, tâm nê: Nau hun hao ndơ tâm dak (GDP) nsôih ntơm 10% hao gŏ lơ. GDP bôk nŭih geh ntơm 5.400 tât 5.500 đôlar Mỹ. Aơ  lah ăp nkô̆ nau prêh, yơn âk ntŭk ntoh măt tâm nchră tât nau kan aơ ri geh nau dơi gay rnơm lah mra geh dơi nkô̆ nau đah nau njêng dơi tâm năm kan aơ. Wa Trần Văn Lâm, rmôt kan Bắc Kinh lah rjăp, ăp nau tă geh dơi hun hao, ndrel nau kan ntrŭnh hŏ geh Quốc hội ƀư jêh tâm ăp rơh rƀŭn êp aơ, nê lah nau nsôih gay Việt Nam lăp tâm năm 2026 đah nau nsôih nchrăp ndrel rnơm:

            ‘Hun hao năm aơ geh rlau 8%. Ndrel nau dơi ân rơh ba kơi hŏ geh Quốc hội tâm rơh rƀŭn mhe nơh tâm nchră gay uănh năl nau rgâl nkra ăp nau kan tĭng nau ntrŭnh luật pháp, njêng âk nau dơi dăng rjăp kơl an nau pă dơi ân chính phủ gay ntrŭt dăng nau hun hao tâm năm 2026 ndrel lôch lvang ba kơi đah nkô̆ nau prêh lơn ndrel hên rnơm lah đah ăp nau ma nơm tă geh ndrel dôl geh ri mra ân dơi geh nkô̆ nau nchrăp luh”.

            Đah 88,61% ntoh măt tâm ban nau, kêng măng aơ Quốc hội hŏ nchră lauh nau ntrŭnh mpeh nau nchrăp tơm prăk Ngih dak năm 2026. Tĭng nê, nau ntrŭnh nchrăp tơm prăk Ngih dak năm 2026 đah nau geh tơm prăk Ngih dak lah rlau 2 rkeh n’gul rmen. Rnoh prăk dŏng bah tơm prăk ngih dak rnôk aơ rlau 3 rkeh rmen (ngăn lah gay ntop ân ăp n’gor đăp mpăn rnoh prăk khay 2 rkeh 340 rbăn/khay).

            Du nau kan êng kŏ geh ntoh măt Quốc hội ndrel cử tri uănh khlay, nê lah nau kan Live stream tăch ndơ. Rnôk rgop nau mpeh Nchrăp luật ƀư nau kan tăch rgâl, ăp ntoh măt uănh aơ lah du nau nchrăp khlay, mô êng ntrơn nau kan tăch rgâl bah mạng ma hôm lah nau dơi khlay bah văng sa neh dak.  Wa Hoàng Thị Thanh Thuý, rmôt kan bah Tây Ninh ân lah, bol ma nau nchrăp luật ntrŭnh geh nau dơi bah nŭih Live tream tăch ndơ yơn hôm âk nau tâm ƀah kơt: ê geh nau nkân rnôk mbơh tăch ăp ntil ndơ khuch tât n’hâm soan, rnôk mât prăp nau kan nê gleh, ê geh ntrŭnh mbơh rnoh nau kan nê tât rnôk geh mbơh nau ƀư tih:

            ‘Gay đăp mpăn nau nchrăp ân tâm di lơn đah nau ngăn ri geh tât ngăch bah nau kan tăch rgâl bah live stream, đă ân geh nkah tay ntop nau dơi nkân njrăng lor ma ƀư nau kan mbơh nkoch bah ăp rnôk live stream nkoch mbơh nau geh tât đah ăp ntil ndơ tăch geh kuch tât n’hâm soan; ƀư kloh nau kan geh tât bah nŭih live stream tâm rnôk leo nau mbơh nau kan tih rlet rlau mô lah  tih ngăn rđil đah nau dơi ân tăch ndoh ndơ; pơk hvi năm ƀư nau kan mêt prăk rnoh mrô live stream; ntop tay nau dơi ân nau kan geh mbơh kloh nkô̆ live stream, nkân uăh nau nkoch mbơh, đă mô tâm di ndrel geh nau dơi nkah mbơh rnôk saơ rnoh geh bu nkoch mbơh đă nau âk ir”.

            Đah 15 rkeh nŭih têh dơi nsum ma nau dŏng điện thoại yơn nau nchrăp luật lŏ ê geh nau mbơh kloh nau ntrŭnh êng gay mât nau dơi ndrel nau đăp mpăn bah kon se tâm trong ƀư kan tăch rgâl. Ndri ma, wa Nguyễn Thị Việt Nga, rmôt kan bah Hải Phòng, đă:

            ‘Nkre ƀư, rnôk saơ nau kan live stream geh nkô̆ nau mô tâm di đah nau vay ơm, nau ueh yau, nau ntrŭnh bah pháp luật ƀư lơh khuch ân kon se ri ân geh nau dơi gay mbơh tâm rgop đah nau geh dơi ndrel ntŭk ƀư nau kan mât gay ma doh rklaih ngăch đah ăp nkô̆ nau nê”.

            Ƀư kloh nau aơ, Groi Thủ tướng Bùi Thanh Sơn, mbơh:

            ‘Nau nchrăp Luật rnôk aơ kŏ nsôih ngăn rgum ăp nau nkô̆ nau ma nơm dơi geh mât ueh ân nŭuh rvăt dŏng lah tơm nŭih râng tâm ăp nau dơi ƀư nau kan tăch rgâl điện tử. Êng ne, luật kŏ ntrŭnh kloh nau kan bah nŭih live stream ndrel nŭih tăch. Nar aơ nơm mra lŏ djăt ăp nau mbơh đă bah ăp ntoh măt gay ăp ntoh măt rđau đă ntŭk kan nchrăp săch ntop tay, ƀư jêh nkô̆ aơ, ngăn lah nau mât nau dơi ân kon se”./.