Rơh rƀŭn tal 10 mra ntơm ƀư tâm lơ 20/10 ndrel lôch tâm lơ 12/12. Nchrăp Quốc hội mra uănh, ntrŭnh: 45 nau nchrăp luật, nau ntrŭnh tâm nau kan ndâk njêng; 13 rmôt nkô̆ nau văng sa, rêh jêng, tơm prăk ngih dak, uănh ndrel ntrŭnh ăp nau kan khlay êng bah neh dak, mêt uănh ndrel ƀư ăp nau kan khlay êng bah neh dak, nkre, geh 13 nkô̆ nau njoăl mbơh gay ntoh măt Quốc hội uănh mĭn.

            Thủ tướng Chính phủ Phạm Minh Chính ân lah, nau kan ndâk ntrong pháp luật tâm nuih n’hâm ngih dak pháp quyền xã hội chủ nghĩa bah ƀon lan, yor ƀon, sŏk ƀon lan ƀư tơm. Thủ tướng đă bar ntŭk kan tâm pă, tâm rgop rjăp, săk tam; ăp n’gâng kan ân tâm rgop ma MTTQ tâm nuih n’hâm nâp gay djăt nau mbơh đă bah ƀon lan, nŭih kan, nŭih kan khoa học; nau ƀư mô dơi ndal, duh, nkre đăp mpăn nau đă tât nau kan, nau ƀư, nkre mât nâp, nkre n’hao nau dơi ueh ngăch. Êp nê, nau kan nchrăp ăp nau nchrăp luật ân geh nâp, tâm di, rjăp; tâm rgop ngăn, ueh đah ntŭk kan, ƀư ueh nau dơi nuih n’hâm kan, nkre dŏng nau blau njêng mhe. Thủ tướng Chính phủ Phạm Minh Chính lah rjăp:

            ‘Lŏ rgâl mhe nau mĭn, ntrŭt dăng nau rgâl mhe nau kan ê nkra luật pháp, ntrơn rgâl tă bah nau mĭn jâk tâm nau mât ƀư jêng nau njêng ndrel kơl an. Aơ lah du nau ŭch prêh ngăn tâm rnôk ƀaơ hun. Mêt tâm dăch ma nau ngăn geh tă bah nau ngăn, tâm ryơk nau nê ndrel sŏk nau nê ƀư mâng veh. Nau mĭn bah nơm ân geh rgâl ntŭk aơ. Gâp nkoch mbơh ma dĭng lĕ he, nau dơi geh mât ăp nau kan tă bah nau mĭn, nau nsôih ntơm bah nau rgâl mhe, n’hâm dăng ntơm tă bah ƀon lan. Ri ma tâm nuih n’hâm ƀư luật ndâk njêng luật ri nơm kŏ ân geh nau mĭn ndrel ntrŭnh ƀư tât nau kan aơ”.

            Tâm ban ma ăp nau mbơh đă bah Thủ tướng Chính phủ Phạm Minh Chính, Kruanh Quốc hội Trần Thanh Mẫn nkah tay, ntơm rnôk aơ tât rơh rƀŭn mô hôm âk, ngăn lah tâm rnôk geh âk nau kan khlay kơt lah nchrăp Đại hội Đảng lam dak tal 14, săch ntoh măt Quốc hội gưl 16 ndrel HĐND ăp gưl năm kan 2026-2031. Yơn lah, Quốc hội, Chính phủ hôm nchrăp ân ueh rơh rƀŭn tal 10, rơh rƀŭn dăch dŭt bah năm kan Quốc hội gưl 15.

            Kruanh Quốc hội nkah, ăp ntŭk nchrăp săch nau kan ân geh ƀư tâm di Luật ntrŭnh quy phạm pháp luật, ăp nau ntrŭnh, nau đă tă geh ntrŭnh. Jêh rơh rƀŭn aơ, Tổng thư ký Quốc hội tâm rgop ma Kruanh Văn phòng Chính phủ dăp tay nau kan ân tâm di ma mông nar geh ƀư ăp rơh rƀŭn bah Đảng. Bar ding ân lŏ tâm rgop năch lơn tay nau nchrăp săm ƀŭt, leo lăp tâm APP Quốc hội gay ăp ntoh măt mĭn ƀư. Kruanh Quốc hội mbơh, tâm nuih n’hâm kan ngăch ndal, ta rơh rƀŭn aơ, Quốc hội ndrel Chính phủ ân tâm ban nau mô rlu tâm n’gul vah:

            ‘Quốc hội mô ƀư ôp nau ma rgâl jêng êng nau kan, Chính phủ njoăl nau mbơh tŏng ăp gay Quốc hội tâm nchră tâm di nar. Ntŭk kan ân geh nchrăp nkô̆ nau gay mbơh rgum nsum ăp nau mbơh đă đồng chí kruanh n’gâng kan, kruanh ntŭk kan ƀư nkô̆ nau nê mbơh. N’huch mông nar răk ăp nau mbơh nklăp 5 mnĭt, dăp rgum mông kan ân tâm di am ăp luật, nau ntrŭnh nchrăp luật ndrel mông nar Quốc hội uănh rnôk nchră dŏng. Yor nau kan tât khlay, ri ma rơh rƀŭn Quốc hội rnôk aơ nơm mra pă jêng nau tâm nchră luật. Tâm nuih n’hâm nchră tĭng rmôt văng sa, rmôt rêh jêng, rmôt tă bah pháp luật khoa học công nghệ neh dak, rnă njrăng nơm ân geh tâm pă rmôt gay ma nchră”.

            Kruanh Quốc hội đă ăp n’gâng kan, Kruanh Hội đồng Dân tộc, ăp tơm bah Uỷ ban ân geh tĭng tât lôch đah ăp nau nchrăp Luật yor ntŭk kan nơm ƀư, mbơh, mêt uănh ân tât rnôk geh Quốc hội nchră dŏng. Ndrel ma nê, ăp Kruanh n’gâng kan ân bonh đă ntŭk kan bah nơm ntrŭt dăng nau dŏng nau kan mhe tâm nau mbơh nau, ntrơn rgâl mrô, ngăn lah dŏng nau blau njêng mhe tâm nau kơp uănh ăp luật ơm, nau nchrăp luật mhe gay ma geh đăp mpăn ngăch, săk tam. Kruanh Quốc hội Trần Thanh Mẫn tâm ban nau đah Thủ tướng Chính phủ Phạm Minh Chính ân lah, 2 ding ân geh tâm rgop tâm nuih n’hâm tâm rnglăp; lah rjăp, rơh rƀŭn lah nau dơi nsum bah Chính phủ, Quốc hội đah nau rđau kan bah Rnâng kan rđau kan Trung ương Đảng, Bộ chính trị, Ban Bí thư ndrel Tồng Bí thư Tô Lâm./.